PURA' 28 - BALA LUK DO'

Ayung Imam

¹ “Do' neteng kinanakmu Arun, idi anak-anakneh, ieh ineh Nadab, Abihu, Eliasar, idi Itamar. Ngatad nedeh ratnan pupu Israil, pad ideh mangun ku imam kuanKu.

² Idi nganau' kuan kinanakmu Arun ineh ayung luk meligan idi luk buren.

³ Do' iko nawar nelun luk mileh nerut, luk pangeh pinu'Ku ku ileh, idi ngecuk nedeh nganau' ayung Arun, pad ieh miak mangun ku imam kuanKu.

⁴ Ngecuk nedeh nganau' aceh kakeb ruuk, aceh kuyu' imam, aceh kuyu' buyor, aceh kuyu' luk tibaruh, aceh sigar, idi aceh abet awa'. Idi do' ideh nganau' ayung imam ini kuan kinanakmu Arun idi anak-anakneh, pad ideh mangun ku imam kuanKu.

⁵ Do' ideh ngalap buluh dumba luk bata' melaco, sia' merirem, idi sia' melidang, kibung pu luk do', idi gitian luk inau' ratnan amas.

⁶ “Do' ideh nganau' kuyu' imam ineh, ratnan buluh dumba luk bata' melaco, sia' merirem, idi sia' melidang, idi gitian luk inau' ratnan amas, idi kibung pu luk do', idi do' ieh uen ngebaruh.

⁷ Idi kuyu' ineh inan dueh lalid tudungneh luk iteng mop papedneh.

⁸ Do' abet kuyu' imam ineh uen ngebaruh do'-do', idi pekatu nan kuyu', idi ruen mepad ayu.

⁹ Idi do' iko ngalap dueh ngilung bau burur idi ngayud luun dueh bau ineh ngadan pulu' dueh anak Yakub,

¹⁰ ieh ineh anem ngadan luun sebuleng bau, idi anem ngadan luun bau luk baken, maya' aco luk inandeh tinganak.

¹¹ “Do' iko ngayud ngadan anak-anak Yakub luun dueh bau burur ineh, mepad kudeng etu luk inarit, idi dengan ayud lun luk mileh ngarit batu luk meraga. Idi do' iko ngalub ineh ku amas.

¹² Do' iko nganau' dueh bau ineh mop lalid kuyu' imam ku terawé ratnan pulu' dueh pupu Israil. Idi do' Arun nguit ngadandeh luk pekop lalid kuyu' ineh, pad Ui ini Tuhan megéi' ngerawé pupuKu.

¹³ Do' iko nganau alubneh ratnan amas,

¹⁴ idi nganau' dueh ratai medari ratnan amas luk do' luk mepad kudeng nuper luk ipid, idi nutum ratai ineh nan alub ineh.

Kakeb Ruuk

¹⁵ “Do' nganau' aceh kakeb ruuk luk pimada' pian Allah, aceh luk mepad kudeng ayu kuyu' luk tibaruh.

¹⁶ Idi do' ieh apat lebping idi uen ngelepi' dueh, kikadangneh murek, idi pipangneh pana' murek.

¹⁷ Idi do' ngalub apat baris batu luk meraga. Luk pun-pun sengilung batu luk sia' merirem, sengilung batu luk mebirar, idi sengilung batu luk mesia'.

¹⁸ Idi luk kedueh sengilung batu luk bata' uduh, sengilung batu luk bata' langit, idi sengilung batu intan.

¹⁹ Idi luk keteluh sengilung batu luk mebata', idi sengilung batu luk sia' merirem, idi sengilung batu luk merirem.

²⁰ Idi luk keapat sengilung batu luk bata' melaco, sengilung bau burur, idi sengilung batu luk mebirar. Idi do' ideh uen ngalub ku amas.

²¹ Idi anid batu ini nan ngayud ngadan sebuleng anak Yakub ku ngegala' ngadan pupu Israil.

²² Idi teh do' nganau' ratai-ratai ratnan amas luk do' luk uen nguper ruen luun kakeb ruuk.

²³ Nganau' dueh kelabung amas ruen luun iring kakeb ruuk.

²⁴ Idi nutum dueh ratai ineh nan dueh kelabung luk pekop iring kakeb ruuk ineh.

²⁵ Idi do' nutum paped abet dueh ratai ineh nan lalid tudung kuyu' imam pa atun.

²⁶ Idi teh nganau' dueh kelabung amas rangen pekop paped kakeb ruuk, luun iring luk pa selipa kuyu' imam.

²⁷ Idi nganau' dueh kelabung amas teh, idi nganau' ineh pa liang pekop lalid tudung kuyu' imam, idi muneng ku tutum idi pa luun abet awa' kuyu' imam luk inuper do'-do'.

²⁸ Pangeh ineh do' kelabung kakeb ruuk ineh betin nan kelabung kuyu' imam ku abet luk bata' melaco, idi kakeb ruuk ineh na miak patad ratnan abet awa' kuyu' imam.

²⁹ “Kareb Arun semuet bang Su luk Meligan, idi ieh miak ngayung ku kakeb ruuk dengan ngadan pupu-pupu Israil, pad Ui ini Tuhan megéi ngerawé pupuKu.

³⁰ Idi do' nganau' Urim idi Tumim* bang kakeb ruuk luk pimada' pian Allah, pad Arun nguit ineh kareb ieh amé' pa kiungKu. Kareb ineh, do' ieh megéi' ngayung ku kakeb ruuk ineh, pad ieh miak kali' pianKu kuan pupuKu Israil.

Ayung Luk Baken Kuan Imam

³¹ “Idi do' iko nganau' kuyu' buyor imam ineh ratnan buluh dumba luk bata' melaco amung.

³² Idi do' ayud dier kuyu' ineh peringuned, idi do' ieh uen muun iring ku kibung luk tibaruh, pad ieh na medarak.

^33-34 Idi libut lepi'neh, do' iko nganau' ayu bua' delima luk bata' melaco, merirem, idi melidang, dengan karing-karing amas arangdeh.

³⁵ Arun miak ngayung ku ineh kareb ieh nganau' kekamen imam. Kareb ieh semuet bang Su luk Meligan pa kiungKu, idi kareb ieh remuat, uni karing pedingeren, pad ieh na maté.

³⁶ “Idi teh do' iko nganau' aceh balad amas luk do' idi ngayud luun ineh, ‘Linigan Kuan Tuhan.’

³⁷ Do' ngabet ineh luun sigar ineh ku abet luk bata' melaco.

³⁸ Do' balad amas ineh rangen luun madu' Arun, pad Ui ini Tuhan miak ngalap amung baré luk barén lun Israil kuanKu, sagan pana' lun mula' sala' baré.

³⁹ “Idi do' kuyu' Arun uen ngebaruh ratnan kibung pu luk do'. Idi nganau' sigar ratnan kibung pu luk do', idi abet awa' ratnan tebaruh luk raput-raput ayu.

⁴⁰ “Idi teh do' nganau' kuyu'-kuyu', abet awa', idi aduk ku abet uluh kuan anak-anak Arun mangun ku ubur idi tagadeh.

⁴¹ Idi amung ineh rangen luun kinanakmu Arun idi anak-anakneh. Pangeh ineh do' iko ngumau nedeh ku umau saitun, pad ngeletep nedeh mangun ku imam kuanKu.

⁴² Nganau' siduar ratnan kibung pu kuandeh, pad ideh na lubpa. Idi kadang siduar ineh rat ku awa' macing ku aleb.

⁴³ Idi do' Arun idi anak-anakneh ngayung ku ineh, kareb ideh semuet bang Lepo su luk inan papu' Tuhan, idi kareb ideh muneng ku bubpun pian nganau' kekamendeh Su luk Meligan, pad ideh na nganau' sala' idi maté. Ini aceh ukum luk lutep macing ruked-ruked kuan Arun idi inulneh.