PURA' 22 - BALA LUK DO'

Ukum Pano Aya'

¹ “Idi kudeng selemulun mano aceh sapi', kian dumba lek, idi ieh ngeret neneh idi masui neneh, na miak na ieh libalen sebuleng sapi' ineh ku limeh sapi', idi sebuleng dumba libalneh apat dumba.

^2-4 Na miak na ieh ngelibal luk pinoneh. Kudeng na binawehneh, na miak na bururneh sebuleng pisuen mangun ku demulun, pad ngua' luk pinoneh. Kudeng luk pinoneh ineh idi teh neneh, bang karebneh mulun, do' ieh sapi', keladai kian dumba lek, na mian na ieh maré libalneh dueh kua' kinula'neh. “Kudeng aceh lemulun kamen idi pitayen uned ieh mano kareb medacem, lemulun luk nengaté neneh ineh na mesala'. Iamo' kudeng ieh ngaté neneh kareb macang, idi ieh mesala'.

⁵ “Kudeng selemulun nima' aya'neh kuman tibu luk bang lati' idi kabun anggur lun baken macing mabud, ngaceku na ieh nengusu aya'neh, na miak na ieh maré uli' luk meluun do' rat bang lati'neh sebuleng, idi rat bang kabun anggurneh, ku libal rugi' ineh.

⁶ “Idi kudeng inan apui luk mulun idi ngeseb budud, idi apui ineh meperuit idi ngeseb padé luk tibuduk, idi luk nateh piranih idi maput lati' ineh neseb, do' lemulun luk pun nengimun apui ineh ngelibal luk iseb ineh dengan petap.

⁷ “Kudeng selemulun maré usin idi binaweh-binaweh nugen lun denganneh, idi ieh pino rat bang ruma' lun ineh, kudeng luk nemano ineh nekali', na miak na ieh mayar dueh kua' kinula'neh.

⁸ Kudeng na luk nemano ineh nekali', do' lemulun luk kuan ruma' ineh iten amé' pa kiung Allah, pelé ngelio kudeng ieh pangeh nemano binaweh lun denganneh.

⁹ “Bang anid-anid besara' ratnan binaweh, do' ratnan sapi', keladai, dumba, kibung, idi binaweh anun-anun luk metutu' luk inan dueh burur singaro, idi do' didueh ineh iten amé' pa kiung Allah. Idi idé luk uen Allah ngesala' miak ngua' kuan lun denganneh libal luk ilapneh dueh kua' kinula'.

¹⁰ “Kudeng aceh lemulun maré nelun denganneh sebuleng keladai, kian sapi', dumba, aya' luk baken-baken lek, luk ruenneh ngasa', idi aya' ineh maté idi nurat idi pino dengan na lun nekali',

¹¹ idi do' ieh pebulung pa kiung Allah, idi maré luk pinutut arang didueh ineh kudeng ieh nengalap binaweh lun denganneh. Idi kudeng pung ineh na pinoneh, luk kuan aya' ineh merugi'. Lun baken na maré libalneh.

¹² Iamo' kudeng matu ieh pino rat neneh, kali' rungen ieh maré libalneh inan lemulun luk kuan ineh.

¹³ Kudeng matu ieh giramit pung luk mesangit, do' butungneh iten mangun ku aceh tanu'. Na ieh miak ngelibal neneh.

¹⁴ “Kudeng selemulun mutuh ngiceh sebuleng aya' rat nelun denganneh, idi aya' ineh murat kian maté lek kareb lemulun luk kuan ineh na idi, idi do' ieh ngelibal ineh dengan petap.

¹⁵ Iamo' kudeng luk kuan aya' ineh idi, na ieh miak ngelibal ineh. Kudeng aya' ineh maté kareb siniwa', na libal raganeh, ngaceku siwa'neh petap.

Ukum Ratnan Ulun Luk Meligan

¹⁶ “Kudeng seburur deléi ngubuk anak luk pun mebaruh luk na inan tuduk idi pamung denganneh, na miak na didueh paweh idi ieh mayar purut.

¹⁷ Kudeng tamanneh na tu-tu maré neneh paweh neneh, na miak na ieh maré usin ku purut anak luk pun mebaruh meh.

¹⁸ “Aleg iko nima' decur luk mangun ineh mulun.

¹⁹ “Idé-idé luk pamung dengan pung na miak na ieh pitayen.

²⁰ “Idé-idé luk maré luk sabpen kuan allah baken ratnan Tuhan, do' ieh pitayen.

²¹ “Idi aleg iko ngedereh lun sakai idi ngesusa' neneh. Muyuh pana' pangeh mangun ku lun sakai bang bawang Masir.

²² Aleg muyuh ngedereh decur tinula' idi anak maté.

²³ Kudeng iko nganau' kudeng ineh, idi ideh nawar Negku, kali' rungen Ui ninger tangdeh.

²⁴ Idi Ui museh, pad Ui ngaté nemuyuh bang bunu', idi awan muyuh mangun ku tinula', idi anak muyuh mangun ku anak maté.

²⁵ “Kudeng iko maré usin kebiten lun pupuKu luk masi', aleg iko mupud ineh dengan mesaad. Idi aleg ngalap bunga'neh teh.

²⁶ Kudeng iko sikal ngalap ayung lun denganmu ku duduk, na miak na iko ngelubed duduk ineh kareb nateh aco macep.

²⁷ Ngaceku ini papenneh, ieh ineh ayung luk luun bururneh. Anun luk ku tarubneh kareb ieh rudap? Idi kareb ieh nawar Negku, Ui miak ninger tawarneh. Ngaceku Ui ini méi'.

²⁸ “Aleg iko nguyo Allah, idi aleg iko ngediman aceh lun rayeh pupumu.

²⁹ “Aleg ngisiden maré babpat pulu' padému, anggurmu, idi umaumu. “Idi do' iko maré kuanKu anak deléimu luk atun.

³⁰ Kudeng ineh teh amung sapi' idi dumbamu. Tudu' aco kinioneh nima' ieh pebaya' dengan tinanneh. Idi kareb aco luk kewaluh miak iko maré neneh Negku.

³¹ “Muyuh ini pupuKu. Ngaceku ineh aleg muyuh kuman uang pung luk kikem pung luk meliput bang pulung. Do' muyuh maré ineh kuan uko'.