PURA' 32 - BALA LUK DO'

Anak Sapi' Amas

¹ Kareb lun mula' ineh nginulat ni Musa mio macing rat luun pegkung, idi ideh nepamung ni Arun, kebaladeh, “Nganau' aceh akang luk miak nguyut nekai, ngaceku na kai kali' luk mangun kuan Musa luk nenguyut nekai remuat rat bang bawang Masir.”

² Idi kebala Arun nedeh, “Neka amung abé amas luk i lalid awan muyuh idi anak muyuh luk deléi idi decur, idi nguit amé' negku.”

³ Idi lun mula' ineh neneka amung abé amas luk i laliddeh idi nenguit amé' ni Arun.

⁴ Idi ieh nengalap abé ineh rat nedeh ineh, idi ieh nengurai ineh mangun ku ayu mepad kudeng anak sapi'. Idi kebala lun mula', “O lun Israil, ini allah tau luk nenguit netau remuat rat bang bawang Masir!”

⁵ Idi Arun nenganau' aceh bubpun pa atun anak sapi' ineh, idi kebalaneh, “Pekak nebpa inan aceh irau rayeh kuan Tuhan!”

⁶ Pekak kenebpa idi ideh nekulat uka-uka, idi ideh nemaré luk sabpen idi nenguit baré luk nguit pedo' teh. Idi ideh netudo kuman idi ngirup. Pangeh ineh idi ideh marot rot luk dat.

⁷ Idi kebala Tuhan ni Musa, “Saget lemubed, ngaceku pupumu luk inuitmu rat bawang Masir, pangeh nenganau' sala' idi nengelegkan Negku.

⁸ Nekini ideh pangeh lemubed ratnan luk pangeh bilaKu nedeh. Ideh pangeh nenganau' aceh anak sapi' luk inurai idi ideh sembayang neneh, idi ideh maré luk sabpen kuanneh, kebaladeh, ‘O lun Israil, ini allah muyuh luk pangeh nenguit nemuyuh remuat rat bang bawang Masir!’ ”

⁹ Kebala Tuhan ni Musa, “Ui pangeh nekali' pupu ini pelaba tueh niat.

¹⁰ Aleg mebpeng Negku na ngacing useh nedeh, pad ngaté nedeh. Idi Ui nganau' namu mangun ku aceh pupu luk rayeh.”

¹¹ Iamo' kesembayang Musa pa kiung Tuhan Allahneh, “O Tuhan, ngudeh Iko ngacing useh kuan pupuMu luk pangeh inuitMu remuat rat bang bawang Masir dengan tueh idi laludMu?

¹² Aleg nima' nelun Masir pebala kudeng ini, ‘Dengan niat luk dat Tuhan nenated nedeh remuat, pad ideh mabud maté luun pegkung.’ Ugka' museh nedeh, idi nginuud ratnan dat luk Iko pian ngacing kuan pupuMu.

¹³ Do' ngerawé demulunMu Ibrahim, Isak, idi Yakub, luk inanMu nepejani', kebalaMu nedeh, ‘Ui ngula' inul muyuh mepad kudeng ula' gituen luk i langit, idi Ui maré tana' luk pangeh bida'Ku nemuyuh, miak mangun ku babpat muyuh ruked-ruked.’ ”

¹⁴ Idi Tuhan nenginuud ratnan dat luk Ieh pian ngacing kuandeh.

¹⁵ Idi Musa nelemubed rat luun pegkung idi nenguit dueh balad batu pejani' luk inayud pekop.

¹⁶ Idi dueh balad batu ineh, ieh ineh pudut Allah, idi Ieh Sebuleng luk nengayud luun ineh.

¹⁷ Idi Yusak neninger arod lun mula' ineh, idi kebalaneh ni Musa, “Ui ninger arod kudeng ayu lun pebunu' su luk inan nelupo.”

¹⁸ Iamo' kebala Musa, “Baken ini arod metueh, idi baken ini arod luk melaya', iamo' pedingerenku kudeng tang lemulun menani!”

¹⁹ Kareb Musa muneng nelun mula' idi ieh nenier aceh anak sapi' idi lun mula' ineh ngalai. Idi ieh megateh niat. Idi ieh nemepet dueh balad batu ineh rat bang paladneh, pad ineh nebila' luun buten irang pegkung ineh.

²⁰ Idi ieh nengalap anak sapi' luk pangeh inau'deh ineh idi isebneh luun apui. Idi ieh nengerupung neneh pad mangun ku abuh, idi ieh nengisak abuh ineh pa luun abpa', idi nengecuk lun Israil ngirup abpa' ineh.

²¹ Idi kebala Musa ni Arun, “Anun luk inau' pupu ini kuanmu, pad iko nengacing sala' luk rayeh ineh kuandeh?”

²² Iamo' kebala Arun, “Aleg iko museh negku. Iko sebuleng kali' pupu ini pian nganau' luk dat.

²³ Idi kebaladeh negku, ‘Nganau' aceh akang luk miak nguyut nekai, ngaceku na kai kali' luk pangeh mangun kuan i Musa luk pangeh nenguit nekai rat bang bawang Masir.’

²⁴ Idi ui nengecuk nedeh nguit abé amas. Idi ideh nemaré ineh negku idi ui nemepet ineh luun apui idi neremuat anak sapi' ini!”

²⁵ Idi Musa nekali' i Arun pangeh nenima' nelun mula' maya' piandeh sebuleng, pad ideh inan situnga arang amung bunu'deh.

²⁶ Idi ieh netuped munung tanga' su inandeh nelupo, idi kebalaneh, “Idé luk merapet inan Tuhan do' amé' negku!” Idi amung lun Liwi nepamung neneh.

²⁷ Idi kebala Musa nedeh, “Kudeng ini bala Tuhan Allah lun Israil, Do' anid-anid muyuh ngabin pelapet idi nalan lemaba su luk inan lupo, rat tanga' selipa macing ku tanga' luk paped selipa, idi do' muyuh ngaté kinanak muyuh, rurum muyuh, idi lun dengan muyuh.”

²⁸ Idi lun Liwi nemaya' bala ineh. Idi aco sineh ideh nengaté lélé teluh ngeribu burur deléi.

²⁹ Idi kebala Musa nelun Liwi, “Aco sini muyuh pangeh nengeletep burur muyuh mangun ku imam kuan Tuhan, idi muyuh pangeh nengaté anak muyuh luk deléi idi kinanak muyuh, pad muyuh miak ngalap peruan Tuhan aco sini.”

³⁰ Idi pekak kenebpa Musa nepebala kuan pupu ini, “Muyuh ini pangeh nenganau' sala' luk rayeh. Iamo' nekini ui mudik pegkung amé' inan Tuhan. Kian miak ui ngalap pedo' ngaceku sala' muyuh ineh lek.”

³¹ Idi Musa iné' matun Tuhan idi nepebala, “Pupu ini pangeh nenganau' aceh sala' luk rayeh, ngaceku ideh pangeh nenganau' akang ratnan amas pad sembayang neneh.

³² Iamo' nekini do' Iko maré do' ku sala'deh, idi kudeng na miak, do' ngiu' ngadanku rat bang surat luk pangeh inayudMu.”

³³ Iamo' kebala Tuhan, “Idé luk mesala' pa kiungKu, ngadanneh ineh luk ruenKu ngiu' rat bang suratKu.

³⁴ Iamo' nekini do' iko nalan nguyut pupu ineh macing su luk bida'Ku namu. Idi melaikatKu nalan pa kiungmu. Iamo' kareb aco ua' macing Ui miak ngua' sala'deh.”

³⁵ Idi Tuhan nengacing aceh ét kuan pupu ineh, ngaceku ideh pangeh nengecuk ni Arun mudut anak sapi' ineh.