PURA' 23 - BALA LUK DO'

Putut Besara' Luk Mesiri

¹ “Aleg iko nguit bala luk mebalih. Idi aleg iko ngedengan lemulun luk dat idi mangun ku lun nekali' luk na matu.

² Aleg iko maya' bala lun mula' nganau' luk dat. Idi aleg iko mangun ku lun nekali' luk mebaken maya' lun mula' ineh, pad na maya' luk matu.

³ Idi teh aleg iko ngeran sala' lun masi' pa kiung lun luk mutut besara'.

⁴ “Kudeng iko kali' sapi' lun luk museh namu idi keladai luk meraruh, do' iko ngelubed neneh dengan mesaget.

⁵ Kudeng iko kali' keladaineh meluka' ngaceku berat babehneh, aleg iko nima' neneh. Do' iko nengan neneh idi ngiding luk baben keladai ineh.

⁶ “Aleg mutut besara' lun masi' maya' dalan luk na mesiri.

⁷ Aleg iko ngadu' lemulun dengan mebalih. Idi aleg maré ukum maté kuan lemulun luk na mesala' idi luk matu. Ngaceku Ui ngukum lemulun luk nganau' luk kudeng ineh.

⁸ Idi teh aleg iko ngalap suap, ngaceku suap ineh muser mateh lemulun luk mileh, idi ngekilu' bala lemulun luk matu.

⁹ “Idi teh, aleg iko ngedereh nelun sakai. Muyuh kali' niat lun sakai, ngaceku muyuh pana' mangun ku lun sakai bang bawang Masir atun.

Lak Luk Ketudu' Idi Aco Luk Ketudu'

¹⁰ “Idi anem lak kinioneh do' iko nganau' lati' idi kabun pana', idi ngalap uli'neh.

¹¹ Iamo' lak luk ketudu' aleg nganau' lati' idi kabun luun tana'mu ineh, pad lun luk masi' miak kuman luk mulun su ineh. Idi elaneh miak kenen pung luk meliput. Kudeng ineh teh kabun anggurmu idi saitunmu.

¹² “Do' iko ngakem anem aco kinioneh. Iamo' aco luk ketudu' aleg iko ngadem, pad sapi' idi keladaimu pana' miak ucu'. Idi demulun idi sakaimu pana' miak ngato erurdeh.

¹³ “Ui ini Tuhan. Do' ninger amung balaKu. Aleg sembayang nan allah luk baken, idi aleg neten ngadandeh.

Teluh Irau Luk Rayeh

¹⁴ “Teluh kua' selak do' iko nganau' aco rayeh kuanKu.

¹⁵ Bang bulan Abib, ieh ineh bulan luk inanmu remuat rat bang bawang Masir, do' nginita Aco Rayeh kuman Ruti luk Na Lamud, maya' kudeng luk bida'Ku namu. Tudu' aco kinioneh do' iko kuman ruti luk na lamud. Aleg amé' pa kiungKu dengan palad luk na uang.

¹⁶ “Do' iko nginita Aco Rayeh Ngeranih teh, ieh ineh kareb pun ngeranih. “Idi teh do' ngerawé Aco Rayeh Lepo kareb udung lak, kareb iko ngamung uli' rat bang lati'mu.

¹⁷ Do' amung lun deléi amé' pa kiung Tuhan Allah teluh kua' selak.

¹⁸ “Aleg iko maré ruti luk inan lamud dengan pung luk kereten kuanKu. Idi aleg nima' lemak ratnan luk biré Negku ketecan macing kenebpa.

¹⁹ “Amung bua' luk pun ilap ratnan lati'mu do' nguit semuet bang ruma' Tuhan Allahmu. “Aleg iko nanek anak dumba kian amék ku rata tinanneh.

Jani' Idi Bada'

²⁰ “Ui ngecuk aceh melaikat amé' pa kiungmu pad matar namu idi nguit namu macing su luk tinina'Ku ineh.

²¹ Ninger idi maya' balaneh. Idi aleg muyuh metueh rat neneh, ngaceku na ieh maré do' ku sala' muyuh. Ngaceku ngadanKu idi neneh.

²² Iamo' kudeng iko maya' balaneh, idi nganau' amung luk bida'Ku, idi Ui miak metueh ratnan amung bunu'mu.

²³ MelaikatKu ineh miak nalan pa atunmu, pad nguit namu semuet bang bawang lun Amori, lun Hiti, lun Prisi, lun Kanaani, lun Hiwi, idi lun Yebusi. Idi Ui miak ngaté nedeh.

²⁴ Aleg iko ngubur idi tekeradung pa kiung allahdeh ineh, idi sembayang nedeh. Aleg iko maya' lawé sembayangdeh ineh. Iamo' do' iko ngusag akangdeh, idi mila' amung ulungdeh.

²⁵ Kudeng muyuh sembayang inan Tuhan Allah muyuh, idi Ui miak ngeperuan nemuyuh ku akan idi luk rupen muyuh. Idi Ui ngado amung ét rat arang muyuh.

²⁶ Bang bawangmu na decur luk musul anak idi luk na anak. Ui miak maré ulunmu mekadang.

²⁷ “Ui nganau' pupu luk sikal metueh rat namu matot Negku. Idi Ui miak ngagap pupu luk ulekmu. Idi Ui nganau' amung bunu'mu buro rat namu.

²⁸ Idi teh Ui ngagau bunu'mu, idi ngusu amung lun Hiwi, lun Kanaani, idi lun Hiti rat pa atunmu.

²⁹ Idi baken bang selak mo' Ui ngusu nedeh, pad bawang ineh na dat ali, idi pad pung luk meliput na pelaba ula'.

³⁰ Dengan ulai-ulai Ui miak ngusu nedeh, pad muyuh iuk amé' mula' idi ngalap bawang ineh.

³¹ Ui nganau' lakan bawangmu rat Abpa' Pisui macing Abpa' Pirat, idi rat Abpa' Rayeh macing su luk ali-ali. Ui maré lun bang bawang ineh bang imetmu, pad iko ngusu nedeh rat pa kiungmu.

³² Idi aleg iko nganau' jani' kuandeh idi kuan amung akangdeh.

³³ Aleg ideh tudo bang bawangmu, pad ideh na nganau' namu mesala' Negku. Kudeng iko sembayang inan akangdeh, kali' rungen iko mekaneh abpung.”