PURA' 24 - BALA LUK DO'

Jani' Ini Litep

¹ Kebala Tuhan ni Musa, “Mudik iko idi amé' papu' Negku dengan Arun, Nadab, Abihu, idi tudu' ngepulu' lun rayeh Israil, idi tekeradung sembayang rat mado.

² Idi iko sebuleng amé' muneng Negku. Iamo' aleg kuma' baken amé' muneng. Idi aleg lun mula' mudik pegkung pana'.”

³ Musa iné' mada' nelun mula' amung bala Tuhan. Idi amungdeh peranga' nengor bala ineh, kebaladeh, “Amung ukum ini luk bila Tuhan, kai miak maya'!”

⁴ Idi Musa nengayud amung bala Tuhan. Idi pekak uka-uka, ieh nenganau' aceh bubpun su buten irang surud ineh, idi ieh nenaped pulu' dueh batu maya' kinula' pulu' dueh pupu Israil.

⁵ Idi ieh nengecuk tuda'-tuda' anak adi' lun Israil idi ideh nengeseb baré kuan Tuhan, idi ngeret tuda'-tuda' sapi' deléi mangun ku baré luk nguit pedo' inan Tuhan.

⁶ Musa nengalap sebuang dara' ineh idi ieh nenganau' ineh bang tuda'-tuda' bigan, idi sebuang ratnan dara' ineh nekumubpurneh bubpun ineh.

⁷ Idi ieh nengalap surat pejani' ineh, idi ieh nemaca' ineh pedingeren pupu ineh. Idi kebaladeh, “Amung luk bida' Tuhan ineh, kai miak maya'.”

⁸ Pangeh ineh Musa nengalap dara' ineh, idi ieh nengisak ineh luun pupu ineh, idi nepebala, “Ini dara' pejani' luk litep Tuhan kuan muyuh kareb Ieh nemaré amung ukum ini.”

⁹ Idi Musa mudik dengan Arun, Nadab, Abihu, idi tudu' ngepulu' lun rayeh Israil.

¹⁰ Idi ideh nenier Allah lun Israil. Idi pa liang kukudNeh inan aceh luk kudeng tapin ratnan batu luk mebata' langit.

¹¹ Allah na nengukum nelun luk nguyut pupu Israil ineh. Iamo' kareb ideh kali' Neneh, idi ideh nekuman idi nengirup.

Musa Déi' Pegkung Sinai

¹² Idi kebala Tuhan ni Musa, “Mudik iko teh amé' papu' Negku, idi tudo tungé'. Ui sikal maré namu dueh batu tebalad, ieh ineh bala idi ukum luk pangeh inayudKu ku mada' nedeh.”

¹³ Idi Musa nenalan dengan rurumneh Yusak, idi didueh mudik pegkung Allah ineh.

¹⁴ Idi kebala Musa nelun rayeh-rayeh ineh, “Nganét ieni muyuh pad kai lemubed. Arun idi Hur idi dengan muyuh. Idé luk inan luk tunin, do' amé' matun nedidueh.”

¹⁵ Musa mudik, idi laput netemurun nemapen pegkung ineh.

¹⁶ Idi rasat Allah mudeng luun Pegkung Sinai ineh, idi anem aco kinioneh laput nemapen pegkung ineh. Idi aco luk ketudu', Tuhan nenawar ni Musa ratnan uned laput ineh.

¹⁷ Rasat Allah melagan mepad kudeng apui luk ngeseb buduk pegkung ineh su siren lun Israil.

¹⁸ Idi Musa nesemuet uned-uned laput ineh idi numak pegkung ineh. Idi ieh netudo luun pegkung ineh apat ngepulu' aco idi apat ngepulu' dacem kinioneh.