PURA' 35 - BALA LUK DO'

Ukum Ratnan Aco Luk Inan Mudeng

¹ Musa nengecuk amung lun Israil mepamung, idi kebalaneh nedeh, “Ini amung bala luk icuk Tuhan ruen muyuh.

² Anem aco muyuh miak ngakem. Iamo' aco luk ketudu' ineh meligan, ieh ineh aceh Aco luk inan Mudeng kuan Tuhan. Idé luk ngakem kareb aco sineh, ieh miak pitayen.

³ Aleg muyuh nutud apui su luk inan muyuh mudeng kareb Aco luk inan Mudeng ineh.”

Binaweh Luk Barén Kuan Tuhan

⁴ Idi Musa nepebala kuan amung lun Israil, “Ini luk bila Tuhan:

⁵ Do' muyuh maré aceh baré kuan Tuhan. Anid-anid lun luk mawang niat, miak nguit baré amas, pirak, idi tekaling,

⁶ idi kibung luk bata' melaco, sia' merirem, idi sia' melidang, kibung pu luk inuper, idi buluh amék,

⁷ idi kubil dumba deléi luk inau' mesia', kubil luk do', idi kayuh pirur;

⁸ umau lapung, umau luk do' buen ku ngumau, uar luk do' buen;

⁹ bau burur, idi batu baken luk meraga luk ku kuyu' Imam Rayeh idi kakeb ruuk.

Repapeh Lepo su Luk Inan Papu' Tuhan

¹⁰ “Idi amung tukang luk mileh arang muyuh, do' amé' idi nganau' amung luk bida' Tuhan:

¹¹ Lepo ineh, dengan papenneh, oodneh, tulangneh, atangneh, dirineh, idi amung alenneh;

¹² Pati' Pejani' dengan kayuh birirneh, kakeb su luk inan pedo', dicing luk ku alad kakeb;

¹³ méja ineh perapu dengan birirneh idi amung repapehneh, idi ruti ubur ineh;

¹⁴ kukud dawan dengan repapehneh, lapungneh, idi umau luk kuan lapung ineh;

¹⁵ méja luk inan ngeseb uar luk do' buen perapu birirneh, umau luk ku ngumau, uar luk meluun do' buen; dicing tanga' Lepo ineh;

¹⁶ bubpun luk inan ngeseb baré perapu dengan teripin tekaling, kayuh birir idi amung repapehneh, bigan luk inan sibaru' dengan kukudneh;

¹⁷ dicing natad, perapu dirineh idi alenneh, dicing tanga' natad ineh;

¹⁸ amung papek Lepo dengan abet kuan Lepo idi natadneh,

¹⁹ idi amung ayung luk do' kuan imam-imam luk ku ayungdeh bang Su luk Meligan, idi amung ayung luk meligan luk ku ayung Arun imam ineh, idi amung ayung anak-anakneh ineh.”

Lun Israil Nguit Luk BarénDeh

²⁰ Idi amung lun Israil nuli'.

²¹ Idi amung lun luk nesigio niat nenguit luk barén inan Tuhan piduten ku Lepo su luk inan papu' Tuhan. Idi teh ideh nenguit amung luk petulu kuan kekamen Tuhan idi luk ku nganau' ayung imam.

²² Idi idé-idé luk meran niat, do' deléi idi decur, nenguit gerusang, abé, susing, bané, idi ayung amas luk baken. Idi ideh nengeligan ineh kuan Tuhan.

²³ Idi anid-anid lemulun luk inan kibung luk bata' melaco, sia' merirem, idi sia' melidang, kibung pu luk inuper, idi buluh amék, idi kubil dumba deléi luk inau' mesia', idi kubil luk do', inuitdeh iné' neneh.

²⁴ Idi idé luk miak nguit aceh baré ratnan pirak idi tekaling, inuitdeh barén kuan Tuhan. Idé luk inan kayuh pirur ku ngedengan pudut ineh, inuitdeh.

²⁵ Idi amung decur luk mileh nenguit luk inuperdeh ineh, ieh ineh nuper luk bata' melaco, sia' merirem, idi sia' melidang, idi nuper pu.

²⁶ Idi teh ideh nenguper buluh amék.

²⁷ Idi lun rayeh-rayeh nenguit bau burur idi batu baken luk meraga ruen luun kuyu' imam luk meligan idi kakeb ruuk;

²⁸ idi luk do' buen, umau lapung, umau luk ku ngumau, idi umau luk ku ngeseb uar luk do' buen.

²⁹ Idi amung lun Israil luk nesigio niat nenguit barédeh kuan amung kekamen luk bida' Tuhan ni Musa.

Lun Luk Mudut Lepo Su Luk Inan Papu' Tuhan

³⁰ Kebala Musa nelun Israil, “Tuhan pangeh nemili' besalel Uri ratnan inul Hur, luk pupu Yahuda.

³¹ Ieh nemanu' neneh ku Roh Allah idi ileh luk meriput ratnan amung kekamen ticu',

³² pad nganau' arit luk do' ratnan amas, pirak, idi tekaling,

³³ idi arit batu luk meraga rangen su inanneh, idi arit kayuh, dengan amung kekamen luk kudeng ineh.

³⁴ Idi Tuhan nemaré neneh ileh mada' nelun baken, do' ieh, idi Aholiab Ahisamak ratnan inul Dan.

³⁵ Idi didueh pinu'Neh ku ileh ngakem amung kekamen lun mileh, ieh ineh, ngarit, nganau' kekamen luk do' ayu, ngebaruh kibung luk bata' melaco, sia' merirem, idi sia' melidang, idi teh nganau' nuper pu, idi teh amung kekamen luk kudeng ineh.