PUDUT 7 - BALA LUK DO'

Ratnan Ereb

¹ Idi kebala Tuhan Allah ni Noh, “Semuet iko dengan amung uang tetek ruma'mu bang alud rayeh ineh, ngaceku iko mo' luk matu pa kiungKu arang amung-amung lemulun luk luun tana' ini.

² Do' iko nguit tudu' etung pung luk meligan. Iamo' ratnan pung luk na meligan, do' nguit sebuleng deléi idi sebuleng tineh mo'.

³ Idi do' iko nguit ratnan puar-puar suit, tudu' etung, ieh ineh deléi idi tineh, pad ngasa' inuldeh aput tana'.

⁴ Ngaceku tudu' aco teh idi Ui ngacing udan pa luun tana', apat ngepulu' aco idi apat ngepulu' dacem kinioneh, pad ngaté amung-amung pudut luk inan niat, luk pangeh inau'Ku.”

⁵ Idi Noh nenganau' amung-amung luk icuk Tuhan neneh.

⁶ Idi ulun Noh kareb ereb ineh 600 lak.

⁷ Idi Noh dengan awanneh, idi anak-anakneh dengan awandeh nesemuet bang alud rayeh pad mepuit ratnan ereb ineh.

⁸ Idi puar-puar pung idi suit luk meligan idi luk na meligan,

⁹ nesemuet bang alud ineh dengan Noh, ieh ineh deléi idi tineh, maya' kudeng luk icuk Allah ni Noh.

¹⁰ Idi pangeh tudu' aco inan ereb.

¹¹ Kareb ulun Noh 600 Lak, ieh ineh pulu' tudu' aco bulan dueh amung-amung bued abpa' rayeh ineh pana' uput, idi inan teh udah luk pelaba ula'.

¹² Idi udan netemurun pa luun tana' apat ngepulu' aco idi apat ngepulu' dacem kinioneh.

¹³ Idi bang aco sineh teh Noh dengan awanneh idi teluh anakneh, Sem, Ham, idi Yapet, dengan awandeh ineh nesemuet bang alud ineh.

¹⁴ Idi ideh dengan puar-puar pung luk meliput idi luk melayo, luk rayeh idi luk isuut pana', dengan puar-puar suit,

¹⁵ idi puar-puar pudut luk nginiat, nacing tedueh-tedueh matun Noh bang alud ineh.

¹⁶ Idi ideh luk nesemuet ineh, ieh ineh deléi idi tineh ratnan amung-amung pudut, idi ideh nesemuet maya' kudeng luk icuk Allah ni Noh. Idi Tuhan nengitek tanga' alud ineh.

¹⁷ Idi ereb ineh inan pa luun tana' apat ngepulu' aco kinioneh, idi abpa' ineh iuk-iuk temubu' idi nengelapung alud ineh, pad ieh netegenang.

¹⁸ Idi abpa' ineh iuk-iuk rayeh idi temubu', pad alud ineh lupung.

¹⁹ Idi abpa' ineh iuk-iuk temubu' teh, pad amung-amung pegkung luk medita' nereb peh.

²⁰ Idi ieh nengereb amung-amung pegkung ineh apat depeh kidita' neh.

²¹ Idi amung-amung pudut luk inan niat luun tana' ineh pana' naté, ieh ineh suit, pung, idi lemulun pana'.

²² Idi amung-amung pudut luk luun tana', luk inan niat pana' naté.

²³ Idi Tuhan nengaté amung-amung pudut luk inan niat luun tana', do' lemulun, pung, idi suit pana'. Iamo' Noh dengan amung-amungdeh luk denganneh bang alud ineh mo' luk mulun.

²⁴ Idi kinio abpa' ineh na melena' 150 aco.