PURA' 29 - BALA LUK DO'

Ratnan Ngeligan Ni Arun Idi Anak-Anakneh

¹ “Idi ini luk ruenmu kuan Arun idi anak-anakneh ku ngeligan nedeh, pad ideh mangun ku imam kuanKu. Ngalap aceh sapi' deléi luk pegawa' idi dueh dumba deléi luk do'.

² Do' ngalap banak luk meluun do', luk na linamud, idi nganau' ruti luk rinabur ku umau saitun, idi sebuang luk na rinabur ku umau. Idi teh nganau' tinapé luk linusi ku umau.

³ Idi do' nganau' amung ineh bang sebuleng kabpang, idi maré ineh kuanKu mangun ku baré, dengan sapi' deléi idi dueh dumba deléi ineh.

⁴ “Idi nguit ni Arun idi anak-anakneh amé' muneng ku tanga' Lepo su luk inan papu' Tuhan. Idi do' iko maru' nedeh ku abpa'.

⁵ Pangeh ineh do' iko ngayung ni Arun ku ayung imam, ieh ineh kuyu' buyor imam, kuyu' imam dengan kakeb ruuk, idi abet awa' teh.

⁶ Idi do' ngerareng sigar ineh luun uluhneh, idi nganau' balad amas luk meligan ineh pa luun sigar ineh.

⁷ Idi do' iko ngalap umau luk do' buen ineh idi ngutang ineh luun uluhneh, idi ngumau neneh.

⁸ “Do' nguit anak-anakneh amé' muneng idi nganau' kuyu' luundeh.

⁹ Idi do' iko ngabet awa'deh ku abet awa' ineh, idi ngabet aduk ineh luun uluhdeh. Kudeng ineh teh do' iko ngeletep Arun idi anak-anakneh, pad ideh idi inuldeh mangun ku imam kuanKu macing ruked-ruked.

¹⁰ Do' nguit sapi' pa atun Lepo su luk inan papu' Tuhan, idi ngecuk Arun idi anak-anakneh ngerareng ticu'deh luun uluhneh.

¹¹ Idi ngeret sapi' ineh pa kiungKu luk Meligan munung tanga' Lepo su luk inan papu' Tuhan.

¹² Idi ngalap sebuang dara' sapi' ineh, idi nganau' luun bua' ticu'mu ruen luun unga bubpun. Idi do' ngutang dara' luk ketecan ineh luun kukud bubpun ineh.

¹³ Idi do' ngalap amung lemak tinéi' ineh, amung lemak aténeh, dueh beter, idi amung lemak luk luun beter ineh. Idi do' ngeseb ineh luun bubpun ineh teh mangun ku aceh baré kuanKu.

¹⁴ Iamo' do' uang sapi' ineh, dengan kubilneh idi tinéi'neh, sabpen mado rat su nandeh lupo. Ieh ineh aceh baré luk ngiu' sala' imam.

¹⁵ “Do' iko ngalap sebuleng dumba deléi ineh, idi ngecuk Arun idi anak-anakneh ngerareng ticu'deh luun uluhneh.

¹⁶ Do' iko ngeret dumba deléi ineh, idi ngalap dara'neh, idi ngisak ineh pekop iring bubpun ineh.

¹⁷ Idi do' iko muer dumba deléi ineh, idi maru' tinéi'neh, idi kukudneh, idi nganau' ineh pa luun luk titek-titek ineh idi pa luun uluhneh.

¹⁸ Idi do' dumba deléi ineh barén sabpen luun bubpun ineh mangun ku aceh baré akan. Ui ini Tuhan, mawang niat ku buen baré ineh.

¹⁹ “Idi do' iko ngalap dumba deléi luk baken ineh, idi ngecuk Arun idi anak-anakneh ngerareng ticu'deh luun uluhneh.

²⁰ Do' iko ngeret ineh, idi ngalap sebuang dara'neh, idi ngisit ineh luun lalid Arun pa tinueh idi lalid anak-anakneh pa tinueh teh, idi luun bua' ticu' mebpuh pa tinueh, idi luun bua' kukud mebpuh pa tinueh teh. Idi ngisak dara' luk ketecan ineh pekop iring bubpun ineh.

²¹ Idi do' iko ngalap sebuang dara' luk pa luun bubpun dengan umau luk ku ngumau ini, idi ngisak ni Arun idi ayungneh. Kudeng ineh teh anak-anakneh, idi ayungdeh, pad Arun, anak-anakneh, idi ayungdeh uen ngeligan kuanKu.

²² “Do' ngalap ratnan dumba deléi ineh lemakneh, dengan lemak iurneh, lemak tinéi'neh, lemak luun aténeh, dueh beterneh, dengan lemak luk luunneh, idi tipan pa tinueh. Ngaceku dumba ineh aceh baré ku ngeletep imam.

²³ Idi do' iko ngalap dueh balad ruti, idi aceh pinaram luk rinabur ku umau, idi aceh tinapé rat bang kabpang luk inan ruti luk na lamud luk pa kiung Tuhan.

²⁴ Do' iko ngerareng akan ineh bang palad Arun idi bang palad anak-anakneh. Do' ideh nicul amung ineh mepad kudeng aceh baré luk tidulen pa kiung Tuhan.

²⁵ Idi do' iko ngalap amung ineh rat nedeh idi ngeseb ineh luun bubpun, pa luun baré luk sabpen mangun ku baré akan kuanKu. Ui ini Tuhan, mawang niat ku buen baré ineh.

²⁶ “Do' ngalap ruuk dumba deléi ineh, idi nicul ineh ku aceh baré pa kiungKu. Babpat ini kuanmu.

²⁷ Kareb seburur imam uen ngeletep, do' iko nicul ruuk idi tipan dumba deléi luk kereten ku ngeletep imam ineh. Idi ineh mangun ku babpat imam-imam.

²⁸ Ineh luk mangun ku ukum kuan lun Israil macing ruked-ruked, kareb ideh maré barédeh luk nguit pedo'. Ruuk idi tipan mangun ku babpat imam-imam. Ini baré lun mula' kuanKu.

²⁹ “Do' ayung Arun luk meligan ineh pinul macing ku anak-anakneh luk muci, pad ideh miak ngayung ku ineh kareb ideh uen ngeletep.

³⁰ Ide' rat arang anak-anak Arun luk ngelibal neneh mangun ku imam, idi luk semuet bang Lepo su luk inan papu' Tuhan ineh, pad ngakem kekamen imam Su luk Meligan, do' ngayung ku ineh tudu' aco kinioneh.

³¹ “Do' ngalap uang dumba deléi luk baré ku ngeletep Arun idi anak-anakneh, idi nanek ineh su apeh luk meligan.

³² Idi ideh kuman uang ineh dengan ruti luk ketecan bang kabpang luk munung tanga' Lepo su luk inan papu' Tuhan.

³³ Idi ideh kuman amung ineh luk biré pad nguit pedo' kareb ideh litep mangun ku imam. Iamo' imam-imam mo' luk kuman ineh, ngaceku akan ineh meligan.

³⁴ Kudeng inan luk ketecan ratnan uang, idi ruti ineh macing pekak, do' amung luk ketecan ineh sabpen. Aleg kuman ineh ngaceku amung ineh meligan.

³⁵ “Idi do' nganau' kudeng ineh kuan Arun idi anak-anakneh, maya' kudeng luk bida'Ku namu. Seruked tudu' aco do' iko ngeletep nedeh.

³⁶ Idi anid-anid aco do' iko maré sebuleng sapi' deléi mangun ku baré luk nguit pedo', pad ngeligan bubpun ineh. Idi do' ngumau bubpun ineh, pad ieh meligan.

³⁷ Tudu' aco kinioneh iko nganau' kudeng ineh, pad bubpun ineh meligan tutu. Anun-anun luk mekaneh ku bubpun ineh mangun meligan.

Baré Anid-Anid Aco

³⁸ “Anid-anid aco, macing ruked-ruked, do' maré luun bubpun dueh anak dumba luk ulun selak.

³⁹ Do' iko maré sebuleng anak dumba kareb pekak, idi sebuleng pa malem.

⁴⁰ Dengan anak dumba luk pun-pun do' maré apat lio banak luk do' luk rinabur ku dueh seréi' umau saitun. Idi teh do' ngutang dueh seréi' abpa' anggur mangun ku baré luk rupen.

⁴¹ Do' ngeret anak dumba luk kedueh kareb malem. Idi dengan ineh maré banak, umau saitun, idi abpa' anggur, mepad kinula' baré luk biré kareb pekak. Ieh ineh aceh baré akan kuanKu. Idi Ui mawang niat ku buen baré ineh.

⁴² Do' baré luk sabpen ini barén pa kiungKu, pad macing ku anak inul muyuh, munung tanga' Lepo su luk inan papu' Tuhan, ieh ineh su luk inanKu amé' papu' pupuKu idi pebala namu.

⁴³ Idi su ineh Ui amé' matun lun Israil, idi rasatKu ngeligan su ineh.

⁴⁴ Idi Ui ngeligan Lepo su luk inan papu' Tuhan idi bubpun ineh pana'. Idi teh Ui ngeligan Arun idi anak-anakneh pad ideh mangun ku imam kuanKu.

⁴⁵ Idi Ui tudo arang uned lun Israil. Idi Ui mangun ku Allahdeh,

⁴⁶ pad ideh kali' Ui ini Tuhan Allahdeh luk pangeh nenguyut nedeh remuat rat bang bawang Masir, pelé Ui tudo arangdeh, ngaceku Ui ini Tuhan Allahdeh.