PURA' 5 - BALA LUK DO'

Musa Idi Arun Pa Kiung Raca' Masir

¹ Pangeh ineh Musa idi Arun iné' papu' Raca' Masir, idi kebala didueh neneh, “Kudeng ini bala Tuhan Allah lun Israil. ‘Nima' pupuKu ini nalan pad ideh ngeletep aceh aco rayeh kuanKu déi' su luk ali-ali.’ ”

² Iamo' kebala raca', “Idé-ké Tuhan luk miak bénku bala, pad ui nima' nelun Israil ineh nalan? Na ui kali' Tuhan ineh, idi na ui maré lun Israil nalan.”

³ Idi kebala didueh, “Allah lun Iberani pangeh nesilagan nekai. Do' nima' nekai nalan tap delanin teluh aco déi' su luk ali-ali, pad kai maré luk barén kuan Tuhan Allah kai, pelé Ieh na ngacing ét idi bunu' kuan kai.”

⁴ Idi kebala raca' nedidueh, “O Musa idi Arun, ngudeh medueh ngesabeng kekamen pupu ini? Ngecuk nedeh lemubed ngakem teh!”

⁵ Idi teh kebala raca', “Pupu ini pelaba ula' bang bawang ini. Idi nekini muyuh pian ugka' ratnan kekamen muyuh!”

⁶ Idi kareb aco sineh teh raca' nengecuk nelun rayeh idi lun luk ngimet kekamen pupu ineh, kebalaneh,

⁷ “Aleg maré uduh luk tekering peh, ku nganau' batu bata pinudut ratnan tana' salit kudeng luk atun. Nima' nedeh nakap kuandeh sebuleng.

⁸ Maré kekamen kuandeh mepad kinula' batu bata luk kikemdeh atun. Aleg ngurang kuandeh, ngaceku ideh mekupé. Idi ideh nengarod, ‘Muit nekai idi kai amé' maré luk barén nan Allah kai.’

⁹ Maré kekamen luk meluun berat, pad ideh na ninger bala luk mo'-mo'.”

¹⁰ Idi lun luk icuk ngatur kekamen demulun, idi lun luk ngimet kekamen lun Israil neremuat idi nepebala nelun mula', “Kebala raca', ‘Na ui miak maré uduh luk tekering nemuyuh.

¹¹ Muyuh sebuleng amé' nakap su apeh luk inan muyuh miak ngalap. Iamo' kekamen muyuh na miak uen ngurang.’ ”

¹² Idi pupu ineh nurap-nurap maput bawang Masir nakap uduh luk tekering.

¹³ Idi lun luk icuk ineh mesaad ngecuk nedeh, pad ideh nganau' batu bata mepad kinula' kudeng luk pekalai anid-anid aco kareb inan uduh tekering teh.

¹⁴ Idi amung lun luk ngimet kekamen lun Israil luk kinikit ku kekamen ineh dicatdeh, kebaladeh, “Ngudeh muyuh na nemangeh babpat muyuh nganau' batu bata aco sini mepad kudeng luk atun?”

¹⁵ Idi amung lun luk ngimet kekamen lun Israil iné' papu' raca' dengan megateh niat, kebaladeh, “Anun punneh iko ngedereh nekai,

¹⁶ idi na nemaré uduh luk tekering kuan kai? Iamo' ideh ngecuk nekai nganau' batu bata ineh! Kai dicat. Iamo' iko luk sala'.”

¹⁷ Idi kebala raca', “Mekupé muyuh ini, mekupé tu-tu! Ini punneh muyuh pebala, ‘Amé' kai maré luk barén inan Tuhan.’

¹⁸ Iamo' nekini amé' muyuh ngakem! Uduh luk tekering na miak barén nemuyuh. Iamo' do' muyuh nganau' batu bata mepad ula' kudeng luk icuk!”

¹⁹ Idi lun luk ngimet kekamen lun Israil kali' susa' idi dat ngaceku bala raca' nedeh ineh, ratnan na ngurang kinula' batu bata ineh anid-anid aco, iamo' nganau' mepad kudeng luk atun.

²⁰ Kareb ideh nenalan, idi ideh nepapu' ni Musa idi Arun luk nganét nedeh.

²¹ Idi kebala lun luk ngimet kekamen lun Israil nedidueh, “Tuhan kali' nemedueh idi ngukum nemedueh ngaceku medueh nengedat ngadan kai pa kiung raca' idi pa kiung lun rayehneh. Medueh pangeh nemaré aceh pelapet bang paladdeh, pad ideh ngaté nekai.”

Musa Sembayang

²² Idi Musa nenawar Tuhan teh, kesembayangneh, “O Tuhan, ngudeh Iko ngedereh pupuMu ini? Anun punneh Tuhan ngecuk negku amé' tungé'?

²³ Rat kareb ui nepapu' raca' idi ngacing balaMu neneh, megéi' ieh ngedereh nedeh. Iamo' na tu Iko nengedengan nedeh.”