PUDUT 9 - BALA LUK DO'

Pejani' Allah Idi Noh

¹ Idi Allah nengeperuan ni Noh dengan anak-anakneh, idi kebalaNeh nedeh, “Do' muyuh mula' anak idi iuk amé mula', pad manu' tana' ini.

² Idi amung-amung pung, suit, idi lawid, miak matot nemuyuh, idi Ui maré nedeh bang imet muyuh.

³ Idi amungdeh miak kenen muyuh, dengan irin pana'. Amung ineh Ui maré kuan muyuh ku akan muyuh.

⁴ Sebuleng mo' luk na miak kenen, ieh ineh uang pung luk inan dara' nugkeng. Ngaceku dara', ieh ineh ulunneh.

⁵ Kudeng seburur lemulun ngaté lemulun Ui maré ukum até neneh. Ui miak ngaté pung luk ngaté lemulun.

⁶ Idé-idé luk ngaté lemulun, ieh pana' miak pitayen lemulun. Ngaceku lemulun pangeh pinudut kudeng ayu Allah.

⁷ “Do' muyuh mula' anak pad inul muyuh iuk amé' mula', aput-aput tana' ini.”

⁸ Idi kebala Allah ni Noh idi anak-anakneh,

⁹ “Ngerawé do'-do', Ui ini ngeletep pejani'Ku kuan muyuh idi kuan inul muyuh,

¹⁰ idi teh kuan amung-amung pudut luk inan niat, suit, pung, ieh ineh amung-amung luk neremuat rat bang alud ineh.

¹¹ Idi Ui ngeletep jani'Ku ini kuan muyuh: Amung-amung pudut luk inan niat ineh na tupu-tupu miak uen ngaté ku ereb. Idi muci na luk idi ereb luk ngusag tana' ini peh.

¹² Idi ini etu pejani'Ku nemuyuh idi nan amung-amung pudut luk inan niat:

¹³ Ui nganau' tagkangKu bang laput, idi ineh luk ku etu pejani'Ku dengan tana' ini.

¹⁴ Kareb Ui ngacing laput pa luun tana', idi tagkang ineh miak melagan bang laput ineh,

¹⁵ idi Ui sikal ngerawé jani'Ku nemuyuh, idi nan amung-amung pudut luk inan niat. Idi na tupu-tupu ereb miak mangun peh, luk ngaté amung-amung pudut luk inan niat.

¹⁶ Idi kareb tagkang ineh bang laput, Ui miak nier ineh, pad Ui miak ngerawé pejani' luk meruked luk arang Allah dengan amung-amung pudut luk inan niat, idi amung-amung uang tana' ini.”

¹⁷ Idi kebala Allah ni Noh, “Idi ini etu pejani'luk pangeh litepKu arangKu dengan amung-amung luk inan niat bang tana' ini.”

Noh Idi Anak-Anakneh

¹⁸ Idi anak-anak Noh luk neremuat rat bang alud ineh, ieh ineh Sem, Ham, idi Yapet. Idi Ham ineh luk taman Kanaan.

¹⁹ Idi diteluh ini luk anak Noh mangun ku tepun amung lemulun bang tana' ini.

²⁰ Idi Noh ineh lun amé' lati', idi ieh luk pun-pun nenibu aceh kabun anggur.

²¹ Idi Noh nengirup abpa' anggur ineh, idi ieh nabuk. Idi ieh netelubid dengan lubpa luun uned lepo kibung.

²² Idi Ham luk taman Kanaan ineh nenier tamanneh lubpa. Idi ieh iné' maré kali' kuan dueh kinanakneh luk déi' liang.

²³ Sem idi Yapet nengalap aceh pekatu kibung, idi nengecang neneh luun tudung didueh idi nenalan lumuut, idi nemapen taman didueh luk lubpa, idi neteketed pad na nenier taman didueh luk lubpa.

²⁴ Idi Noh nekulat ratnan abukneh, idi nekali' luk inau' anakneh luk isuut kuanneh.

²⁵ Kabalaneh, “Kediman kuan Kanaan! Ieh mangun ku demulun amung kinanakneh.

²⁶ Ubur kuan Tuhan, luk Allah Sem! Kanaan ineh mangun ku demulunneh.

²⁷ Do' Allah ngerayeh Yapet! Inulneh miak tudo dengan pupu Sem. Kanaan miak mangun ku demulun Yapet.”

²⁸ Muci ratnan ereb ineh Noh mulun 350 lak.

²⁹ Idi ieh naté kareb ulunneh 950 lak.