PURA' 25 - BALA LUK DO'

Baré Kuan Su Luk Meligan

¹ Idi kebala Tuhan ni Musa,

² “Ngecuk nelun Israil ngamung tuda'-tuda' baré kuanKu ratnan anid-anid lun luk pian maré ineh, idi ngalap ineh kuanKu.

³ Idi ini baré luk lapen muyuh rat nedeh: amas, pirak, idi tekaling;

⁴ idi kibung luk bata' melaco, sia' merirem, idi sia' melidang, kibung pu luk inuper, idi buluh amék;

⁵ idi kubil dumba deléi luk inau' mesia', kubil luk do', kayuh pirur;

⁶ umau lapung, umau luk do' buen luk pingumau, idi umau luk meluun do' buen,

⁷ idi bau burur idi batu baken luk meraga luk ku kuyu' imam luk meraga, idi kakeb ruuk.

⁸ Idi do' lun mula' nganau' aceh Lepo luk meligan kuanKu, pad Ui tudo arangdeh.

⁹ Do' muyuh nganau' ineh, idi amung repapehneh, maya' ayu luk dukenKu namu.

Pati' Pejani'

¹⁰ “Ngecuk nelun mula' nganau' aceh pati' ratnan kayuh pirur, kikadangneh dueh sikuh setangal, pipangneh sesikuh setangal, idi kidita'neh semikuh setangal.

¹¹ Idi do' ieh uen ngakep ku amas luk do', pa luun idi bang lubang. Idi do' iko nganau' luun ineh belipid amas pekelibut.

¹² Idi ngurai apat kelabung amas ruen luun apat kukudneh, dueh selipa, idi dueh selipa.

¹³ Idi do' nganau' kayuh pirur ku birirneh, idi ngakep ineh ku amas.

¹⁴ Idi nuet kayuh birir ineh bang kelabung luk pekop pati' ineh.

¹⁵ Idi do' kayuh luk ku mirir ineh tutem bang kelabung ineh. Na miak uen ngangat.

¹⁶ Idi do' iko nganau' bang pati' ineh batu luk tebalad luk inan Pejani' luk barénKu namu.

¹⁷ “Idi teh nganau' aceh kakeb su luk inan pedo' ratnan amas luk do', kikadangneh dueh sikuh setangal, idi pipangneh semikuh setangal.

¹⁸ Idi do' nganau' dueh melaikat karub ratnan amas luk tinuno.

¹⁹ Nganau' dueh melaikat karub ineh pekop paped kakeb ineh petatem luun ineh.

²⁰ Idi kiung didueh petutup. Idi ilad didueh tegerayap mapen kakeb su luk inan pedo' ineh.

²¹ Idi do' iko nganau' dueh batu luk tebalad bang pati' ineh, idi nganau' kakeb luk inan pedo' ineh pa luunneh. Idi bang pati' ineh do' iko nganau' Jani' luk barénKu namu.

²² Idi su ineh Ui papu' namu. Idi ratnan kakeb luk inan pedo' ineh rat arang dueh melaikat karub luk pa luun pati' pejani' ineh, Ui miak pegayam namu ratnan amung-amung luk bilaKu namu, luk uen ngacing kuan lun Israil.

Méja Luk Inan Ruti Luk Barén Kuan Tuhan

²³ “Idi teh do' iko mudut méja ratnan kayuh pirur, dueh sikuh kikadangneh, semikuh pipangneh, idi semikuh setangal kidita'neh.

²⁴ Do' iko ngakep ineh ku amas luk do', idi nganau' belipid amas pekelibut ineh.

²⁵ Do' iko nganau' libutneh belipid kiar palad pipangneh, idi iringneh nganau' belipid amas pekelibut.

²⁶ Idi do' iko nganau' kuan méja ineh apat kelabung amas, idi do' iko nganau' kelabung anid-anid lidung su luk inan kukudneh.

²⁷ Do' nganau' kelabung ineh muneng iring belipid ineh.

²⁸ Idi do' iko ngalap kayuh pirur, idi ngakep ineh ku amas, pad méja uen mirir ku ineh.

²⁹ Idi teh do' nganau' bigan, sangkir, busi', idi sikuan ruandeh baré luk rupen. Idi do' nganau' amung ineh ratnan amas luk do'.

³⁰ Idi nganau' méja ineh pa atun Pati' Pejani'. Idi nganau' ruti luun méja ineh kidi-kidi pa kiungKu.

Kukud Dawan

³¹ “Idi do' iko nganau' aceh kukud dawan ratnan amas luk do'. Nganau' puet idi batangneh ratnan amas luk tinuno, idi busak-busakneh, dengan busak luk nateh nelusad pana', tekapit nan batang ineh.

³² Idi anem rangat ineh inan iringneh, teluh rangat mulang rat pa selipa idi selipa.

³³ Anid anem rangat ineh inan teluh busak badam ayuneh dengan busak luk nateh nelusad.

³⁴ Idi do' kukud dawan ineh pana' inan apat busak mepad kudeng busak badam ayuneh dengan busak luk nateh nelusad.

³⁵ Do' inan aceh busak luk nateh nelusad pa liang anid dueh rangat ineh.

³⁶ Idi busak luk nateh nelusad idi amung rangatneh, idi kukud dawan ineh, amung ineh tekapit ratnan aceh amas luk tinuno idi do'.

³⁷ Idi do' iko nganau' tudu' dawan kuan kukud dawan ineh idi nutud ineh pad ngacang pa atun.

³⁸ Idi do' amung apitneh idi su luk inan bareh apui pana' ruen ratnan amas luk meluun do'.

³⁹ Idi do' iko nganau' amung ineh dengan amung repapehneh ratnan limeh ngepulu' anem kati amas luk meluun do'.

⁴⁰ Ngerawé do'-do', pad iko nganau' amung ineh maya' ayu luk pangeh bida' namu déi' luun pegkung ineh.