PURA' 36 - BALA LUK DO'

¹ “Do' Besalel, Aholiab idi amung lun luk mileh luk nepimaran Tuhan ileh pad nganau' amung kekamen luk do' ayu bang Su luk Meligan ineh, ngimun ngakem maya' amung luk icuk Tuhan.”

Lun Israil Nguit Mula' Luk Barén

² Musa nenawar ni Besalel, Aholiab, idi amung lun luk mileh luk nepimaran Tuhan ileh, idi amung lun luk nesigio niat, pad ideh amé' nganau' kekamen ineh.

³ Idi ideh nengalap rat ni Musa amung baré luk biré lun Israil ku mudut Su luk Meligan. Iamo' lun Israil nateh nugka' maré baré ni Musa anid-anid pekak.

⁴ Idi nacing amung lun luk mileh luk nganau' kekamen ineh,

⁵ idi kebaladeh ni Musa, “Lun ini pelaba ula' uit, mela ratnan luk icuk Tuhan.”

⁶ Idi Musa nengecuk nelun mula' ineh ugka' maré baré kuan Su luk Meligan ineh. Idi ideh nugka' maré.

⁷ Ngaceku petap repapeh kuan amung kekamen ineh. Inan teh elaneh.

Ideh Nganau' Lepo Su Luk Inan Papu' Tuhan

⁸ Idi amung lun luk mileh ineh nenganau' Lepo su luk inan papu' Tuhan ratnan pulu' pekatu kibung bata' melaco, ratnan pu luk inuper, idi ratnan kibung luk bata' melaco, sia' merirem, idi sia' melidang, luk tibaruh ku melaikat karub.

⁹ Idi kikadang sepekatu kibung ineh tudu' depeh, idi pipangneh medepeh. Amung kibung ineh mepad tari.

¹⁰ Ideh nenutum limeh pekatu kibung. Kudeng ineh teh limeh pekatu kibung luk baken.

¹¹ Idi ideh nenganau' tuda'-tuda' lalid kibung luk bata' melaco iring sebuleng kibung luk limeh tutum ineh. Idi ideh nenganau' kudeng ineh teh luun iring kibung luk limeh tutum ineh teh.

¹² Idi ideh nenganau' limeh ngepulu' lalid paped sepekatu kibung luk limeh tutum ineh teh, idi teh limeh ngepulu' lalid paped sepekatu kibung luk baken luk limeh tutum ineh.

¹³ Idi ideh nenganau' limeh ngepulu' ood ratnan amas ku nutum dueh pekatu kibung ineh pad ineh mangun ku Lepo su luk inan papu' Tuhan.

¹⁴ Idi ideh nenganau' ducungneh ratnan pulu' aceh pekatu kibung luk inau' ratnan buluh amék.

¹⁵ Idi amung ineh mepad kirayeh, ieh ineh, tudu' depeh setangal kikadangneh, idi bétneh medepeh.

¹⁶ Idi ideh nenutum limeh pekatu kibung ineh. Kudeng ineh teh anem pekatu kibung luk baken.

¹⁷ Idi ideh nenganau' limeh ngepulu' lalid paped sepekatu kibung, idi teh limeh ngepulu' lalid paped sepekatu kibung luk baken ineh teh.

¹⁸ Idi ideh nenganau' limeh ngepulu' ood tekaling ku nutum ineh mangun ku sebuleng papen.

¹⁹ Idi ideh nenganau' dueh papen Lepo ineh teh, sebuleng ratnan kubil dumba deléi luk inau' mesia', idi sebuleng ratnan kubil luk do', ku papen luk pa luun.

²⁰ Idi ideh nenganau' tuda'-tuda' kayuh ku tulang ratnan kayuh pirur kuan Lepo ineh.

²¹ Kikadang sepekatu kayuh ineh dueh depeh setangal, idi pipangneh semikuh setangal.

²² Idi anid-anid kayuh ineh tinap, pad ideh miak petutum.

²³ Idi ideh nenganau' dueh ngepulu' kayuh ku tulang kuan iring pa kabing busat aco,

²⁴ idi apat ngepulu' alen pirak pa liangdeh, dueh alen nan sepekatu kayuh.

²⁵ Ideh nenganau' dueh ngepulu' kayuh ku tulang pa tinueh busat aco,

²⁶ dengan apat ngepulu' alen pirak dueh alen pa liang sepekatu kayuh.

²⁷ Idi iring pa keted, ieh ineh pa acep aco, ideh nenganau' anem pekatu kayuh ku tulang,

²⁸ idi dueh kayuh anid lidung.

²⁹ Idi dueh kayuh luk ku lidung ineh, tinutum rat pa beneh macing pa luun. Idi kayuh luk ku dueh lidung ineh inau' kudeng ineh teh.

³⁰ Idi kayuh tulang ineh ualuh pekatu dengan pulu' anem alen pirak, dueh pa beneh anid-anid kayuh ineh.

³¹ Idi ideh nenganau' pulu' limeh atang ratnan kayuh pirur, limeh pekatu kuan Lepo ineh,

³² idi limeh pekatu kuan selipa, idi limeh pekatu kuan iring pa keted luk pa acep aco.

³³ Idi atang luk nan uned ineh macing nan amung kayuh ineh rat paped selipa suet paped selipa.

³⁴ Idi amung kayuh ineh kikepdeh ku amas. Idi ideh nenganau' amung kelabung su atang ineh pana' ratnan amas, idi atang ineh pana' kikepdeh ku amas.

³⁵ Idi ideh nenganau' aceh dicing ratnan kibung pu luk do' idi luk inuper, idi luk ayu bata' melaco, sia' merirem, idi sia' melidang, tibaruh do'-do' ku melaikat karub.

³⁶ Idi ideh nenganau' apat diri ratnan kayuh pirur luk kikepdeh ku amas. Ood-ooddeh pana' ratnan amas. Idi ideh nengurai apat alen ratnan pirak.

³⁷ Idi munung tanga' Lepo ineh ideh nenganau' aceh dicing ratnan kibung pu luk do' idi luk inuper, ayuneh bata' melaco, sia' merirem, idi sia' melidang, idi luk tibaruh do'-do'.

³⁸ Ideh nenganau' kuan dicing ineh limeh pekatu diri perapu dengan amung ooddeh. Idi ideh nengakep papeddeh idi abetdeh ku amas. Idi ideh nengurai limeh alen tekaling kuan diri ineh.