PURA' 33 - BALA LUK DO'

Lun Israil Icuk Nalan Rat Pegkung Sinai

¹ Kebala Tuhan ni Musa, “Nalan iko rat ieni, dengan pupu ineh luk pangeh inuitmu rat bawang Masir amé' bawang luk pangeh pijani'Ku ni Ibrahim, Isak, idi Yakub.

² Ui ngecuk aceh melaikat nalan pa atun muyuh, idi Ui ngusu lun Kanaani, lun Amori, lun Hiti, lun Prisi, lun Hiwi, idi lun Yebusi.

³ Muyuh amé' nan aceh tana' luk do' idi luk mebaleng. Iamo' Ui na nalan arang muyuh, pad Ui na ngaté nemuyuh arang dalan, ngaceku muyuh aceh pupu luk metueh niat.”

⁴ Kareb lun mula' neninger bala ineh, idi ideh nenacung, idi seburur pana' na miak ngayung ku amas.

⁵ Idi kebala Tuhan ni Musa, “Mada' nelun Israil, ‘Muyuh ini aceh pupu luk metueh niat. Kudeng Ui nalan arang muyuh segageh pana', kali' rungen Ui ngaté nemuyuh. Ngaceku ineh ngelengu ayung muyuh luk meraga, idi Ui miak ngerawé anun luk ruenKu nemuyuh.’ ”

⁶ Idi kareb lun Israil nenalan rat Pegkung Sinai, na ideh nengayung ku ayung amas.

Lepo Su Luk Inan Papu' Tuhan

⁷ Kareb lun Israil nelupo, idi Musa megéi' mubuh Lepo luk meligan ruen mado ratnan su luk inan lun mula' lupo. Idi ideh neneten ngadanneh Lepo su luk inan papu' Tuhan, idi idé luk pian ngitun inan Tuhan miak remuat idi amé' bang Lepo ineh.

⁸ Kareb Musa remuat amé' bang Lepo ineh, amung pupu ineh mudur idi tuped, anid munung tanga' lepodeh, idi ideh nier ni Musa pad macing ieh semuet bang ineh.

⁹ Kareb Musa nesemuet, idi diri laput temurun, idi ugka' su tanga' Lepo ineh, idi Tuhan pegayam ni Musa ieneh.

¹⁰ Idi kareb amung pupu ineh nier diri laput nugka' su Lepo ineh, idi ideh mudur idi tekeradung sembayang anid-anid munung tanga' lepodeh.

¹¹ Idi Tuhan pegayam ni Musa dengan papu' kiung, mepad kudeng selemulun pegayam nelun denganneh. Pangeh ineh idi Musa lemubed su luk inandeh nelupo. Iamo' Yusak Nun anak adi' luk ngedengan neneh, na remuat rat bang Lepo ineh.

Tuhan Pejani' Ngedengan Nelun Israil

¹² Idi kebala Musa nan Tuhan, “Iko nengecuk negku nguit pupu ini macing nan bawang ineh, iamo'na Iko nemada' negku idé luk dukenMu maya' negku, sagan pana' Iko nepebala, ‘Ui nemili' namu idi iko pangeh nengalap éi' pa kiungKu.’

¹³ Kudeng pieh kudeng ineh, mada' terawéMu negku, pad ui maya' Namu, idi megéi' nganau' luk petulu pa kiungMu. Idi ngerawé pupu ini pangeh pinili'Mu ku pupuMu.”

¹⁴ Idi kebala Tuhan, “Ui sebuleng ngedengan namu pad maré namu metueh.”

¹⁵ Idi kebala Musa Neneh, “Kudeng Iko na idi dengan kai, aleg ngecuk nekai nalan rat ieni.

¹⁶ Kudeng apehké lemulun miak kali' idi Iko méi' negku idi pupuMu ini, kudeng Iko na idi dengan kai. Kudeng Iko idi dengan kai, kali' rungen kai ini baken ratnan amung pupu luk luun tana' ini.”

¹⁷ Idi kebala Tuhan ni Musa, “Kali' rungen Ui nganau' luk pinutuhmu ineh. Ngaceku Ui miti namu, idi Ui mawang niat namu.”

¹⁸ Iamo' kebala Musa, “Do' nima' negku nier rayehMu!”

¹⁹ Iamo' kebala Tuhan, “Ui ngetacu do'Ku pa kiungmu, idi neten ngadanKu pa kiungmu, ieh ineh Tuhan. Idi Ui méi' kuan idé luk inanKu méi', idi maré katuKu kuan idé luk pimaranKu katu ineh.

²⁰ Na iko miak nier kiungKu, ngaceku na lun luk nier Negku miak mulun.

²¹ Siruh, aceh luk inan iringKu, idi ieneh iko tuped luun batu.

²² Idi kareb rayehKu lemaba Ui ngerareng namu bang arang batu ineh, idi Ui ngelinged namu ku paladKu pad Ui lemaba.

²³ Idi kareb Ui pangeh nginat ticu'Ku, idi iko miak nier ketedKu. Iamo' kiungKu na miak sirenmu.”