PURA' 1 - BALA LUK DO'

Pupu Israil Pidereh Déi' Bawang Masir

¹ Ini ngadan anak-anak Yakub luk nemaya' neneh iné' Masir, anid-anid dawa' ngeruma':

² Rubin, Simion, Liwi, Yahuda,

³ Iskar, Sebulon, Beniamin,

⁴ Dan, Naptali, Gad, idi Aser.

⁵ Kinula'deh luk inul Yakub, ieh ineh tudu' ngepulu' burur, iamo' Yusup nacing atun déi' Masir.

⁶ Yusup idi kinanak-kinanakneh naté dengan amung lun ribpet sineh.

⁷ Iamo' lun Israil iuk iné' mula', pad ideh metueh idi pelaba ula', pad bawang Masir pinu'deh.

⁸ Idi aceh raca' luk mebaruh luk na nepekalai ni Yusup kinikit ngimet bawang Masir.

⁹ Idi kebalaneh nelun Masir, “Lun Israil pelaba ula' idi ideh meluun rat netau.

¹⁰ Do' tau ngatur nedeh dengan ileh, pad ideh na iuk-iuk amé' mula', idi perurum dengan bunu' tau. Ngaceku ideh sikal metueh rat netau lek, pad ideh buro rat bang bawang tau.”

¹¹ Idi ideh nemili' tuda'-tuda' lun luk nginita nedeh, pian ngedereh nelun Israil dengan kekamen luk meberat. Idi lun Israil nemudut kuan raca' dueh bawang luk inan nganug akan, ieh ineh Pitum idi Ramsis.

¹² Idi lun Masir iuk ngedereh nedeh, iamo' lun Israil iuk meluun ula' pad ideh nengaput anid bawang, pad lun Masir merapang ku ideh.

¹³ Idi dengan rasang lun Masir nengecuk nelun Israil ngakem.

¹⁴ Idi ideh nengedereh nedeh ku kekamen luk mesusa'. Idi ideh nengecuk nedeh mudut tuda'-tuda' pudut, idi teh ideh icuk ngakem bang lati'deh. Idi na lun Masir méi' nedeh.

¹⁵ Idi kebala raca' lun Masir nan bidan lun Iberani, ieh ineh Sipera idi Pua,

¹⁶ “Kareb medueh ngasa' decur Iberani luk nenganak idi nier anak mebpeh, kudeng pieh deléi, do' muyuh ngaté neneh. Iamo' kudeng ieh decur nima' neneh mulun.”

¹⁷ Iamo' bidan ineh matot inan Allah. Na didueh nemaya' luk icuk raca' nedidueh. Iamo' didueh nengulun amung-amung anak deléi.

¹⁸ Idi raca' nenawar bidan ineh. Idi kebalaneh nedidueh, “Ngudeh medueh nganau' luk kudeng ineh, idi ngudeh medueh ngulun anak deléi?”

¹⁹ Idi kebala didueh ni raca', “Decur lun Iberani baken ratnan decur Masir. Ideh malé nenganak. Anak mebpeh kareb nateh bidan macing.”

^20-21 Ngaceku bidan ineh matot inan Allah, idi Ieh nenganau' luk do' kuan didueh. Idi Allah nengula' inul bang tetek ruma' didueh. Idi lun Iberani iuk amé' mula', idi ideh meluun tueh.

²² Idi raca' Masir nengecuk amung anak itinneh, kebalaneh, “Do' muyuh nala' amung anak deléi lun Iberani bang Abpa' Nil, iamo' amung anak decurdeh uen ngulun.”