PURA' 12 - BALA LUK DO'

Irau Paska

¹ Kebala Tuhan ni Musa idi Arun déi' bawang Masir,

² “Bulan ini mangun ku bulan luk pun-pun kuan muyuh bang anid-anid lak.

³ Mada' kuan amung-amung lun Israil kudeng ini: Kareb pulu' aco bulan ini, do' anid-anid muyuh ngalap sebuleng anak dumba maya' kinula' bang tetek ruma', ieh ineh sebuleng anak dumba kuan seruma'.

⁴ Iamo' kudeng setetek na petap ula' ngalap sebuleng dumba, do' ieh pamung dengan lemulun luk pelengit ruma' neneh. Do' maya' kinula' uang ruma', pad dumba ineh mabud kenendeh amung.

⁵ Idi do' ngalap aceh anak dumba, kian anak amék lek luk do' ulun, ieh ineh deléi luk ulun selak.

⁶ Do' muyuh ngata neneh macing aco luk kepulu' apat bulan ini. Idi do' amung-amung lun Israil ngeret anak dumba ineh kareb malem aco.

⁷ Idi dara'neh lapen idi ruen ngisit mop munung tanga' idi pa dita' teh, ieh ineh bang ruma' luk inandeh kuman.

⁸ Idi alem ineh do' ideh kuman uang luk didang luun apui dengan ruti luk na pinuar ku lamud idi dengan irin luk mepét.

⁹ Aleg muyuh kuman neneh mata' idi tinanek, iamo' do' ieh dedangen dengan uluhneh, kukudneh, idi tinéi' neh.

¹⁰ Iamo' aleg muyuh necan tecehneh macing pekak. Do' ngeseb ineh.

¹¹ Idi do' muyuh kuman ineh dengan mesaget: dengan awa' muyuh betin, kukud muyuh inan kasut, idi rukud bang palad muyuh. Ieh ineh Irau Paska Tuhan.

¹² “Bang alem ineh Ui lemaba bawang Masir, idi ngaté anak luk atun, lemulun macing ku pung. Ui ngacing ukumKu kuan amung akang lun Masir. Ui ini Tuhan.

¹³ Idi dara' luk munung tanga' ineh mangun ku aceh tanu', pad ngegala' anid-anid ruma' su luk inan muyuh. Kareb Ui nier dara' ineh, idi Ui lemaba nemuyuh, pad dereh ineh na miak ngedat nemuyuh kareb Ui ngukum bawang Masir ineh.

¹⁴ Idi aco sini mangun ku aceh terawé kuan muyuh. Do' muyuh ngerayeh aco sineh kuan Tuhan macing ruked-ruked.

Irau Ruti Luk Na Lamud

¹⁵ “Do' muyuh kuman ruti luk na pinuar ku lamud tudu' aco kinioneh. Iamo' aco luk pun-pun do' muyuh nala' amung lamud rat bang ruma' muyuh. Ngaceku lemulun luk kuman luk pinuar ku lamud kareb aco luk pun-pun macing aco luk ketudu' ineh, ieh miak uen ngatad rat arang lun Israil.

¹⁶ Idi kareb aco luk pun-pun, idi aco luk ketudu' pana', inan tebubpun sembayang. Bang aco sineh na muyuh miak ngakem. Iamo' anun luk kenen miak ruen muyuh.

¹⁷ Do' ngimet aco luk inan kuman ruti luk na lamud, ngaceku aco sineh Ui nguit amung baweh muyuh remuat rat bang bawang Masir. Iamo' ngimet muyuh aco sineh macing ku anak inul, mangun ku aceh terawé luk meruked.

¹⁸ Pulu' apat aco bulan luk pun-pun, kareb malem aco, do' muyuh kuman ruti luk na pinuar ku lamud pad macing dueh ngepulu' aceh aco bulan kareb malem.

^19-20 Tudu' aco kinioneh na miak inan lamud bang ruma' muyuh, ngaceku idé luk kuman luk pinuar ku lamud, ieh uen ngatad rat arang lun Israil, do' ieh lun sakai, do' ieh lun Israil pana'.”

Irau Paska Luk Pun-Pun

²¹ Musa nenawar amung lun rayeh-rayeh Israil, idi kebalaneh nedeh, “Mili' anak dumba kian amék lek, kuan anid-anid ruma' muyuh, kereten ku Irau Paska ineh.

²² Idi lapen muyuh sengangel likudung, idi ngerereb ineh bang dara' luk bang bigan, idi ngisit dara' luk bang bigan ineh pekop tanga' idi pa dita' teh. Idi muyuh na miak remuat rat bang tanga' ruma' macing pekak.

²³ Idi kareb Tuhan lemaba bawang Masir idi ngaté nelun Masir, idi Ieh nier inan dara' pekop tanga' idi pa dita' teh, idi Tuhan sikal lemaba tanga' ineh, pad Ieh na maré Luk Ngaté semuet bang ruma' muyuh.

²⁴ Do' muyuh idi anak-anak muyuh maya' ukum ini macing ruked-ruked.

²⁵ Kareb muyuh semuet bang bawang luk barén Tuhan nemuyuh, do' muyuh maya' kudeng luk bilaNeh, na miak na muyuh ngimet dalan ini.

²⁶ Idi muci kareb anak-anak muyuh ngitun nemuyuh, ‘Anunké ilungneh luk ruen muyuh ini?’

²⁷ do' muyuh ngor, ‘Ini Irau Paska kuan Tuhan luk pangeh lemaba anid ruma' lun Israil bang bawang Masir, kareb Ieh nengaté nelun Masir, iamo' Ieh neméi' netau.’ ” Idi lun Israil netekeradung idi nesembayang.

²⁸ Idi ideh iné' idi nenganau' maya' kudeng luk bila Tuhan ni Musa idi Arun.

Susa' Luk Kepulu': Até Anak Luk Atun

²⁹ Idi kareb tangal dacem Tuhan nengaté amung anak luk atun bang bawang Masir, do' anak raca' luk miak ngelibal neneh mangun ku raca' macing ku anak lun luk bang tutup, idi amung anak pung luk atun teh.

³⁰ Kareb dacem ineh idi raca' nekulat dengan amung lun tarehneh idi amung lun Masir — ngaceku inan tido aput bawang Masir. Ngaceku bang anid-anid tetek ruma' inan lun naté.

³¹ Idi raca' nenawar ni Musa idi Arun bang alem ineh, kebalaneh, “Gugkang muyuh idi nalan rat arang anak itinku, do' muyuh idi lun Israil, idi sembayang inan Tuhan, maya' kudeng luk pinutuh muyuh.

³² Idi amung amék, dumba, idi sapi' muyuh pana' iten, maya' kudeng luk pinutuh muyuh! Amé' muyuh idi sembayang kuanku teh!”

³³ Idi lun Masir nengecuk nelun mula' ineh remuat rat bang bawang Masir dengan mesaget, kebaladeh, “Kai maté kudeng muyuh na nalan.”

³⁴ Idi lun mula' ineh nenguit banak luk na lamud bang su luk inandeh nganau' ruti, idi tinga luun kibung pa luun tudungdeh.

³⁵ Idi lun Israil pangeh nenganau' luk icuk Musa, idi pinutuhdeh rat nelun Masir, amas, pirak, idi ayung.

³⁶ Idi Tuhan nemaré nedeh inan lun Masir méi', pad ideh miak maré luk pinutuhdeh. Kudeng ineh lawéneh lun Israil nengaro binaweh lun Masir.

Lun Israil Mepura' Rat Bawang Masir

³⁷ Idi lun Israil nenalan rat Ramsis macing déi' Sukot, ieh ineh 600,000 lun deléi, baken ratnan decur idi anak.

³⁸ Idi inan lun pupu baken nemaya' nedeh, idi teh mula' amék, dumba, idi sapi'.

³⁹ Banak luk inuitdeh rat Masir didang mangun ku ruti luk na lamud. Banak ineh na lamud, ngaceku ideh inusu rat bawang Masir na miak ngisiden. Ngaceku ineh ideh na petap balu'.

⁴⁰ Kinioneh lun Israil tudo déi' Masir 430 lak.

⁴¹ Idi mangun kareb kekiped 430 lak ineh, idi aco sineh neremuat amung baweh Tuhan rat bawang Masir.

⁴² Bang dacem ineh, ieh ineh dacem luk inan Tuhan nginulat pad Ieh miak nated nedeh remuat rat bang bawang Masir. Ieh ineh dacem Tuhan miak uen lun Israil ngerayeh idi uen nginulat, macing ku anak inul.

Lawé Irau Paska

⁴³ Idi kebala Tuhan ni Musa idi Arun, “Ini ukum Paska ineh: Lun pupu baken na miak kuman ineh,

⁴⁴ iamo' demulun luk bilihmu dengan usin mo' miak kuman ineh kudeng ideh pangeh sinunat.

⁴⁵ Idi lun sakai idi lun tebarin na miak kuman ineh.

⁴⁶ Idi do' ineh kenen bang ruma' luk inanneh tinina'. Aleg muyuh nguit uang ineh remuat rat bang ruma' ineh. Idi sebuleng tulang pana' aleg mutul neneh.

⁴⁷ Do' amung lun Israil ngerayeh irau ineh.

⁴⁸ Lun luk na sinunat na miak kuman ineh. Kudeng aceh lun pupu baken luk tudo arang muyuh pian ngimet Paska ineh kuan Tuhan, nima' amung deléi uen nunat atun. Ieh pana' mepad kudeng amung lun luk kuan bawang.

⁴⁹ Inan aceh ukum kuan lun Israil idi lun sakai luk tudo arang muyuh.”

⁵⁰ Idi amung lun Israil nenganau' maya' kudeng luk bila Tuhan ni Musa idi Arun.

⁵¹ Kareb aco sineh teh Tuhan nenated amung lun Israil remuat rat bang bawang Masir, maya' bawehdeh.