PURA' 39 - BALA LUK DO'

Ratnan Nganau' Ayung Imam

¹ Idi ideh nenganau' amung ayung imam luk ngakem Su luk Meligan ineh, ratnan kibung bata' melaco, sia' merirem, idi sia melidang, luk inau' ratnan buluh dumba. Idi ideh nenganau' ayung imam kuan Arun maya' kudeng luk bila Tuhan ni Musa.

² Idi ideh nenganau' kuyu' imam ineh ratnan kibung pu luk inuper, amas, idi kibung luk bata' melaco, sia' merirem, idi sia' melidang, luk inau' ratnan buluh dumba.

³ Idi ideh nenuno amas ineh tebalad idi melipi, idi nemuting ineh mangun ku lawet rireng nan arang kibung luk bata' melaco, sia' merirem, idi sia' melidang, idi arang kibung pu mangun ku aceh tebaruh luk do' ayu.

⁴ Idi ideh nenganau' luun kuyu' imam ineh lalid tudung luk inabet, idi ieh ineh rinabar pekop papedneh.

⁵ Ide abet awa' kuyu' imam ineh, inau' do'-do', idi pekatu dengan ineh, ieh ineh ratnan amas, kibung luk bata' melaco, sia' merirem, sia' melidang, idi kibung pu luk inuper, maya' kudeng luk bila Tuhan ni Musa.

⁶ Idi ideh nengelilid bau burur ku amas idi nengayud ngadan anak-anak Yakub mepad kudeng etu.

⁷ Idi ideh nengerareng mop lalid tudung kuyu' imam ineh, mangun ku terawé ratnan pulu' dueh pupu lun Israil, maya' kudeng luk bila Tuhan ni Musa.

Ratnan Nganau' Kakeb Ruuk

⁸ Idi ideh nenganau' kakeb ruuk ineh ratnan kibung luk mepad kudeng ayu kuyu' imam luk tibaruh.

⁹ Idi ieh apat lebping idi ieh lipi' dueh, kikadangneh murek, pipangneh pana' murek.

¹⁰ Idi rirengdeh apat baris batu luk meraga. Luk pun-pun sengilung batu luk sia' merirem, sengilung batu luk mebirar, idi sengilung batu luk mesia'.

¹¹ Idi luk kedueh, sengilung batu luk bata' uduh, sengilung batu luk bata' langit, idi sengilung batu intan.

¹² Idi luk keteluh, sengilung batu luk mebata', sengilung batu luk sia' merirem, idi sengilung batu luk merirem.

¹³ Idi luk keapat, sengilung batu luk bata' uduh, idi sengilung bau burur, idi sengilung batu mebirar. Idi amung batu ini ilub ku amas.

¹⁴ Idi anid batu ini inan ngadan sebuleng anak Yakub, ku ngegala' ngadan pulu' dueh pupu Israil.

¹⁵ Idi ideh nenganau' luun kakeb ruuk ineh ratai-ratai ratnan amas luk do' luk inuper.

¹⁶ Idi ideh nenganau' dueh luk ku ngalub ratnan amas idi dueh kelabung amas, idi dueh kelabung ineh inau' pekop lidung kakeb ruuk ineh.

¹⁷ Idi ideh nenutum dueh ratai ineh nan dueh kelabung pekop iring kakeb ruuk ineh.

¹⁸ Idi ideh nenutum paped abet dueh ratai ineh nan lalid tudung kuyu' imam pa atun.

¹⁹ Idi ideh nenganau' dueh kelabung amas idi rireng pekop paped kakeb ruuk, luun iring luk pa selipa kuyu' imam ineh.

²⁰ Idi teh ideh nenganau' dueh kelabung amas idi nenganau' ineh pa liang pekop lalid tudung kuyu' imam, idi muneng ku tutum idi pa luun abet awa' kuyu' imam, luk inuper do'-do'.

²¹ Idi ideh nengabet kelabung kakeb ruuk nan kelabung kuyu' imam, ku abet luk bata' melaco, idi kakeb ruuk ineh na miak patad ratnan abet awa' kuyu' imam, maya' kudeng luk bila Tuhan ni Musa.

Ratnan Nganau' Ayung Luk Baken Kuan Imam

²² Idi ideh nenganau' kuyu' buyor imam ratnan buluh dumba luk bata' melaco amung.

²³ Idi ayud dier kuyu' ineh peringuned, idi binuun iring ku kibung luk tibaruh, pad ieh na medarak.

^24-26 Idi ideh nenganau' luun lepi'neh ayu bua' delima ratnan kibung pu luk inuper idi kibung luk inau' ratnan buluh dumba luk bata' melaco, sia' merirem, idi sia' melidang, dengan karing-karing amas arangdeh, maya' kudeng luk icuk Tuhan ni Musa.

²⁷ Idi ideh nenganau' kuyu' kuan Arun idi anak-anakneh,

²⁸ idi teh sigar idi aduk ku abet uluh, idi siduar kamu' ratnan kibung pu luk inuper,

²⁹ idi abet awa' ratnan kibung pu luk inuper luk bata' melaco, sia' merirem, idi sia' melidang, idi tibaruh, maya' kudeng luk bila Tuhan ni Musa.

³⁰ Idi ideh nenganau' balad amas luk meligan ratnan amas luk do' luk inarit, “Linigan Kuan Tuhan.”

³¹ Idi ideh nengabet ineh pa atun sigar ineh ku aceh abet luk bata' melaco, maya' kudeng luk bila Tuhan ni Musa.

Ideh Nemangeh Amung Kekamen

³² Idi ideh nemangeh amung kekamen mudut Lepo su luk inan papu' Tuhan. Idi lun Israil nenganau' ineh, maya' kudeng luk bila Tuhan ni Musa.

³³ Idi ideh nenguit Lepo ineh iné' ni Musa dengan amung repapehneh, oodneh, idi amung kayuh tulangneh, atangneh, dirineh, idi amung alen,

³⁴ idi teh papen luk ratnan kubil dumba deléi luk inau' mesia', idi papen luk ratnan kubil luk do', idi kibung dicing teh;

³⁵ Pati' Pejani' perapu kayuh birirneh, idi kakeb su luk inan pedo',

³⁶ méja ineh perapu amung repapehneh, ruti luk barén kuan Tuhan,

³⁷ idi kukud dawan amas luk do' perapu amung lapungneh, idi amung repapehneh dengan umau lapung ineh,

³⁸ bubpun amas, umau luk ku ngumau, idi luk sabpen luk do' buen, idi kibung dicing tanga' Lepo,

³⁹ bubpun tekaling perapu teripin tekaling dengan kayuh birir idi amung repapehneh, bigan luk inan sibaru' idi kukudneh,

⁴⁰ amung kibung dicing natad ineh perapu amung dirineh idi alenneh, idi dicing tanga' natad, idi abetneh, papekneh, idi amung repapeh Lepo su luk inan papu' Tuhan,

⁴¹ idi amung ayung imam luk pelaba do' kuan Su luk Meligan ineh, ieh ineh amung ayung luk meligan kuan Arun imam ineh idi kuan anak-anakneh.

⁴² Lun Israil nenganau' ineh maya' kudeng amung luk bida' Tuhan ni Musa.

⁴³ Musa nenier amung kekamen ineh, idi amung ineh pangeh inau'deh maya' kudeng amung luk bila Tuhan. Idi Musa nengeperuan nedeh.