PURA' 3 - BALA LUK DO'

Allah Nawar Ni Musa

¹ Idi Musa nengasa' aya' ibanneh Yitro, ieh ineh imam bawang Midian. Idi ieh nenguit aya' ineh iné' su luk ali-ali, idi ieh nacing inan pegkung Allah, ieh ineh Sinai.

² Idi Melaikat Tuhan nesilagan neneh bang budung apui luk udung aceh kayuh luk mebeneh. Idi ieh nenier kayuh ineh mebudung ku apui, iamo' kayuh ineh na meseb.

³ Idi keterawé Musa, “Mawa ui! Ngudeh kayuh ineh na meseb? Do' ui amé' nier ineh.”

⁴ Kareb Tuhan nenier ni Musa amé' muneng, idi Ieh nenawar neneh rat bang ineh, kebalaNeh, “O Musa, Musa!” Idi kebala Musa, “Anun idi, Tuhan?”

⁵ Idi kebala Allah, “Aleg iko amé' muneng. Takanmu kasut ratnan kukudmu. Ngaceku su luk inanmu tuped ineh tana' luk meligan.

⁶ Ui ini Allah tepunmu, Ibrahim, Isak, idi Yakub.” Idi Musa nengebpu kiungneh, ngaceku matot nier Allah.

⁷ Idi teh kebala Tuhan, “Ui pangeh nenier amung dereh pupuKu luk icing lun Masir nedeh. Ui pangeh neninger aroddeh mutuh puatin rat nelun luk metueh ngimet nedeh. Ui kali' amung derehdeh.

⁸ Idi Ui pangeh netemurun pad muit nedeh ratnan imet lun Masir, pelé Ui nguit nedeh remuat rat bang bawang ineh amé' nan aceh bawang luk rayeh, ieh ineh aceh tana' luk mebaleng, su luk inan lun Kanaani, lun Hiti, lun Amori, lun Prisi, lun Hiwi, idi lun Yebusi.

⁹ Ui pangeh neninger tangi' lun Israil. Idi teh Ui nier kudeng apeh ayu dereh lun Israil ruen lun Masir.

¹⁰ Idi Ui ngecuk namu amé' papu' raca' Masir, pad iko muit pupuKu lun Israil remuat rat bang bawang Masir.”

¹¹ Idi kebala Musa nan Allah, “Kudeng apehké ui miak amé' papu' raca' idi nguit nelun Israil remuat rat bang bawang Masir?”

¹² Idi kebala Tuhan, “Ui ngedengan namu. Idi ini miak mangun ku tanu' kuanmu, ratnan tawarKu namu. Kareb pupuKu inuitmu remuat rat bang bawang Masir, idi muyuh miak sembayang inan Allah luun surud ini.”

¹³ Idi kebala Musa, “Kareb ui amé' papu' nelun Israil idi kebalaku nedeh, ‘Allah tepun muyuh nengecuk negku amé' nemuyuh,’ idi ideh ngitun negku, ‘Idéké ngadanNeh?’ kudeng apeh ui ngor baladeh?”

¹⁴ Idi kebala Allah, “Ui Idi Luk Ui Idi.” Idi teh kebalaNeh, “Do' mala kudeng ini kuan lun Israil: ‘UI IDI pangeh nengecuk negku amé' nemuyuh.’

¹⁵ Do' mala kudeng ini kuan lun Israil: ‘Tuhan, Allah tepun muyuh Ibrahim, Isak, idi Yakub, pangeh nengecuk negku amé' nemuyuh.’ Idi ini ngadanKu macing ruked-ruked, idi miak tetanen macing ku anak inul.

¹⁶ Amé' iko idi ngamung lun rayeh-rayeh Israil, idi mada' kuandeh: ‘Tuhan, Allah tepun muyuh, Ibrahim, Isak, idi Yakub, nesilagan negku, kebalaNeh, “Ui pangeh nenier nemuyuh idi kali' amung-amung luk ruen lun Masir nemuyuh.

¹⁷ Ui pejani' muit nemuyuh remuat ratnan dereh bawang Masir ineh, pad muyuh amé' bawang lun Kanaani, lun Hiti, lun Amori, lun Prisi, lun Hiwi, idi lun Yebusi, ieh ineh tana' luk mebaleng.” ’

¹⁸ “PupuKu ineh miak ninger balamu. Idi do' iko amé' papu' raca' Masir dengan lun rayeh-rayeh Israil. Kebala muyuh neneh, ‘Tuhan, Allah lun Iberani, pangeh nesilagan nekai. Ngaceku ineh maré amung kai amé' su luk ali-ali tap delanin teluh aco, pad kai maré baré kuan Allah kai.’

¹⁹ Iamo' Ui kali' raca' Masir na muit nemuyuh, kudeng na dengan mesaad.

²⁰ Iamo' Ui miak ngegala' laludKu, pad Ui ngukum bawang Masir dengan luk katot luk miak ruenKu kuandeh. Pangeh ineh idi ieh miak maré nemuyuh nalan.

²¹ “Idi Ui miak maré lun Masir méi' nemuyuh. Kareb muyuh remuat, na muyuh nalan na uang.

²² Ngaceku anid-anid decur miak mutuh nelun luk denganneh idi lun bang tetek ruma'neh, pirak, amas, idi ayung kuan anak-anakdeh luk deléi idi decur teh. Kudeng ini lawé muyuh miak ngaro bawang Masir.”