PURA' 30 - BALA LUK DO'

Méja Luk Inan Ngeseb Uar Luk Do' Buen

¹ “Do' iko nganau' aceh méja luk inan ngeseb uar luk do' buen ratnan kayuh pirur.

² Do' ieh apat lebping, semikuh kadangneh, idi semikuh pipangneh. Idi kidita'neh dueh sikuh, idi do' unganeh pekatu luun ineh.

³ Idi ieh uen ngakep ku amas luk do', do' luunneh, iringneh, idi amung unganeh. Idi do' ieh ruen belipid amas pekelibut.

⁴ Idi do' nganau' dueh kelabung amas pa liang belipid ineh pekop iringneh, su luk inan kayuh birir, pad ieh miak uen mirir.

⁵ Do' iko nganau' kayuh luk ku mirir ineh ratnan kayuh pirur, idi ngakep neneh ku amas.

⁶ Idi do' nganau' méja ineh pa atun dicing luk tekito pa atun Pati' Pejani' luk petutup ku kakeb su luk inan pedo' luk pa luun Pati' Pejani' ineh, ieh ineh su luk inanKu papu' namu.

⁷ Idi do' Arun ngeseb umau luk do' buen anid-anid pekak luun méja ineh, kareb ieh pangeh nengasa' dawan.

⁸ Kudeng ineh teh kareb ieh nutud lapung ineh pa malem, do' ieh ngeseb uar luk do' buen. Dalan ngeseb umau luk do' buen ineh lutep macing ku anak inul.

⁹ Aleg muyuh ngeseb uar luk do' buen luk na petulu, baré luk sabpen, idi baré luk kenen, luun bubpun ineh. Idi aleg muyuh ngutang baré luk rupen luunneh.

¹⁰ Selak sekua' do' Arun ngisit dara' luk barén ku ngiu' sala' idi nguit pedo' luun apat unga bubpun ineh. Sekua' selak do' ieh nganau' pedo' luun bubpun ineh arang muyuh macing ku anak inul. Do' bubpun ineh meligan tu-tu pa kiungKu.”

Usin Uli' Kuan Lepo Su Luk Inan Papu' Tuhan

¹¹ Kebala Tuhan ni Musa,

¹² “Kareb iko ngiap nelun Israil, do' anid-anid deléi maré inan Tuhan usin ku uli' ulundeh, pad na dereh macing nedeh kareb iko ngiap nedeh.

¹³ Anid-anid burur luk semuet bang iap ineh na miak na maré usin uli', maya' berat luk litep. Do' ideh maré ineh mangun ku aceh baré kuanKu. Anid-anid burur,

¹⁴ ieh ineh luk semuet bang iap lemulun luk ulunneh dueh ngepulu' lak mela, na miak na maré usin uli' ineh.

¹⁵ Idi lun luk do' na maré mela, idi lun luk masi' na miak ngetanga' baré ineh kareb ideh maré usin ku uli' ulundeh.

¹⁶ Do' ngalap usin ini kuan kekamen Tuhan ineh rat nelun Israil, idi maré ineh ngaceku kekamen bang Lepo su luk inan papu' Tuhan ineh. Ieh ineh usin uli' ulundeh, pad Ui ngerawé idi matar nedeh.”

Bigan Tekaling

¹⁷ Kebala Tuhan ni Musa,

¹⁸ “Do' iko nganau' aceh bigan ratnan tekaling, idi kukudneh pana' tekaling. Idi nganau' ineh arang Lepo su luk inan papu' Tuhan dengan bubpun. Idi nganau' abpa' bang ineh.

¹⁹ Idi do' Arun idi anak-anakneh maru' ticu' idi kukuddeh ku abpa' luk bang bigan ineh,

²⁰ kareb nateh ideh semuet bang Lepo su luk inan papu' Tuhan, idi kareb nateh ideh amé' matun bubpun pian maré baré akan kuan Tuhan, pad ideh na maté.

²¹ Idi do' ideh maru' kukud idi ticu'deh, pad ideh na maté. Idi ini aceh ukum luk meruked kuan pupudeh macing ku anak inuldeh.”

Umau Ku Ngumau

²² Kebala Tuhan ni Musa,

²³ “Do' iko ngalap luk do' buen, ieh ineh umau mur* luk mepulut, iwa' kati, idi anit kayuh luk mepaci' luk do' buen, apat kati setangal, keriburo luk do' buen apat kati setangal,

²⁴ idi anit kadingau iwa' kati (maya' berat luk litep), idi umau saitun, segilin.

²⁵ Idi ratnan ineh do' iko nganau' umau luk ku ngumau, ieh ineh aceh umau luk meligan luk uen muar mepad kudeng umau luk do' buen.

²⁶ Idi dengan ineh do' iko ngumau Lepo su luk inan papu' Tuhan, Pati' Pejani',

²⁷ méja dengan amung repapehneh, kukud dawan ineh dengan amung repapehneh teh, méja luk nan ngeseb uar luk do' buen ineh,

²⁸ bubpun luk nan ngeseb dengan amung repapehneh, idi bigan dengan kukudneh.

²⁹ Do' iko ngeligan amung ineh pad ineh meligan tu-tu. Anun-anun luk mekaneh ku ineh miak meligan.

³⁰ “Do' ngumau ni Arun dengan anak-anakneh ku umau ineh, idi ngeligan nedeh pad ideh mangun ku imam kuanKu.

³¹ Do' mada' nelun Israil, kebalamu, ‘Umau ini mangun ku umau luk meligan kuanKu macing ku anak inul muyuh.

³² Aleg ngumau nelun baken ku ineh. Idi aleg muyuh makai umau luk mepad puar. Umau ineh meligan kuanKu.

³³ Idé luk nganau' umau luk mebuen mepad kudeng ini, idi nganau' pa luun burur lun luk na tabpen, ieh ineh duken buro rat arang pupuneh.’ ”

Uar Luk Do' Buen

³⁴ Kebala Tuhan ni Musa, “Lapenmu luk do' buen, ieh ineh ilu' para', kerukub girig, idi ilu' luk mebuen dengan tutud uar, amung ineh mepad kinula'.

³⁵ Idi do' iko muar ineh ku aceh tutud luk do' buen, mepad kudeng nganau' umau luk do' buen. Idi do' ieh uen muar ku tucu' pad ieh meligan.

³⁶ Do' iko tupeh sebuang ineh idi nguit ineh amé' bang Lepo su luk inan papu' Tuhan, su luk inanKu amé' nemuyuh. Idi ngisak ineh pa atun Pati' Pejani'. Idi uar luk do' buen ineh meligan kuan muyuh.

³⁷ Aleg nganau' uar ineh kuan burur muyuh sebuleng. Do' uar ineh uen ngeligan kuanKu.

³⁸ Idé-idé luk nganau' uar luk kudeng ineh kuan bururneh sebuleng, kali' rungen ieh duken buro rat arang pupuneh.”