PURA' 4 - BALA LUK DO'

Allah Maré Lalud Ni Musa

¹ Idi kebala Musa, “Iamo' kudeng lun Israil na manu negku, idi na ninger balaku, anunké luk ruenku, kudeng ideh pebala, ‘Na Tuhan nesilagan namu'?”

² Idi kebala Tuhan ni Musa, “Anunké luk bang paladmu?” Idi kebala Musa, “Rukud.”

³ Idi kebala Tuhan neneh, “Patuh ieh luun tana'.” Idi ieh nemepet ineh luun tana'. Petacu ieh nisu' ku menipeh. Idi Musa neburo rat ieneh.

⁴ Idi kebala Tuhan ni Musa, “Ngimet iurneh.” Idi Musa nengimet iurneh, idi ieh nisu' ku rukud baruh peh.

⁵ Idi kebala Tuhan, “Nganau' kudeng ini pad ideh manu Tuhan pangeh nesilagan namu, ieh ineh Allah tepundeh, Ibrahim, Isak, idi Yakub.”

⁶ Idi teh kebala Tuhan ni Musa, “Nuet ticu'mu pa liang kuyu'mu.” Idi ieh nenganau' kudeng ineh. Pangeh ineh ieh nenginat ticu'neh. Idi ticu'neh nekaneh ku ét susud idi mebuda' mepad kudeng salju.

⁷ Idi kebala Tuhan neneh, “Nuet ticu'mu pa liang kuyu'mu teh.” Idi ieh nenganau' kudeng ineh teh. Idi ieh nenginat neneh, idi ticu'neh mepad kudeng ayuneh luk atun.

⁸ Idi kebala Tuhan, “Kudeng ideh na manu namu idi na merapet ku tanu' seluk pun ineh, idi ideh miak manu ku tanu' luk muci.

⁹ Idi kudeng ideh na manu ku tanu' luk dueh ini idi na ninger balamu, do' iko ngalap abpa' rat Abpa' Nil idi tangenmu ieh luun tana'. Idi abpa' ineh miak misu' ku dara'.”

¹⁰ Idi kebala Musa, “Mutuh do' Tuhan, ui ini lemulun luk na mileh pebala rat mon idi macing nekini. Kareb Tuhan pebala negku pana' meteh teh balaku.”

¹¹ Idi kebala Tuhan neneh, “Idéké luk nenganau' tang lemulun? Idéké luk nenganau' lun mebegkeh idi mebengel, nganau' lemulun nier idi mebuser? Ieh ineh Ui ini Tuhan.

¹² Idi nekini do' iko amé'. Ui miak nengan tangmu, idi Ui mada' namu ratnan luk belénmu.”

¹³ Idi kebala Musa, “Mutuh do' Tuhan, ngecuk nelun baken.”

¹⁴ Idi Tuhan museh ni Musa, kebalaNeh, “Kudeng apeh kinanakmu Arun lun Liwi ineh? Ui kali' neneh mileh pebala. Idi nekini ieh amé' papu' namu. Kareb ieh nier namu, kali' rungen ieh mawang niat.

¹⁵ Iko miak mada' neneh ratnan luk belénneh nedeh. Idi Ui miak ngedengan nemedueh kareb medueh pebala, idi mada' nemedueh anun luk ruen medueh.

¹⁶ Idi ieh miak pebala inan pupu ineh ku libalmu. Idi teh ieh mangun ku libal tangmu, idi iko mangun ku aceh bala Allah kuanneh.

¹⁷ Ngalap rukud ini bang paladmu, ngaceku ratnan ini iko miak nganau' tuda'-tuda' tanu'.”

Musa Lemubed Amé' Bawang Masir

¹⁸ Idi Musa nelemubed iné' nan ibanneh Yitro, kebalaneh, “Nima' negku lemubed amé' inan kinanakku luk déi' Masir, ku idi teh ideh mulun.” Idi kebala Yitro ni Musa, “Mesaget iko amé'.”

¹⁹ Idi kebala Tuhan ni Musa, kareb ieh idi déi' Midian, “Muli' iko amé' bawang Masir. Amung lemulun luk pian ngaté namu ineh pangeh naté.”

²⁰ Idi Musa nengalap awan idi anak-anakneh, idi nenguit nedeh maya' keladai idi nuli' iné' bawang Masir. Idi rukud Allah ineh inuitneh.

²¹ Idi kebala Tuhan ni Musa, “Kareb iko lemubed amé' bawang Masir, do' iko nganau' tanu' luk pangeh biréKu namu pa kiung raca'. Iamo' Ui ngetueh niatneh pad ieh na maré pupu ini nalan.

²² Do' iko pebala ni raca', ‘Kudeng ini bala Tuhan, Israil, ieh ineh anakKu seluk rayeh.

²³ Idi Ui pebala namu, nima' anakKu ineh nalan, pad ieh miak sembayang Negku. Iamo' kudeng iko na nima' neneh nalan Ui miak ngaté anakmu luk rayeh.’ ”

²⁴ Idi tangal dalan su luk inan nelupo, idi Tuhan nesilagan ni Musa ayuneh sikal ngaté neneh.

²⁵ Idi Sipora nengalap aceh iyu batu idi ieh nenunat anakneh luk deléi, idi nemepet kubilneh luun kukud Musa, kebalaneh, “Iko nepaweh negku ratnan dara' ineh.”

²⁶ Sipora nepebala kudeng ineh ngaceku sunat ineh. Idi Tuhan nenima' Musa mulun.

²⁷ Idi kebala Tuhan ni Arun, “Amé' iko ni Musa déi' su luk ali-ali.” Idi ieh iné' neneh déi' luun pegkung Allah, idi ieh nemuen neneh.

²⁸ Idi Musa nemada' ni Arun ratnan amung bala Tuhan neneh, idi amung tanu' luk bida'Neh neneh luk miak ruen.

²⁹ Musa idi Arun iné' Masir, idi nengamung lun rayeh-rayeh Israil.

³⁰ Idi Arun nemada' bala luk bila Allah ni Musa. Idi Musa nenganau' tanu'-tanu' pa kiung pupu ineh.

³¹ Idi ideh manu kareb ideh neninger Tuhan pangeh méi' kuan lun Israil idi nenier derehdeh, pad ideh netekeradung idi sembayang Neneh.