PURA' 10 - BALA LUK DO'

Susa' Luk Kewaluh: Kato

¹ Kebala Tuhan ni Musa, “Amé' iko papu' raca'. Ui pangeh nengetueh niatneh idi niat amung lun tarehneh pana', pad Ui miak nganau' tanu'Ku ini arangdeh,

² pad ini miak belénmu macing inan anak inulmu ratnan luk inau'Ku kuan lun Masir, kareb Ui nengigu' nedeh dengan tanu' luk inau'Ku arangdeh. Idi amung muyuh miak kali' Ui ini Tuhan.”

³ Musa idi Arun iné' papu' raca', idi kebala didueh neneh, “Kebala Tuhan Allah lun Iberani, ‘Tuda' io teh iko ara' maya' bala Allah. Nima' pupuKu ini nalan idi sembayang Negku.

⁴ Kudeng iko na nima' nedeh nalan, kali' rungen pekak nebpa Ui ngacing kato aput bawangmu.

⁵ Idi kato ineh pelaba' ula', pad mapen tana'. Ideh miak kuman amung-amung luk ketecan kareb udan batu pangeh nato, dengan kayuh pana'.

⁶ Idi kato ineh teh ngaput bang ruma'mu, idi amung ruma' lun tarehmu, idi ruma' lun Masir pana'. Luk kudeng ini na tu nekali' taman idi tepun muyuh rat muyuh tinganak pad macing aco sini.’ ” Idi Musa neburo.

⁷ Idi kebala lun tareh raca' neneh, “Tuda' io lun ini ngesusa' netau? Do' iko maré nedeh nalan, pelé ideh sembayang inan Tuhan Allah! Naké iko nekali' bawang Masir ini pangeh nekedat?”

⁸ Idi ideh nenguit ni Musa idi Arun lemubed amé' pa kiung raca', idi kebalaneh nedidueh, “Nalan muyuh idi sembayang inan Tuhan Allah muyuh! Iamo' idé luk pian amé'?”

⁹ Idi kebala Musa, “Amung kai amé' dengan anak-anak dari idi lun rayeh teh. Kai pian nguit anak-anak kai luk deléi idi decur dengan dumba, amék, idi sapi' kai teh, ngaceku kai pian nganau' aceh irau pad ngerayeh Tuhan.”

¹⁰ Idi raca' nepebala nedidueh, “Ui pebulung ku ngadan Tuhan: Na ui maré nemuyuh nguit decur idi anak-anak muyuh. Nekini megala' muyuh pian nganau' luk dat.

¹¹ Na! Deléi muyuh mo' miak amé' sembayang inan Tuhan, kudeng ini luk pian muyuh.” Idi ideh nengusu nedidueh rat pa kiung raca'.

¹² Idi Tuhan nepebala ni Musa, “Ngegenang langenmu pa luun bawang Masir, pad kato ineh umak idi kuman amung-amung tibu luk ketecan luun tana' pangeh udan batu ineh.”

¹³ Idi Musa nengegenang rukudneh pa luun bawang Masir. Idi Tuhan nengacing aceh barui rat pa busat aco bang bawang Masir seaco idi sedacem kinioneh. Idi pekak uka-uka bui nemalid amung-amung kato.

¹⁴ Idi kato ineh numak aput bawang Masir idi netemurun bang anid-anid babpat bawang Masir pelaba ula'. Idi atun na inan kato luk kudeng ini. Idi muci aco pana' nateh luk kudeng ineh.

¹⁵ Ideh nengaput amung tana', pad bawang ineh mepapen. Idi amung tibu-tibu idi luk neketecan pangeh udan batu, nabud kinan kato ineh. Idi sesuut pana' luk mebata' nateh luk ketecan luun batang kayuh, idi luun amung-amung tibu maput bawang Masir.

¹⁶ Idi dengan mesagat raca' nenawar ni Musa idi Arun, kebalaneh, “Ui pangeh mesala' inan Tuhan Allah muyuh idi nemuyuh pana'.

¹⁷ Idi nekini maré do' ku sala'ku sekua' ini, idi sembayang inan Tuhan Allah muyuh, pad até ini buro rat negku.”

¹⁸ Idi Musa nenalan rat pa kiung raca', idi ieh nesembayang inan Tuhan.

¹⁹ Idi Tuhan nenurun bui rat pa acep aco luk pelaba tueh. Idi amung kato ineh pinalidneh idi nebpeh bang Abpa' Pisui. Sebuleng kato pana' nateh luk neketecan aput bawang Masir.

²⁰ Iamo' Tuhan nengetueh niat raca' teh pad ieh na nima' nelun Israil nalan.

Susa' Luk Keiwa': Dacem

²¹ Kebala Tuhan ni Musa, “Ngegenang langenmu idi mangun medacem bang bawang Masir, pad lemulun perikekap bang dacem ineh.”

²² Idi Musa nengegenang langenneh, idi macing dacem luk pelaba pingot aput bawang Masir teluh aco kinioneh.

²³ Idi seburur pana' na miak nier luk baken. Idi seburur pana' nateh luk nenalan teluh aco kinioneh. Iamo' kuan lun Israil inan acang bang amung su luk inandeh tudo.

²⁴ Idi raca' nenawar ni Musa, kebalaneh, “Nalan muyuh idi sembayang inan Tuhan. Iamo' amung-amung aya' muyuh aga'deh ketecan ieni. Iamo' decur idi anak-anak muyuh miak amé' maya' nemuyuh.”

²⁵ Iamo' kebala Musa, “Na miak na iko maré pung luk kereten iten kai luk miak barén kai inan Tuhan Allah kai.

²⁶ Na, kai pian nguit amung aya' kai — sebuleng pana' nateh luk tacin. Kai sebuleng miak mili' pung luk barén kai inan Tuhan Allah kai. Kareb nateh kai macing déi', na kai kali' anun luk miak barén kai Neneh.”

²⁷ Iamo' Tuhan nengetueh niat raca', pad ieh na nima' nedeh nalan.

²⁸ Idi kebalaneh ni Musa, “Buro iko rat pa kiungku. Aleg iko papu' negku baruh peh. Ngaceku kareb iko nier negku, iko miak maté.”

²⁹ Idi kebala Musa, “Pad pianmu. Na tu-tu iko miak nier negku peh!”