PURA' 15 - BALA LUK DO'

Nani Musa

¹ Kareb ineh Musa idi lun Israil nemenani nani ini kuan Tuhan: “Ui sikal menani kuan Tuhan, ngaceku rayeh tu laludNeh; pangeh Ieh nemepet kuda dengan lun luk maya' ineh bang abpa'.

² Tuhan ineh tuehku; idi Ieh luk nengulun negku. Ieh ineh Allahku, idi ui sikal ngubur Neneh. Ieh Allah tamanku, idi ui sikal ngerayeh Neneh.

³ Idi Tuhan ineh Lun Rayeh Baweh; Tuhan, ieh ineh ngadanNeh.

⁴ “Amung baweh Masir dengan kerétadeh pangeh tila'Neh bang abpa' rayeh. Idi lun rayehneh luk meluun tueh pangeh tiremNeh bang Abpa' Pisui.

⁵ Abpa' rayeh pangeh nengereb nedeh. Ideh mepad kudeng tarem batu bang ribaruh.

⁶ O Tuhan, rayeh lalud langenMu pa tinueh. Ku ineh Iko pangeh nengelaya' amung bunu'!

⁷ Dengan rayeh laludMu, Iko pangeh nengaté amung bunu'Mu. UsehMu mebudung pad ngeseb nedeh, mepad kudeng uduh luk tekering.

⁸ Iko nengiup luun abpa' rayeh, pad abpa' kemubul. Idi abpa' ineh tuped mepad kudeng alad; amung lipak nugkeng uned abpa' ineh.

⁹ Idi kebala bunu' ineh, ‘Ui ngerada' nedeh, pad ngigket nedeh; ui mabpat binawehdeh, idi ngalap luk pianku. Ui ngangat pelapetku; langenku miak ngaté nedeh.’

¹⁰ Iamo' Iko nemebper buiMu, pad lun Masir ineh nened. Ideh neturem mepad kudeng semara' bang lipak luk rayeh.

¹¹ “O Tuhan, idé luk mepad kudeng Iko arang amung allah? Idé luk mepad kudeng Iko, luk rayeh bang ligan? Idé luk nganau' tanu' idi kekamen luk melalud mepad kudeng luk inau'Mu?

¹² Iko natang langenMu pa tinueh, pad tana' nenelen bunu' kai.

¹³ Dengan awaMu Iko nguyut pupu luk pangeh inuli'Mu. Dengan tuehMu Iko nguyut nedeh macing inan su luk inanMu luk meligan.

¹⁴ Amung pupu ninger, pad ideh megegker. Idi lun Pilistin pelaba tot.

¹⁵ Idi lun rayeh-rayeh Edom matot; idi lun rayeh-rayeh Moab pana' megegker; idi lun Kanaani pana' na mekuu' peh.

¹⁶ Gagap idi gegker macing nedeh. Ideh nier tuehMu O Tuhan, pad ideh melaya' ku totdeh, pad macing amung pupuMu guta, O Tuhan, idi amung pupuMu semuet bang bawang Kanaan.

¹⁷ Iko nguit nedeh semuet idi ngeletep nedeh luun surudMu, su luk pijani'Mu inanMu mudeng, O Tuhan, Su luk Meligan luk pangeh riniput ticu'Mu.

¹⁸ O Tuhan, Iko raca' macing ruked-ruked.”

Nani Miriam

¹⁹ Lun Israil nenalan su luk netekering nan uned abpa' ineh. Iamo' kareb keréta lun Masir, dengan kuda idi lun luk ngimet ineh nacing bang abpa', idi Tuhan nengelubed abpa' pa luundeh.

²⁰ Idi Nabi Miriam, kinanak Arun luk decur ineh, nengalap karingneh, idi amung decur pana' nemaya' neneh, idi ngura' karing idi ngalai.

²¹ Idi Miriam menani kuandeh, kenanineh, “Ngubur Tuhan ngaceku pelaba rayeh laludNeh. Kuda idi lun luk tudo luunneh, pangeh tila'Neh bang abpa'.”

Bued Abpa' Luk Mepét

²² Pangeh ineh idi Musa nenguit nelun Israil nalan rat Abpa' Pisui ineh, macing déi' su luk ali-ali luk titen Sur. Idi ideh nenalan déi' su luk ali-ali ineh teluh aco kinioneh. Iamo' na luk idi abpa'.

²³ Idi ideh nacing déi' Mara, su luk inan abpa' luk mepét pad na miak rupen. Ngaceku ineh ideh neneten ngadan su ineh Mara.

²⁴ Kareb ineh idi pupu ineh ngedureng ni Musa, kebaladeh, “Anunké luk rupen tau?”

²⁵ Idi Musa nesembayang inan Tuhan. Idi Tuhan nemada' su sirenneh aceh kayuh. Idi ieh nenganau' ineh bang abpa'. Petacu abpa' ineh metalang. Idi su ineh Tuhan nemaré ukum nedeh, idi su ineh teh Ieh nenutun nedeh.

²⁶ KebalaNeh nedeh, “Kudeng matu-matu muyuh maya' balaKu idi nganau' luk matu pa kiungKu idi ngimet amung ukumKu, na Ui ngukum nemuyuh ku ét luk icingKu kuan lun Masir ineh. Ui ini Tuhan luk ngedo' ét muyuh.”

²⁷ Idi ideh nacing déi' Elim. Su ineh inan pulu' dueh bued abpa' idi tudu' ngepulu' lawa piasau. Idi ideh nelupo su ineh muneng ku abpa' ineh.