PURA' 20 - BALA LUK DO'

Ukum Pulu'

¹ Idi Allah nemada' amung bala ineh, kebalaNeh,

² “Ui ini Tuhan Allahmu luk pangeh nenguyut namu remuat rat bang bawang Masir, rat su luk inanmu tiban ineh.

³ “Aleg iko maya' allah baken rat Negku.

⁴ “Aleg iko nganau' akang maya' ayu anun-anun luk i langit, idi luk bang tana', idi luk bang abpa' pana'.

⁵ Aleg iko ngubur idi tekeradung sembayang ku ineh. Ngaceku Ui Ini Tuhan Allahmu luk temaruh, luk ngua' sala' amung lemulun macing ku anak idi inul luk keteluh idi luk keapat pana' ratnan amung lemulun luk megateh Negku.

⁶ Iamo' Ui ngegala' katuKu kuan ribu-ribu inul luk mawa Negku idi luk ngimet balaKu.

⁷ “Aleg neten ngadan Tuhan Allahmu mo'-mo', ngaceku Ui miak ngukum idé'-idé' luk neten ngadanKu mo'-mo'.

⁸ “Nginita iko Aco luk inan Mudeng pad iko ngeligan neneh kuan Tuhan.

⁹ Anem aco kinioneh iko ngakem kekamen luk kuan bururmu sebuleng.

¹⁰ Iamo' aco luk ketudu' ineh, ieh ineh aco luk inan Tuhan Allahmu nudeng. Kareb aco ineh aleg iko ngakem, do' iko, anakmu, idi lun tebarinmu, aya'mu, idi lun sakai luk tudo bang bawangmu.

¹¹ Ngaceku bang anem aco kinioneh, Tuhan nemudut langit, tana', idi abpa' rayeh dengan amung uangneh. Idi Tuhan nucu' bang aco luk ketudu'. Ngaceku ineh Tuhan nengeperuan Aco luk inan Mudeng ineh, idi Ieh nengeligan aco ineh kuanNeh.

¹² “Do' ngedita' tamanmu idi tinanmu, pad ulunmu mekadang bang bawang luk barén Tuhan Allah namu.

¹³ “Aleg iko ngaté.

¹⁴ “Aleg iko pasét.

¹⁵ “Aleg iko mano.

¹⁶ “Aleg iko ngadu' nelun denganmu dengan mebalih.

¹⁷ “Aleg iko melili ku ruma' lun denganmu. Aleg iko melili ku awanneh, lun tebarinneh, sapi'neh, keladaineh, idi anun-anun binaweh lun luk denganmu.”

Tot Lun Mula'

¹⁸ Idi lun mula' nekali' lalam, kilep, idi uni serupit, dengan surud luk merabpun ineh. Idi ideh negegker ku totdeh, idi tuped mado.

¹⁹ Idi kebaladeh ni Musa, “Do' iko sebuleng pebala nekai idi kai miak ninger. Iamo' aleg Allah pebala nekai, pad kai na maté.”

²⁰ Idi kebala Musa nedeh, “Aleg matot, ngaceku Allah pangeh netemurun sikal nutun nemuyuh, pad tot inan Tuhan idi kidi-kidi pa kiung muyuh, pelé muyuh na nganau' sala'.”

²¹ Idi lun mula' ineh pana' netuped mado. Iamo' Musa muneng ku laput luk medacem su luk inan Allah.

Ukum Ratnan Bubpun

²² Idi kebala Tuhan ni Musa, “Do' iko mala kuan lun Israil kudeng ini: ‘Muyuh pangeh nenier Negku nepebala nemuyuh rat langit.

²³ Ngaceku ineh aleg muyuh nganau' akang ratnan pirak idi amas nan muyuh sembayang.

²⁴ “Nganau' kuanKu aceh bubpun ratnan tana' idi maré pa luunneh amung baré luk sabpenmu, idi amung baré luk nguit pedo', ieh ineh dumba idi sapi'. Idi anid-anid su luk uenKu ngeletep luk nan muyuh sembayang Negku, su ineh Ui temurun ngeperuan namu.

²⁵ Idi kudeng iko pian nganau' kuanKu aceh bubpun ratnan batu, aleg iko nganau' neneh ratnan batu luk pangeh kinuer, ngaceku kareb iko nguer batu ineh, idi iko ngelutak neneh.

²⁶ Idi teh aleg uké ican umak bubpunKu pad luk ku igu'mu na melagan.’ ”