PURA' 2 - BALA LUK DO'

Musa Tinganak Idi Inulun

¹ Seburur lun Liwi nengaweh aceh decur ratnan pupuneh sebuleng.

² Idi decur ineh mali' idi ieh nenganak aceh anak deléi. Kareb ieh nenier anak ineh do', idi ieh nengapung neneh teluh bulan kinioneh.

³ Iamo' na ieh miak mapung teh. Idi decur ineh nengalap aceh pati' inau ratnan bulu' puren, idi ieh nengamut neneh do'-do' pad abpa' na semuet. Idi ieh nenganau' anak ineh bang pati' ineh idi ieh nengerareng neneh iring tangeb abpa' su luk mapet.

⁴ Kinanakneh aceh rayeh tuped mado nier kudeng apeh luk mangun.

⁵ Anak decur raca' Masir netemurun amé' diu' bang Abpa' Nil, idi tuda'-tuda' demulunneh lawé-lawé tangeb abpa' ineh. Idi denak-denak ieh nenier aceh pati' su luk mapet iring tangeb. Idi ieh nengecuk demulunneh luk decur amé' ngalap pati' ineh.

⁶ Kareb ieh nengukab ineh idi ieh nenier aceh anak deléi, idi anak ineh nangi'. Idi anak raca' ineh pelaba éi' neneh, kebalaneh, “Ini anak lun Iberani.”

⁷ Idi kinanak anak ineh nengitun neneh, “Miakké ui amé' mada' aceh decur lun Iberani luk miak niti' anak ineh kuanmu?”

⁸ Idi kebala anak raca' neneh, “Miak.” Idi decur ineh iné' kidi inan tinan anak ineh.

⁹ Idi kebala anak raca' neneh, “Itenmu anak ini, tetienmu kuanku. Ui miak maré tabpar namu.” Idi decur ineh nengalap anak ineh idi neniti' neneh.

¹⁰ Kareb anak ineh pangeh rayeh, idi ieh inuitneh amé' matun anak raca' ineh. Idi ieh nengasa' neneh mangun ku anakneh. Idi ieh nenganau' ngadanneh Musa, kebalaneh, ngaceku ieh luk ilapku rat bang abpa'.”

Musa Buro Amé' Bawang Midian

¹¹ Kareb Musa pangeh rayeh, ieh iné' ngikak pupuneh, idi nier kudeng apeh ikat kekamendeh. Idi ieh nenier aceh lun Iberani bebalen lun Masir, ieh ineh seburur lun pupuneh.

¹² Idi ieh nelemiget nier na lemulun. Idi ieh nengaté lun Masir ineh, idi ieh nengapung butungneh liang bada.

¹³ Idi kenebpa ieh iné' baruh teh. Idi ieh nenier dueh lun Iberani uned pekedaluh. Idi kebalaneh kuan luk sala' ineh, “Dedatenmu ku anun lun denganmu?”

¹⁴ Idi ieh nengor balaneh, “Idéké luk nenganau' namu mangun ku raca' idi lun luk mutut ukum kuan kai? Iko pian ngaté negku teh kudeng patému nelun Masir luk atun di?” Idi Musa matot. Ieh ngerawé ieh pangeh nekali'deh nengaté.

^15-16 Idi bala ini nekali' raca' peh. Idi ieh nakap dalan pian ngaté ni Musa. Iamo' Musa neburo iné' bawang Midian. Idi imam bawang Midian inan tudu' anak decur. Idi kareb Musa netudo muneng ku subuk, idi ideh nacing amé' ngook abpa', ruendeh bang bau' rupen aya' tamandeh.

¹⁷ Iamo' nacing tuda'-tuda' lun matar aya' nengusu nedeh. Idi petacu Musa iné' nengan nedeh idi nemaré aya'deh ngirup.

¹⁸ Kareb ideh nacing inan tamandeh, kebalaneh nedeh, “Ngudeh muyuh muka muli' aco sini?”

¹⁹ Idi kebaladeh, “Inan aceh lun Masir luk nemuit nekai rat nelun matar aya' ineh. Idi teh ieh nengook abpa' kuan kai, idi ieh nemaré abpa' rupen aya' pana'.”

²⁰ Idi kebala Ruel nedeh, “Iapehké ieh? Ngudeh muyuh nima' neneh déi'? Nawar neneh kuman dengan tau.”

²¹ Idi Musa pian tebawang déi'. Idi Ruel nemaré anakneh luk ngadan Sipora ku awan Musa.

²² Idi ieh nenganak aceh anak deléi. Idi Musa neneten ngadanneh Gersom, kebalaneh, “Ngaceku pangeh ui mangun ku aceh lun sakai bang bawang baken.”

²³ Mio pangeh ineh idi raca' Masir naté. Idi lun Israil nengarod idi nengitang, ngaceku kekamendeh meberat. Idi kareb ideh nemutuh mepuit ratnan dereh, tangi'deh pindenger Allah.

²⁴ Idi Allah neninger aroddeh ineh, idi Ieh nengerawé jani'Neh dengan Ibrahim, Isak, idi Yakub.

²⁵ Idi Ieh nenier dereh lun Israil, idi Ieh temina' muit nedeh.