PURA' 16 - BALA LUK DO'

Manna Idi Suit Tetibung

¹ Amung lun Israil nenalan rat Elim, idi pulu' limeh aco bulan luk kedueh litad ideh nenalan rat Masir, idi ideh nacing su luk ali-ali déi' Sin, luk arang Elim idi Sinai.

² Déi' su luk ali-ali ineh amungdeh nengedureng ni Musa idi Arun.

³ Kebaladeh nedidueh, “Adui! Meluun do' kai pinaté Tuhan déi' tana' Masir, kareb kai tudo iring periuk luk inan uang, idi kuman ruti pad mebor. Ngaceku medueh nenguit nekai amé' su luk ali-ali, pad ngaté amung kai ini dengan melau.”

⁴ Kebala Tuhan ni Musa, “Nekini Ui ngebpeh rat langit akan kuan muyuh, idi lun mula' miak remuat idi ngamung anid-anid aco petap kuan seaco pad Ui miak nutun nedeh, ku maya' ideh ukumKu, kian na.

⁵ Idi kareb aco luk keanem, kareb ideh ngalak anun luk inuitdeh nuli', idi luk inuitdeh ineh dueh kua' ula' ratnan luk uendeh ngamung seaco.”

⁶ Idi kebala Musa idi Arun nelun Israil, “Malem ini muyuh miak kali' Tuhan luk pangeh nenguit nemuyuh remuat rat bang bawang Masir,

⁷ idi pekak nebpa muyuh kali' rayeh Tuhan. Ieh pangeh neninger dureng muyuh Neneh. Baken muyuh ngedureng nekai dueh. Na kai dueh mekudeh ku ineh.”

⁸ Idi teh kebala Musa, “Tuhan miak maré nemuyuh kuman uang kareb pa malem, idi kuman ruti pad mebor, macing pekak, ngaceku Ieh pangeh neninger dureng muyuh Neneh. Kareb muyuh ngedureng nekai dueh, setuneh muyuh ngedureng nan Tuhan!”

⁹ Idi kebala Musa ni Arun, “Ngecuk amung lun Israil tuped pa kiung Tuhan, ngaceku Ieh pangeh neninger durengdeh.”

¹⁰ Idi kareb uned Arun mada' nedeh, idi kiungdeh lemiget sium pa su luk ali-ali. Idi denak-denak rasat Tuhan nesilagan bang laput.

¹¹ Idi kebala Tuhan ni Musa,

¹² “Ui pangeh neninger dureng lun Israil. Mada' nedeh, kebalamu, ‘Idi kareb pun malem, muyuh miak kuman uang, idi kareb pa pekak muyuh miak kuman ruti pad macing mebor, pelé muyuh kali' Ui ini Tuhan Allah muyuh!”

¹³ Kareb malem idi suit tetibung nacing, idi nengaput su luk inan nelupo ineh. Idi kareb pekak, inan ipup libut-libut lepodeh.

¹⁴ Kareb ipup ineh netekering, idi inan luk ketecan luun tana' luk melipi mepad kudeng rara, kudeng ayu ipup teh.

¹⁵ Kareb lun Israil nenier ineh, idi kebaladeh seburur inan seburur, “Anunké ini?” Kebala Musa nedeh, “Ini akan luk biré Tuhan kuan muyuh.

¹⁶ Tuhan ngecuk ngamung ineh, anid-anid burur maya' kudeng apeh luk petap kuanneh. Anid-anid muyuh ngalap petap kuan uang leponeh, setangal gatang seburur.”

¹⁷ Idi lun Israil nenganau' kudeng ineh. Idi ideh nengamung, inan luk mula', inan luk sesuut.

¹⁸ Kareb ideh nenguad ineh, idi lemulun luk nengamung mula' na miak uen ngela, idi lun luk nengamung sesuut na miak na petap. Anid-anid lemulun ngamung maya' luk petap.

¹⁹ Idi kebala Musa nedeh, “Seburur pana' na miak necan elaneh macing pekak.”

²⁰ Iamo' inan teh luk na maya' bala Musa, idi nenecan elaneh macing pekak, pad inan uled idi mebuen. Idi Musa museh nedeh.

²¹ Anid pekak ideh nengamung anid-anid burur maya' luk petap. Iamo' kareb aco mét idang, idi ieh nubpa'.

²² Idi aco luk keanem ideh nengamung akan ineh dueh kua' ula', segatang kuan anid-anid burur. Idi nacing amung lun rayeh idi nemaré kali' ni Musa.

²³ Idi kebala Musa nedeh, “Ini luk bida' Tuhan: ‘Nebpa Aco luk inan Mudeng, aco luk meligan kuan Tuhan. Akan luk pian muyuh dedangen, nadang neneh. Anun luk pian muyuh tinaken, nanek neneh. Idi amung elaneh nima' ieh su ineh, macing pekak nebpa.’ ”

²⁴ Idi ideh nenima' neneh su luk inanneh macing pekak kenebpa kudeng luk bida' Musa nedeh. Idi na luk mebuen, idi na luk inan uled peh.

²⁵ Idi kebala Musa, “Kuman ineh aco sini, ngaceku aco sini Aco Rayeh kuan Tuhan. Aco sini na muyuh miak ngalap ineh déi' natad.

²⁶ Kinio anem aco mo' muyuh ngamung ineh. Iamo' kareb aco luk ketudu', ieh ineh Aco luk inan Mudeng, idi akan ineh na mebpeh aco sineh.”

²⁷ Iamo' kareb aco luk ketudu', sebuang lun Israil nenalan pian ngamung akan. Iamo' na luk ilapdeh.

²⁸ Idi kebala Tuhan ni Musa, “Tuda' io muyuh na maya' balaKu?

²⁹ Do' ngerawé, Ui ini Tuhan nemaré Aco luk inan Mudeng kuan muyuh. Ini punneh kareb aco anem Ui maré kuan muyuh ruti petap dueh aco. Do' muyuh tudo idi na nalan kareb aco luk ketudu' ineh.”

³⁰ Idi ideh nucu' aco luk ketudu'.

³¹ Idi lun Israil neneten ngadan akan ineh manna. Ayuneh mepad kudeng aceh ilung luk medari idi mebuda', idi ieh mén mepad kudeng pinaram luk pinuar ku duru'.

³² Idi kebala Musa, “Tuhan nengecuk netau manu' aceh sidangur ku manna luk miak nugen kuan inul tau, pad ideh miak nier akan luk biréNeh kenen tau déi' su luk ali-ali, kareb Ieh nenguit netau remuat rat bang bawang Masir.”

³³ Kebala Musa ni Arun, “Ngalap aceh sidangur, idi nganau' setangal manna bang ineh. Idi ngerareng ineh pa kiung Tuhan, nugen kuan inul tau.”

³⁴ Maya' kudeng luk icuk Tuhan ni Musa, Arun nengerareng ineh pa atun Pati' Pejani', pad miak nugen peh.

³⁵ Lun Israil nekuman manna apat ngepulu' lak kinioneh pad ideh nacing bawang Kanaan su luk inandeh tebawang. (

³⁶ Idi setangal gatang, ieh ineh babpat pulu' uad luk pikaideh kareb ineh.)