PURA' 14 - BALA LUK DO'

Ideh Guta Abpa' Pisui

¹ Kebala Tuhan ni Musa,

² “Ngecuk nelun Israil lemubed idi lupo pa atun Pi Hakirot, arang Migedol idi Abpa' Pisui, muneng ku Baal Sepon.

³ Idi raca' Masir miak ngerawé nelun Israil pangeh neraruh déi' bawang ineh, idi ideh neta su luk ali-ali.

⁴ Ui ngetueh niat raca' pad ieh miak ngerada' nedeh, idi Ui ngelaya' neneh idi amung bawehneh. Ui sikal ngegala' laludKu, pad lun Masir ineh kali' Ui ini Tuhan.” Idi lun Israil nenganau' maya' kudeng luk bila Tuhan.

⁵ Kareb raca' Masir pangeh nekali' pupu ineh pangeh neburo, idi niat raca' idi lun tarehneh nepekisu', kebaladeh, “Anunké luk mau' tau? Tau nenima' demulun tau lun Israil buro.”

⁶ Idi raca' nengecuk nedeh netemina' ku kerétaneh idi bawehneh.

⁷ Idi ieh nenguit anem ngeratu keréta luk meluun do', idi amung keréta luk baken dengan amung lun luk ngimet keréta teh.

⁸ Idi Tuhan nengetueh niat raca' Masir, pad ieh nengerada' nelun Israil, kareb ideh nepura' maya' kuyut Tuhan.

⁹ Idi lun Masir dengan amung kuda, keréta, lun luk maya' kuda, idi baweh raca', nengerada' nedeh, idi nengigket nedeh kareb ideh nelupo tangeb abpa' muneng ku Pi Hakirot idi Baal Sepon.

¹⁰ Kareb lun Israil nenier raca' Masir idi bawehneh amé' matun nedeh, idi ideh pelaba tot, idi ideh ngitang-ngitang nan Tuhan.

¹¹ Kebaladeh ni Musa, “Naké inan tanem déi' Masir, pad iko nguit nekai maté déi' su luk ali-ali? Anunk'e luk inau'mu nekai, pad iko nguit nekai remuat rat bang bawang Masir?

¹² Naké kai nekidi namu déi' bawang Masir, ‘Aleg ngagau nekai. Nima' nekai ngakem kuan lun Masir?’ Ngaceku meluun do' kai ngakem kuan lun Masir ratnan kai maté déi' su luk ali-ali.”

¹³ Iamo' kebala Musa nedeh, “Aleg muyuh matot! Tuped meraben, idi nier puit luk ratnan Tuhan luk Ieh maré aco sini kuan muyuh. Ngaceku lun Masir luk muyuh nier aco sini, na muyuh miak nier nedeh ruked-ruked.

¹⁴ Tuhan luk pebunu' libal muyuh, idi muyuh ungeng mo'!”

¹⁵ Idi kebala Tuhan ni Musa, “Ngudehké iko ngitang mutuh pedengan? Ngecuk nelun Israil nalan.

¹⁶ Ngegenang rukudmu pa luun abpa'. Idi abpa' ineh miak mepatad, pad lun Israil nalan uned abpa' ineh su luk metekering.

¹⁷ Iamo' Ui ngetueh niat lun Masir, pad ideh miak ngerada' nelun Israil, idi ngelaya' raca' Masir idi amung bawehneh, kerétaneh, idi lunneh luk maya' kuda.

¹⁸ Kareb Ui ngelaya' nedeh, idi lun Masir miak kali' Ui ini Tuhan.”

¹⁹ Idi melaikat Allah luk nalan pa atun baweh Israil, nemubuh iné' pa puet. Idi teh diri laput ineh pana' nemubuh rat pa atundeh,

²⁰ pad diri ineh netuped arang baweh lun Masir idi lun Israil. Laput ineh nengedacem nelun Masir ineh, iamo' ieh nemaré acang nelun Israil, pad baweh dueh pupu ineh na miak mepapu' kedangen-kedangen ineh.

²¹ Musa nengegenang ticu'neh pa luun abpa'. Idi Tuhan nengelubed abpa' ineh ku aceh bui luk metueh rat pa busat aco kedangen-kedangen ineh. Idi abpa' pana' nepatad.

²² Idi lun Israil nemaya' su luk netekering ineh. Idi abpa' ineh pa tinueh idi pa kabingdeh mepad kudeng alad.

²³ Lun Masir nengerada' nedeh macing ku uned abpa' ineh, dengan amung kuda, keréta, idi lun luk ngimet keréta ineh.

²⁴ Iamo' kareb nateh masat aco, idi Tuhan nenier baweh lun Masir rat bang diri apui idi laput ineh. Idi Ieh nengagap baweh lun Masir ineh pad ideh megagau.

²⁵ Idi Ieh nengagka' roda amung kerétadeh, pad na miak mawer. Idi kebala lun Masir, “Do' tau buro rat pa kiung lun Israil, ngaceku Tuhan luk pebunu' netau ku libaldeh.”

²⁶ Kebala Tuhan ni Musa, “Ngegenang langenmu pa luun abpa', pad abpa' ineh lemubed pa luun amung lun Masir dengan amung kerétadeh idi lun luk ngimet keréta ineh.”

²⁷ Idi Musa nengegenang langenneh pa luun abpa', pad abpa' ineh pana' nepetuneb peh, ieh ineh kareb aco masat. Idi lun Masir nutun buro rat bang abpa' ineh. Iamo' Tuhan nenala' nedeh bang abpa'.

²⁸ Kareb abpa' ineh nepetuneb idi amung keréta ineh inereb, dengan lun luk ngimet keréta idi amung baweh raca' Masir luk pangeh nengerada' nelun Israil macing bang abpa' ineh. Sebuleng pana' rat arangdeh nateh luk mulun.

²⁹ Iamo' amung lun Israil nenalan su luk netekering uned abpa'. Idi abpa' ineh mangun ku aceh aladdeh pa tinueh idi pa kabingdeh.

³⁰ Bang aco sineh Tuhan nemuit nelun Israil rat bang palad lun Masir. Idi lun Israil nenier nelun Masir nabud naté nened bang abpa'.

³¹ Idi kareb ideh nenier tanu' luk melalud luk inau' Tuhan kuan lun Masir ineh, idi ideh matot inan Tuhan. Idi ideh manu inan Tuhan idi ni Musa, demulunNeh ineh.