PURA' 8 - BALA LUK DO'

Susa' Luk Kedueh: Atit

¹ Kebala Tuhan ni Musa, “Amé' iko papu' raca', idi pebala neneh, ‘Ini bala Tuhan: Nima' pupuKu nalan amé' sembayang Negku.

² Kudeng iko na nima' nedeh nalan, kali' rungen Ui ngukum amung bawangmu ku atit,

³ pad amung Abpa' Nil mepanu' ku atit. Ideh manad idi umak bang ruma'mu, takepmu, idi luun tilemmu, idi bang ruma' amung lun tarehmu idi anak itinmu, bang dapurmu idi bang lacangmu pana'.

⁴ Idi atit ineh pana' manad luun bururmu idi luun burur anak itinmu idi luun burur lun tarehmu.’ ”

⁵ Idi teh kebala Tuhan ni Musa, “Ngecuk ni Arun ngegenang rukudneh ineh pa luun amung abpa', turuk, idi takungdeh, pad atit umak bang bawang Masir.”

⁶ Idi Arun nengegenang rukudneh pa luun amung bawang Masir, idi atit ineh numak nengaput bawang.

⁷ Idi lun luk mileh mangun pana' nenganau' kudeng ineh dengan ileh bangundeh, pad atit umak luun tana' Masir.

⁸ Idi raca' nenawar ni Musa idi Arun, kebalaneh, “Do' sembayang mutuh Tuhan ngusu amung atit ini, idi ui miak nima' pupu ineh nalan amé' maré luk barén inan Tuhan.”

⁹ Idi kebala Musa ni raca', “Ngeletep aceh kareb luk inan sembayang kuanmu idi amung tarehmu idi anak itinmu, pad atit ini buro rat namu idi ratnan amung ruma', pad ideh mudeng bang Abpa' Nil.”

¹⁰ Idi kebala raca', “Sembayang kuanku nebpa.” Idi kebala Musa, “Ui miak nganau' kudeng luk icukmu, pad iko kali' na luk mepad kudeng Tuhan Allah kai.

¹¹ Iko, lun tarehmu, idi pupumu miak mepuit ratnan atit ineh. Idi na luk ketecan, iamo' inan bang Abpa Nil.”

¹² Musa idi Arun neburo rat pa kiung raca'. Idi Musa nesembayang mutuh Tuhan nala' amung atit.

¹³ Idi Tuhan nenganau' maya' kudeng luk pinutuh Musa. Idi atit ineh naté bang ruma'deh, luun natad, idi luun lati' pana'.

¹⁴ Idi lun Masir nengamung butungdeh tebuduk-tebuduk, idi bawang ineh pelaba dat buen.

¹⁵ Kareb raca' nekali' amung atit pangeh naté, idi niatneh metueh teh, pad ieh na ninger bala Arun idi Musa, maya' kudeng luk bila Tuhan.

Susa' Luk Keteluh: Tukung

¹⁶ Idi teh kebala Tuhan ni Musa, “Ngecuk ni Arun necat tana' ku rukudneh, pad abuh tana' ineh misu' ku tukung aput bawang Masir.”

¹⁷ Idi Arun nenecat tana' ku rukudneh, idi tana' ineh nisu' ku tukung luun burur lemulun idi luun amung pung, aput bawang Masir.

¹⁸ Idi lun luk mileh mangun nenutun nganau' luk kudeng ineh teh dengan ileh bangundeh, pad inan tukung. Iamo' na ideh miak nganau' kudeng ineh. Idi tukung ineh iné' luun lemulun idi luun amung pung.

¹⁹ Idi kebala amung lemulun luk mileh mangun ni raca', “Ini aceh tanu' ratnan lalud Allah!” Iamo' niat raca' pelaba tueh. Idi na ieh ninger baladeh, maya' kudeng luk bila Tuhan.

Susa' Luk Keapat: Laled

²⁰ Idi kebala Tuhan ni Musa, “Kulat iko uka-uka, idi amé' papu' raca' kareb ieh amé' tangeb abpa', idi pebala neneh, ‘Kudeng ini bala Tuhan: Nima' pupuKu nalan pad ideh sembayang Negku.

²¹ Kudeng iko na nima' nedeh nalan, idi Ui ngukum nemuyuh, pad inan laled luun bururmu, tarehmu, idi anak itinmu. Idi teh ruma'-ruma'mu, idi ruma'-ruma' lun Masir mepanu' ku laled. Idi tana' pana' maput ku ideh.

²² Iamo' Ui ngatad bawang Gosen, su luk inan pupuKu mudeng, pad déi' na laled, pad muyuh kali' Ui ini Tuhan luk ngakem bang bawang ini.

²³ Idi Ui ngatad pupuKu ratnan pupumu. Idi tanu' ini miak mangun nebpa.’ ”

²⁴ Idi Tuhan nenganau' kudeng ineh. Idi laled nacing pelaba ula' bang ruma' raca', idi ruma' tarehneh, idi aput bawang Masir, pad bawang ineh nedereh ngaceku laled ineh.

²⁵ Idi raca' nenawar ni Musa idi Arun, kebalaneh, “Amé' muyuh. Nguit luk barén kuan Allah muyuh bang bawang ini.”

²⁶ Idi kebala Musa, “Na kai miak nganau' kudeng ineh, ngaceku pung luk kereten kai kuan Tuhan Allah kai luk ku ali' lun Masir. Kudeng kai maré luk ku ali' lun Masir su sirendeh, kali' rungen ideh mitung nekai ku batu.

²⁷ Do' kai amé' déi' su luk ali-ali, tap delanin teluh aco, pad kai miak maré luk barén kuan Tuhan Allah kai maya' kudeng luk icukNeh nekai.”

²⁸ Idi kebala raca', “Ui nima' nemuyuh nalan pad nguit luk barén kuan Tuhan Allah muyuh déi' su luk ali-ali. Iamo' aleg muyuh nalan mado. Do' muyuh sembayang kuanku.”

²⁹ Idi kebala Musa, “Kareb ui pangeh neburo rat pa kiungmu idi ui miak sembayang mutuh inan Tuhan, pad laled ini buro rat namu, ratnan tarehmu, idi anak itinmu. Iamo' aleg iko mebalih teh, pad iko na nima' pupu ini nalan amé' sembayang inan Tuhan.”

³⁰ Idi Musa neburo rat pa kiung raca', idi ieh nesembayang inan Tuhan.

³¹ Idi Tuhan nenganau' maya' kudeng luk pinutuh Musa. Idi laled ineh neburo rat ni raca', idi amung tarehneh, idi amung anak itinneh. Sebuleng pana' nateh luk neketecan.

³² Iamo' sekua' ini pana' idi niat raca' metueh teh, pad ieh na nima' pupu ineh nalan.