SEKARIA 1 - BALA LUK DO'

Tuhan Nawar Pupu Neh Iumi Neneh

¹ Tuhan nemaré bala ini kuan Nabi Sekaria luk anak Berekia Ido bang bulan ualuh, lak luk kedueh kareb imet Darius raca' Parsi.

² Tuhan luk Melalud nengecuk ni Sekaria pebala kuan pupuneh, “Ui ini Tuhan pelaba useh inan tepun muyuh.

³ Iamo' nekini UI pebala nemuyuh, ‘Do' lumi Negku, idi Ui miak lumi nemuyuh.

⁴ Aleg muyuh mepad kudeng tepun muyuh. Nabi-nabi luk mulun bang kareb luk mon nemaré balaKu nedeh, idi nemebpeng nedeh na nganau' luk dat. Iamo' na ideh pian ninger balaKu.

⁵ Iapehké tepun muyuh nekini? Mulun teh ideh luk nabi ineh?

⁶ Iamo' bada' idi ukum luk biréKu dengan tang demulunKu lun nabi pangeh nangun kuan tepun muyuh. Mio-mio ideh nuren idi nengamo Negku, Tuhan luk Melalud, pangeh nengukum nedeh maya' kekamendeh, maya' kudeng luk pangeh tirawéKu.’ ”

Luk Sinier Nabi Ratnan Kuda-Kuda

⁷ Bang lak luk kedueh kareb imet Darius, ieh ineh dueh ngepulu' apat aco bulan pulu' aceh (luk titen bulan Sibat), Tuhan nemaré aceh bala bang luk sinierku kareb medacem.

⁸ Ui nenier aceh melaikat Tuhan luk maya' kuda luk mesia'. Ieh pangeh nucu' liang kayuh hadas luun raked, idi pa puetneh inan kuda baken—mesia', mebuda' idi meburit.

⁹ Idi ui nengitun neneh, kebalaku, “Anunké ilung kuda ini?” Idi kebalaneh, “Ui miak mada' ilungneh namu.

¹⁰ Tuhan luk nengecuk nelun luk maya' kuda ini amé' nier bang tana' ini.”

¹¹ Idi kebala lun luk maya' kuda ineh kuan melaikat, “Kai pangeh nenalan aput-aput tana' ini, idi lun luk bang tana' ini melaya' idi na pebunu'.”

¹² Idi kebala melaikat ineh, “O Tuhan luk Melalud, Iko museh inan Yerusalim idi bawang-bawang Yahuda kinio tudu' ngepulu' lak. Tuda' ioké idi Iko mada' éi'Mu nedeh?”

¹³ Idi Tuhan nengor bala melaikat ineh dengan bala luk do',

¹⁴ idi melaikat ineh nengecuk negku mada' luk bila Tuhan luk Melalud ineh, kebalaNeh, “Ui mawa tu-tu idi méi' kuan Yerusalim, bawangKu luk meligan ineh. Idi Ui museh inan pupu baken luk mulun dengan na susa'.

¹⁵ Kareb Ui nengimet usehKu inan pupuKu, pupu baken ineh luk nengacing susa' luk meluun rayeh kuan pupuKu.

¹⁶ Idi nekini Ui amé' Yerusalim, pad Ui mada' éi'Ku kuan bawang ineh Ruma'Ku miak piduten baruh, idi bawang ineh pana'.”

¹⁷ Idi melaikat ineh nengecuk negku mada', kebalaneh, “Tuhan luk Melalud nepejani' idi bawang-bawangNeh ini miak uen ngeperuan, idi Ieh miak ngubuk Yerusalim sekua' teh, pad ieh mangun ku bawangNeh luk pinili'.”

Luk Sinier Ratnan Unga

¹⁸ Bang aceh luk sinier, idi ui nekali' apat unga pung.

¹⁹ Idi ui nemutuh melaikat ineh mada' ilungneh. Idi kebalaneh, “Ieh ineh apat imet bang tana' ini luk pangeh nematad nelun Yahuda, lun Israil, idi lun Yerusalim.”

²⁰ Idi Tuhan nemada' apat burur lemulun luk ngimet tuno sirenku.

²¹ Idi ui nengitun, “Anunké luk ruen lemulun ini?” Kebalaneh, “Ideh amé' ngatot idi ngusag imet luk pangeh nengebeneh tana' Yahuda idi luk pangeh nematad pupu ini.”