PURA' 34 - BALA LUK DO'

Balad Batu Luk Kedueh

¹ Kebala Tuhan ni Musa, “Ngelapag dueh balad batu baruh, mepad kudeng luk atun, idi Ui ngayud luun ineh amung bala luk luun dueh balad batu luk atun luk pangeh binila'mu.

² Do' iko temina' pekak uka-uka idi uké Pegkung Sinai, idi papu' Negku luun buduk pegkung ineh.

³ Seburur pana' nateh miak maya' namu. Idi seburur pana' nateh miak silagan luun pegkung ineh, idi na dumba idi sapi' miak nakap akan libut pegkung ineh.”

⁴ Idi Musa nengelapag dueh balad batu mepad kudeng luk atun. Idi pekak uka-uka ieh nuké Pegkung Sinai, maya' kudeng luk bila Tuhan neneh, idi ieh nenguit dueh balad batu ineh.

⁵ Idi Tuhan netemurun bang aceh laput, idi tuped pelengit neneh, idi Ieh neneten ngadanNeh sebuleng, “Tuhan.”

⁶ Idi Tuhan nenalan lemaba pa kiungneh, idi Ieh nengitang, “Ui ini Tuhan, Ieh ineh Allah, luk méi' idi mekatu, luk mekadang niat, luk meluun awa idi lutep maya' jani'.

⁷ Ei'Ku ineh lutep kuan lun ribu-ribu idi Ui maré do' ku amung kuyo, dat, idi sala', iamo' na tu-tu Ui muit lemulun ratnan ukum, iamo' ngua' kuyo amung taman inan anak idi mupun, macing ku inul luk keteluh idi luk keapat.”

⁸ Idi dengan mesaget Musa netekeradung,

⁹ kesembayangneh, “O Tuhan, kudeng Iko méi' negku, do' Iko nalan arang kai. Sagan pana' pupu ini metueh niat, iamo' maré do' ku kuyo idi sala' kai, idi ngalap nekai mangun ku pupuMu.”

Tuhan Ngelio Pejani'Neh Teh

¹⁰ Kebala Tuhan, “Ui pejani' nan amung pupu Israil, idi pa kiung muyuh Ui nganau' tuda'-tuda' tanu' luk inan mawa luk na nangun bang aput tana' idi arang pupu baken. Idi amung pupu luk libut-libut muyuh miak nier luk ruen Tuhan, ngaceku luk ruenKu kuan muyuh melalud tu-tu.

¹¹ Do' iko ngimet amung ukum luk bida'Ku namu aco sini. Ui ngusu amung lun Amori, lun Kanaani, lun Hiti, lun Prisi, lun Hiwi, idi lun Yebusi rat pa kiungmu.

¹² Aleg perurum nelun luk bang bawang luk ulek muyuh ineh, pad ideh na mangun ku aceh abpung kuanmu.

¹³ Iamo' do' ngusag amung bubpundeh, mila' amung akangdeh, idi nebpeng amung ulungdeh.

¹⁴ “Aleg iko sembayang inan allah baken, ngaceku Ui ini Tuhan luk temaruh.

¹⁵ Idi aleg iko pejani' nelun luk bang bawang ineh. Ngaceku kareb ideh sembayang idi nguit luk barén inan allahdeh, idi kali' rungen ideh nguit namu, idi iko pana' kuman luk baréndeh lek.

¹⁶ Idi kudeng anak deléimu ngaweh decur pupu ineh, kali rungen ideh nguit nedeh maya' allahdeh, pad ideh na lutep maya' Negku.

¹⁷ “Idi aleg iko nganau' kuanmu sebuleng akang luk inurai.

¹⁸ “Idi do' iko ngimet Aco Rayeh Ruti luk Na Lamud. Tudu' aco kinioneh do' iko kuman ruti luk na lamud, maya' kudeng luk bilaKu, ieh ineh bang bulan Abib. Ngaceku bang bulan ineh iko nenalan rat bawang Masir.

¹⁹ “Idi amung anak deléi lemulun idi aya' luk atun ineh Ui kuan.

²⁰ Idi do' anak keladai luk atun uen nguli' ku aceh anak dumba. Iamo' kudeng iko na nguli' ineh na miak na iko mutul dierneh. Idi do' muyuh nguli' anak deléi muyuh luk atun teh. Idi kareb ineh aleg selemulun amé' Negku dengan na nguit baré.

²¹ “Anem aco mo' kinioneh iko ngakem. Iamo' aco luk ketudu' ineh, do' iko ucu'. Do' kareb ngelusu', do' kareb ngeranih, kudeng ieh aco sineh do' ucu'.

²² “Idi teh do' iko ngimet Irau pun Ngeranih, idi teh Irau Lepo kareb ngamung bua'.

²³ “Idi teluh kua' bang selak do' amung lun deléi luk arang muyuh macing pa kiungKu, ieh ineh Tuhan, Allah lun Israil.

²⁴ Kareb Ui pangeh nengusu pupu ineh rat pa kiungmu, idi Ui miak ngerayeh bawangmu, pad seburur pana' na luk melili ku bawangmu, kareb iko amé' matun Tuhan Allahmu teluh kua' selak.

²⁵ “Idi aleg dara' baré luk kuanKu barénmu dengan aceh luk inan lamud. Idi aleg baré luk kirat kareb aco rayeh ketecan macing pekak.

²⁶ “Luk meluun do' ratnan peranih luk pun ratnan uli' tana'mu, do' itenmu amé' bang ruma' Tuhan. “Idi aleg iko nanek anak amék ku rata tinehneh.”

²⁷ Idi kebala Tuhan ni Musa, “Iuden amung bala ini, ngaceku maya' uni bala ini, Ui pejani' namu idi nelun Israil.”

²⁸ Idi Musa idi dengan Tuhan apat ngepulu' aco apat ngepulu' dacem kinioneh. Na ieh kuman. Na ieh ngirup abpa'. Idi Musa nengayud amung bala pejani' ineh, ieh ineh ukum pulu' luun balad batu ineh.

Musa Musul Rat Luun Pegkung

²⁹ Kareb Musa nusul rat luun Pegkung Sinai, ieh nengimet pulu' ukum ineh. Idi na ieh kali' kiungneh merasat kareb ieh pangeh nepegayam inan Tuhan.

³⁰ Kareb Arun idi amung lun Israil nenier ni Musa, ideh nekali' kiungneh merasat. Idi ideh matot amé' muneng neneh.

³¹ Iamo' Musa nenawar nedeh, idi Arun dengan amung lun rayeh-rayeh iné' neneh. Idi Musa nepebala nedeh.

³² Pangeh ineh amung lun Israil nepamung iné' neneh. Idi Musa nengacing amung bala luk bila Tuhan neneh déi' luun Pegkung Sinai.

³³ Kareb Musa pangeh nepebala nedeh, idi ieh nengebpu kiungneh.

³⁴ Iamo' anid kareb Musa amé' pa kiung Tuhan pian pegayam Neneh, idi ieh necan ebpu kiung ineh pad ieh remuat. Idi kareb ieh remuat, idi ieh mada' nelun Israil anun luk bila Tuhan neneh.

³⁵ Kareb lun Israil nier kiung Musa, kiungneh merasat, idi Musa ngebpu kiungneh pad ieh semuet idi pegayam inan Tuhan.