PURA' 19 - BALA LUK DO'

Lun Israil Déi' Pegkung Sinai

^1-2 Lun Israil nenalan rat Repidim, idi aceh aco bulan luk keteluh rat pangeh ideh neremuat rat bang bawang Masir, ideh nacing su luk ali-ali déi' Sinai. Idi lun Israil nucu', idi nelupo petatang ratnan surud ineh.

³ Idi Musa uké surud amé' papu' Allah. Idi Tuhan nenawar neneh rat luun surud, kebalaNeh, “Mada' nelun Israil, ieh ineh inul Yakub, kudeng ini,

⁴ ‘Muyuh pangeh nenier luk pangeh inau'Ku kuan lun Masir. Ui pangeh nemabeh nemuyuh mepad kudeng kanui nguit anakneh luun iladneh. Idi Ui pangeh nengacing nemuyuh Negku.

⁵ Idi nekini, kudeng muyuh maya' balaKu, idi ngimet pejani'Ku, idi muyuh mangun ku pupuKu. Ngaceku amung tana' pana' Ui luk kuan ineh. Iamo' muyuh mangun ku pupu luk pinili'Ku.

⁶ Idi muyuh mangun ku sebuleng pupu luk meligan kuanKu. Idi muyuh miak ngakem kekamen imam.’ ”

⁷ Idi Musa netemurun idi nenawar amung lun rayeh pupu ineh. Idi amung bala luk biré Tuhan kuanneh ineh icingneh kuandeh.

⁸ Idi amungdeh ineh peranga' nengor, kebaladeh, “Amung bala luk biré Tuhan, ieh ineh bén kai!” Idi Musa nengacing amung bala lun mula' inan Tuhan.

⁹ Idi kebala Tuhan ni Musa, “Ui temurun amé' namu bang aceh laput luk mekapal, idi lun mula' miak ninger kareb Ui pebala namu, pad ideh merapet namu macing ruked-ruked.” Idi Musa nengacing amung bala lun mula' ineh inan Tuhan.

¹⁰ Idi kebala Tuhan ni Musa, “Amé' iko nelun mula' ineh. Do' ideh temina' aco sini idi nebpa teh, idi mupu' ayungdeh,

¹¹ pad ideh temina' sembayang aco luk keteluh. Ngaceku aco luk keteluh ineh Ui temurun luun Pegkung Sinai idi siren amung-amungdeh.

¹² Ngaceku ineh do' iko nganau' ibpeng libut Pegkung Sinai kuan pupu ineh idi mada', ‘Nginita do'-do'. Aleg muyuh uké pegkung ini idi ngeradu' iringneh pana' nateh miak. Idé luk ngeradu' pegkung ini kali' rungen ieh pitayen,

¹³ idi sebuleng pana' nateh miak ngakem neneh. Do' ieh bitungin ku batu, kian uen ngelatik ku binor macing maté dengan na kamen, do' pung do' lemulun pana'.’ Idi kareb serupit ineh muni, miak ideh uké pegkung ineh.”

¹⁴ Idi Musa netemurun rat luun pegkung iné' matun lun mula' ineh. Idi ieh nengecuk nedeh temina' sembayang. Idi ideh nemupu' ayungdeh.

¹⁵ Idi kebala Musa nelun mula' ineh, “Temina' muyuh aco luk keteluh. Seburur pana' na miak pamung inan decur.”

¹⁶ Idi aco luk keteluh ineh kareb uka-uka inan tuda'-tuda' kilep idi purét pa luun pegkung ineh, idi laput luk mekapal, dengan uni serupit luk meluun rayeh, pad amung lemulun luk bang lepo-lepo megegker.

¹⁷ Idi Musa nenguit lun mula' ineh remuat rat bang lepo-lepo sikal maré nedeh amé' papu' Allah. Idi ideh netuped pa beneh pegkung ineh.

¹⁸ Idi amung Pegkung Sinai ineh pana' merabpun. Ngaceku Tuhan netemurun ieneh bang apui. Idi rabpunneh kemikit mepad kudeng rabpun bubpun. Idi pegkung ineh meruyuh.

¹⁹ Idi kareb uni serupit iuk rayeh, idi Musa nepebala inan Allah. Idi Allah nengor balaneh bang lalam.

²⁰ Kareb Tuhan pangeh netemurun nan Pegkung Sinai, idi Tuhan nenawar Musa amé' luun buduk pegkung. Idi ieh iné'.

²¹ Idi kebala Tuhan neneh, “Temurun iko ngecuk lun mula' ineh aleg ngusag ar idi amé' muneng inan Tuhan sikal nier Neneh, pad lemulun na maté.

²² Idi do' amung imam luk amé' matun Tuhan ineh ngeligan bururdeh pad Tuhan na museh nedeh.”

²³ Idi kebala Musa inan Tuhan, “Lun mula' na miak uké Pegkung Sinai ini, ngaceku Tuhan pangeh nepebala negku kudeng ini, ‘Nganau' ibpeng pekelibut pegkung ineh idi ngeligan neneh.’ ”

²⁴ Idi kebala Tuhan ni Musa, “Temurun iko. Muci iko lemubed dengan Arun. Iamo' amung imam idi lun mula' ineh aleg ngusag ar pian amé' matun Tuhan pad ideh na inan Tuhan museh.”

²⁵ Idi Musa netemurun iné' matun lun mula' ineh, idi ieh nengacing amung bala ineh nedeh.