PURA' 6 - BALA LUK DO'

¹ Kebala Tuhan ni Musa, “Nekini miak iko nier luk ruenKu kuan raca'. Dengan tueh laludKu Ui miak ngecuk raca' ngusu nedeh rat bawangneh.”

Musa Tinawar Sekedueh Kua'

² Idi kebala Allah ni Musa, “Ui ini Tuhan.

³ Ui nesilagan ni Ibrahim, Isak, idi Yakub, mepad kudeng Allah luk Melalud. Iamo' na diteluh kali' ngadanKu ineh Tuhan.

⁴ Iamo' Ui nengeletep jani'Ku nedeh, idi Ui maré kuandeh bawang Kanaan, ieh ineh tana' luk inandeh tudo mepad kudeng sakai.

⁵ Idi nekini pangeh Ui neninger arod lun Israil luk tiban lun Masir. Idi Ui ngerawé pejani'Ku.

⁶ Ngaceku ineh, mada' nelun Israil, ‘Ui ini Tuhan. Idi Ui sikal nguit nemuyuh remuat ratnan dereh lun Masir. Idi Ui miak muit nemuyuh ratnan tabandeh ineh. Idi Ui miak ngukum nedeh dengan lalud ticu'Ku ku dereh luk meluun rayeh, pad muyuh mepuit.

⁷ Ui miak ngiding nemuyuh mangun ku pupuKu. Ui mangun ku Allah kuan muyuh, pad muyuh kali' Ui ini Tuhan Allah muyuh luk nemuit nemuyuh ratnan kekamen luk sinaad lun Masir.

⁸ Ui nguit nemuyuh amé' bang bawang luk pijani'Ku kuan Ibrahim, Isak, idi Yakub. Idi Ui maré ineh kuan muyuh inan muyuh tebawang. Ui ini Tuhan.’ ”

⁹ Idi Musa nengacing bala ineh nelun Israil. Iamo' na ideh neninger balaneh, ngaceku ideh mesusa' niat ku ideh tiban.

¹⁰ Idi kebala Tuhan ni Musa,

¹¹ “Amé' iko idi ngecuk raca' Masir ineh maré nelun Israil remuat rat bang bawang Masir.”

¹² Iamo' kebala Musa nan Tuhan, “Lun Israil pana' na ninger balaku. Meluun teh raca' na ninger. Ui selemulun luk meteh buri!”

¹³ Idi kebala Tuhan ni Musa, “Mada' nelun Israil idi raca' Masir kudeng ini: Ui luk nengecuk namu nguit nelun Israil remuat rat bang bawang Masir.”

Tepun Idi Inul Musa Didueh Arun

¹⁴ Rubin anak Israil luk atun, inan apat anak deléi: Enok, Palu, Hesron, idi Karmi. Amungdeh ineh tepun pupu luk titen ku ngadandeh.

¹⁵ Simion inan anem anak deléi: Yemuil, Yamin, Ohad, Yakin, Sohar, idi Saul, anak seburur decur Kanaani. Amungdeh ineh tepun pupu luk titen ku ngadandeh.

¹⁶ Liwi inan teluh anak deléi: Gerson, Kohat, idi Merari. Amungdeh ineh tepun pupu luk titen ku ngadandeh. Idi ulun Liwi 137 lak.

¹⁷ Gerson inan dueh anak deléi: Libni idi Simi. Idi ideh mula' inul.

¹⁸ Kohat inan apat anak deléi: Amram, Isar, Hebron, idi Usil. Idi ulun Kohat 133 lak.

¹⁹ Merari inan dueh anak: Mali idi Musi. Amungdeh ini pupu Liwi dengan inuldeh.

²⁰ Idi Amram nengaweh ni Yokebed tinan pinakenneh. Idi anakneh Arun idi Musa. Idi ulun Amram 137 lak.

²¹ Yisar inan teluh anak deléi: Kora, Nepig, idi Sikri.

²² Usil inan teluh anak deléi: Misail, Absapan, idi Sitri.

²³ Arun nengaweh ni Elisiba Aminadab, kinanak Nason. Idi anakneh neneh Nadab, Abihu, Eliasar, idi Itamar.

²⁴ Kora inan teluh anak deléi: Asir, Elkana, idi Abiasap. Amungdeh ini tepun tuda'-tuda' babpat inul Kora.

²⁵ Eliasar, anak Arun ineh nengaweh aceh anak decur Putil. Idi anakneh neneh Pinihas. Idi amung ini lun rayeh tetek ruma' idi inul pupu Liwi.

²⁶ Ini Arun idi Musa luk inan Tuhan Allah nepebala, “Nguit nelun Israil remuat rat bang bawang Masir, maya' ruyuddeh.”

²⁷ Musa idi Arun ineh luk nengecuk raca' Masir muit nelun Israil ineh.

Ukum Tuhan Kuan Musa Idi Arun

²⁸ Kareb Tuhan nepebala ni Musa déi' bawang Masir,

²⁹ kebalaNeh, “Ui ini Tuhan. Do' mada' raca' Masir amung bala luk bilaKu namu ineh.”

³⁰ Idi kebala Musa, “Iko kali' ui ini selemulun luk meteh buri'. Kudeng apehké raca' ninger balaku?”