PURA' 13 - BALA LUK DO'

Anak Luk Atun Barén Kuan Tuhan

¹ Kebala Tuhan ni Musa,

² “Ngeligan amung anak deléi luk atun kuanKu. Anid anak deléi lun Israil luk atun, idi anak pung luk atun pana', Ui luk kuan nedeh.”

Irau Ruti Luk Na lamud

³ Idi kebala Musa nelun mula', “Ngerawé muyuh aco sini, ieh ineh aco luk inan muyuh mepura' rat Masir, rat su luk inan muyuh tiban. Dengan laludNeh Tuhan nguit nemuyuh mepura' rat ieni. Ruti luk pinuar ku lamud ineh na miak kenen.

⁴ Muyuh remuat rat bang bawang Masir aco sini teh, ieh ineh aceh aco bulan Abib.

⁵ Idi Tuhan nepejani' nan tepun muyuh maré tana' lun Kanaani, lun Hiti, lun Amori, lun Hiwi, idi lun Yebusi nemuyuh. Tana' ineh do' idi mebaleng. Kareb ieh nguit nemuyuh semuet bang bawang ineh, idi do' muyuh ngerayeh irau ini bang bulan luk pun-pun anid lak.

⁶ Tudu' aco kinioneh, do' muyuh kuman ruti luk na lamud. Idi aco luk ketudu' ineh mangun ku aceh aco rayeh kuan Tuhan.

⁷ Tudu' aco kinioneh, do' muyuh kuman ruti luk na lamud. Sesuut pana' luk pinuar ku lamud nateh miak siren muyuh aput bawang muyuh.

⁸ Kareb pun irau ineh, do' muyuh mada' kuan anak deléi muyuh, kebala muyuh, ‘Amung ini luk inau' Tuhan kuanku kareb ui neremuat rat bang bawang Masir.’

⁹ Nima' ini mangun mepad kudeng aceh tanu' luun ticu'mu, idi aceh terawé luun madu'mu — pad iko megéi' pebala ratnan ukum Tuhan — ngaceku dengan laludNeh, Tuhan pangeh nenguit namu remuat rat bang bawang Masir.

¹⁰ Do' muyuh ngimet dalan ini luk litep karebneh anid-anid lak.”

Anak Luk Atun

¹¹ “Tuhan miak nguit nemuyuh semuet bang bawang lun Kanaani, maya' kudeng luk pijani' inan tepun muyuh. Kareb bawang ineh pangeh biréNeh nemuyuh,

¹² idi na miak na muyuh maré inan Tuhan amung anak deléi luk atun. Idi teh amung anak deléi aya' muyuh luk atun, Tuhan kuan.

¹³ Iamo' amung anak deléi keladai muyuh luk atun uen ngelibal ku anak dumba. Kudeng ayu muyuh na nguli' neneh, na miak na muyuh mutul dierneh. Iamo' ratnan lemulun, amung anak deléi luk atun, do' muyuh nguli'.

¹⁴ Idi muci kareb anak muyuh ngitun nemuyuh, ‘Anunké ini?’ do' muyuh mada' nedeh, ‘Tuhan nenated nekai remuat rat bang bawang Masir rat su luk inan kai tiban ineh ku ticu' luk melalud.

¹⁵ Idi kareb raca' Masir pangeh metueh niat na nemaré nekai nalan, idi Tuhan nengaté amung anak deléi luk atun bang bawang Masir, anak lemulun luk atun macing ku anak pung luk atun. Ngaceku ineh ui maré inan Tuhan amung deléi ratnan amung pung luk tinganak pun-pun. Iamo' amung anak deléiku luk atun ineh uenku nguli'.’

¹⁶ Nima' ini mangun ku tanu' luun ticu'mu idi ku tanu' siren luun madu'mu, ngaceku Tuhan pangeh nenated nekai remuat rat bang bawang Masir ku ticu' luk melalud.’ ”

Diri Laput Idi Diri Apui

¹⁷ Kareb raca' Masir nemaré nelun mula' nalan, idi Allah na nated nedeh maya' dalan bawang lun Pilistin, sagan tu pana' muneng, ngaceku terawé Allah, “Na Ui pian lun mula' ineh nginuud idi lemubed amé' bawang Masir, kareb ideh nier bunu'.”

¹⁸ Iamo' Allah nenated nedeh inan lisangen dalan luk amé' déi' su luk ali-ali muneng ku Abpa' Pisui. Idi lun Israil ineh pana' nenalan remuat rat bawang Masir dengan ayung pebunu'.

¹⁹ Idi Musa nenguit amung tulang Yusup maya' nedeh. Ngaceku Yusup neperiteteng nelun Israil, pad ideh nepejani' nganau' kudeng ineh. Kebala Yusup, “Kareb Allah muit nemuyuh, do' muyuh nguit tulangku maya' nemuyuh rat ieni.”

²⁰ Idi ideh nenalan rat Sukot idi nucu' déi' Etam, muneng ku su luk ali-ali ineh.

²¹ “Idi kareb acang aco Tuhan nenalan pa atundeh, bang aceh diri laput, pad nguyut nedeh nalan, idi kareb medacem bang aceh diri apui pelé ngacang nedeh pad ideh miak nalan, do' macang idi medacem pana'.

²² Idi diri laput ineh kareb macang aco, idi diri apui ineh kareb medacem na tu milep pa kiung pupu ineh.