PURA' 38 - BALA LUK DO'

Ratnan Nganau' Bubpun Inan Ngeseb Baré

¹ Idi ieh nenganau' bubpun luk apat lebping ratnan kayuh pirur, limeh sikuh kadangneh, idi limeh sikuh pipangneh, idi teh teluh sikuh dita'neh.

² Idi ieh nenganau' unga anid lidungneh. Idi unga ineh mulang rat su ineh. Idi ieh nengakep amung ineh ku tekaling.

³ Idi teh ieh nenganau' amung repapeh bubpun ineh: belanga' inan ngerareng abuh, idi luk ku ngook abuh, bigan, serupang, idi su luk inan bareh. Amung repapeh ineh inau' ratnan tekaling.

⁴ Idi ieh nenganau' aceh teripin tekaling, idi ieh nenganau' ineh pa liang iring bubpun pad macing tangalneh.

⁵ Idi ieh nengurai apat kelabung tekaling anid lidung.

⁶ Idi ieh nenganau' kayuh pirur ku mirir bubpun ineh, kikepneh ku tekaling.

⁷ Idi ieh nenuet kayuh birir ineh bang kelabung ineh pekop iring bubpun ineh pad ieh miak uen mirir. Idi ieh nenganau' ineh melubang, ratnan bangar.

Ratnan Nganau' Bigan Tekaling

⁸ Idi ieh nenganau' aceh bigan ratnan tekaling, idi kukudneh pana' tekaling, ratnan amung sayun tekaling luk inuit decur luk mula' luk ngakem iring tanga' Lepo su luk inan papu' Tuhan.

Natad Lepo Su Luk Inan Papu' Tuhan

⁹ Idi ieh nenganau' natad Lepo su luk inan papu' Tuhan, idi ngalad ineh ku dicing ratnan kibung pu luk inuper. Kikadang dicing luk pa kabing busat aco, dueh ngepulu' limeh depeh.

¹⁰ Idi dueh ngepulu' diri ineh perapu alenneh ratnan tekaling, iamo' amung ood idi repit diri ineh inau' ratnan pirak.

¹¹ Kudeng ineh teh pa tinueh busat aco.

¹² Kikadang dicing luk pa acep aco pulu' dueh depeh setangal, dengan pulu' diri idi pulu' alen. Idi amung ood diri ineh idi amung repit diri ineh inau' ratnan pirak.

¹³ Kudeng ineh teh pipang pa atun natad pa busat aco ineh pulu' dueh depeh setangal.

^14-15 Pekop munung tanga' inan teluh depeh teluh sikuh dicing dengan teluh diri idi teluh alen.

¹⁶ Idi amung kibung dicing natad ineh ratnan kibung pu luk inuper.

¹⁷ Idi amung alen diri ineh ratnan tekaling, idi ood, idi repitdeh pana' pirak, idi paped diri ineh kikep ku pirak. Idi amung diri pekelibut ineh su tutumneh inan bakar pirak.

¹⁸ Idi tanga' natad ineh inan aceh dicing, ratnan kibung pu luk inuper, ayuneh bata' melaco, sia' merirem, idi sia' melidang luk tibaruh, kikadangneh limeh depeh, idi kidita'neh medepeh semikuh mepad kudeng dicing natad ineh.

¹⁹ Idi inan apat diri, idi apat alen ratnan tekaling, idi ooddeh ratnan pirak, papeddeh kikep ku pirak, kudeng ineh teh su tutumdeh bakar pirak.

²⁰ Idi amung papek Lepo su luk inan papu' Tuhan idi natad pana' ratnan tekaling.

Repapeh Lepo Su Luk Inan Papu' Tuhan

²¹ Idi ini amung repapeh Lepo su luk inan papu' Tuhan, ieh ineh Lepo su luk inan Pati' Pejani', luk iniap maya' ecuk Musa — kekamen lun Liwi pa liang ukum Itamar anak Arun luk imam.

²² Idi Besalel Uri ratnan inul Hur, luk pupu Yahuda nenganau' amung luk pangeh bila Tuhan ni Musa.

²³ Idi lun denganneh ineh Aholiab Ahisamak ratnan inul Dan, lun luk mileh ngarit idi nganau' luk do' ayu, idi mileh ngebaruh kibung luk bata' melaco, sia' merirem, idi sia' melidang, idi kibung pu teh.

²⁴ Kinula' amas luk linigan kuan Tuhan ku mudut Su luk Meligan, ieh ineh 16,150 kati maya' luk litep.

²⁵ Idi kinula' pirak luk biré lun bang tebubpun ineh, ieh ineh 5,660 kati maya' luk litep.

²⁶ Anid-anid burur luk ulunneh mela dueh ngepulu' lak nemaré maya' kinula' luk litep, ieh ineh 603,550 burur amungdeh.

²⁷ Idi 5,600 kati pirak inurai ku meratu alen Su luk Meligan idi alen dicing teh, 5,600 kati, ieh ineh aceh alen 56 kati.

²⁸ Idi ratnan 38 kati pirak luk ketecan ineh inau'neh ku amung ood nan anid-anid diri ineh. Idi ieh nengakep amung paped diri ku ineh, idi ieh nenganau' ineh su anid tutumneh teh.

²⁹ Idi kinula' tekaling luk biré ineh 3,980 kati.

³⁰ Ratnan ineh ieh nenganau' amung alen tanga' Lepo su luk inan papu' Tuhan, bubpun tekaling, teripin tekaling luk luun ineh, amung repapeh bubpun ineh,

³¹ amung alen dicing natad luk pekelibut, amung alen tanga' natad ineh, amung papek Lepo su luk inan papu' Tuhan, idi amung papek natad pekelibut.