PUDUT 8 - BALA LUK DO'

Abpa' Nekeket

¹ Iamo' Allah nengerawé Noh idi amung-amung pung luk denganneh bang alud ineh. Idi Ieh nenganau' aceh bui malid pa luun tana', idi abpa' ineh pana' melena'.

² Idi amung-amung bued abpa' rayeh luk rat bang tana' melena', idi udan pana' mato.

³ Idi abpa' ineh iuk melena'. Idi pangeh 150 aco, abpa' ineh melena'.

⁴ Idi pulu' tudu' aco bulan tudu' ineh alud ineh nepasad luun Pegkung Ararat.

⁵ Idi abpa' iuk melena', pad macing bulan pulu'. Idi aceh aco bulan pulu', amung-amung buduk pegkung melagan.

⁶ Idi pangeh apat ngepulu' aco Noh nengukab tabuk alud ineh.

⁷ Idi ieh nemuit sebuleng bungkak, luk netemulud kidi-kidi, pad macing abpa' ineh nekeket rat luun tana'.

⁸ Pangeh ineh ieh nemuit sebuleng sukur pelé nier kudeng abpa' ineh pangeh nelena'.

⁹ Iamo' sukur ineh na kali' luk inanneh ucep. Idi ieh nelemubed iné' ni Noh bang alud ineh, ngaceku inan teh abpa' pa luun tana' ineh. Idi Noh nengulang ticu'neh idi nengalap neneh semuet bang alud ineh.

¹⁰ Idi Noh nenganét tudu' aco teh, idi ieh nemuit sukur ineh teh.

¹¹ Idi suit ineh nelemubed iné' ni Noh kareb malem aco, idi ieh nenguit bang ticukneh aceh don saitun. Ngaceku ineh Noh kali' abpa' ineh pangeh nekeket.

¹² Idi ieh nenganét tudu' aco teh, idi ieh nemuit sukur ineh teh. Iamo' na ieh nelemubed iné ni Noh peh.

¹³ Kareb ulun Noh 601 lak, kareb aceh aco bulan aceh ineh, abpa' ineh pana' nekeket. Idi Noh nengukab itek alud ineh, idi nenier, idi matu tana' ineh netekering.

¹⁴ Kareb dueh ngepulu' tudu' aco bulan dueh, idi tana' ineh netekering do'-do' peh.

¹⁵ Idi kebala Allah ni Noh,

¹⁶ “Remuat iko rat bang alud ineh, dengan awanmu idi anak-anakmu, idi awandeh.

¹⁷ Idi nguit amung-amung suit idi pung denganmu, pad ideh miak nenganak idi amé'-amé' mula' luun tana'.”

¹⁸ Idi Noh neremuat rat bang alud ineh dengan awanneh, anak-anakneh, idi awandeh.

¹⁹ Idi amung-amung pung idi suit neremuat rat bang alud ineh, maya' ayudeh.

Noh Maré Acheh Baré Kuan Tuhan

²⁰ Idi Noh nenganau' aceh bubpun kuan Tuhan. Idi ieh nengalap ratnan amung-amung pung idi suit luk meligan, idi ieh nengeseb baré luk sabpen luun bubpun ineh.

²¹ Idi baré ineh do' buen pa kiung Tuhan, idi Ieh nepebala bang niatNeh, “Na Ui sikal ngacing kediman bang tana' ini peh ngaceku ratnan lemulun, sagan pana' terawé niatdeh dat rat karebdeh isuut. Nateh Ui sikal ngaté amung-amung pudut luk mulun kudeng luk pangeh inau'Ku.

²² Seruked tana' ini idi, inan kareb ngeranih idi nibu, teneb idi lau', udah idi merikan, macang idi medacem teh.”