PUDUT 49 - BALA LUK DO'

Yakub Periteteng Kuan Anak-Anakneh

¹ Yakub nenawar amung-amugn anakneh, kebalaneh, “Pamung muyuh, idi ui miak mada' nemuyuh ratnan luk miak mangun kuan muyuh bang aco luk muci:

² “Pamung muyuh idi ninger, O anak-anak Yakub. Do' ninger bala taman muyuh Israil.

³ “O Rubin, iko anakku luk rayeh, tuehku idi bua' laludku luk pun-pun, luk pelaba do' uburneh, idi pelaba do' tuehneh.

⁴ Na lutep mepad kudeng ereb. Na iko miak amé' ku luk rayeh, ngaceku iko nepamung dengan apidku, idi iko nengelutak pagau tamanmu.

⁵ “Simion idi Liwi ini dinganak. Pelapet didueh ineh ku ngaté lemulun.

⁶ Ui na pian semuet bang gayam didueh. Ui na pian perurum nedidueh, kareb didueh remasang didueh ngaté lemulun. Didueh narad kukud sapi' ku rot didueh.

⁷ Uen ngediman useh didueh ineh luk mesangit, idi gateh didueh ngaceku sikal ngaté! Ui sikal ngatad nedidueh maput bawang Israil, idi ngatad nedidueh rat arang lun Israil.

⁸ “O Yahuda, kinanakmu miak ngubur namu. Idi ticu'mu miak merek dier bunu'mu. Idi amung kinanakmu miak tekunal pa kiungmu.

⁹ Yahuda ineh mepad kudeng balang. Ieh ngaté luk tekapen, idi lemubed amé' su inanneh. Ieh luku idi na seburur mekuu' nui neneh.

¹⁰ Idi lalud ngimet na miak buro rat ni Yahuda. Idi rukud imet raca' na buro rat neneh, pad Ieh luk kuan rukud ineh miak macing. Idi amung-amung pupu miak maya' Neneh.

¹¹ Idi ieh nengabet keladaineh nan lawa anggur, ieh ineh lawa anggur luk pelaba do'. Idi ieh nemupu' kibungneh bang abpa' anggur, luk mesia' kudeng dara',

¹² Idi matehneh mesia' ku abpa' anggur, idi lipenneh mebuda' ku rata.

¹³ “Sebulon miak tudo tangeb abpa' rayeh. Idi ieh miak mangun ku su luk inan kapal mapit. Idi lakanneh macing déi' Sidon.

¹⁴ “Iskar ineh mepad kudeng keladai luk metueh, luk tekeradung arang dueh babehneh.

¹⁵ Kareb ieh nenier luk inan ucu' ineh do', idi tana'neh pana' do' ayu, idi ieh nengebeneh tudungneh sikal maan, idi mangun ku demulun luk duken ngakem.

¹⁶ “Dan miak ngimet pupuneh, luk mepad kudeng pupu Israil luk baken.

¹⁷ Dan ineh miak mangun ku menipeh iring dalan, mepad kudeng aceh menipeh luk megalih iring dalan, luk nicuk tumid kuda, pad lemulun luk nalan maya' kuda ineh mepulid rat luun ketedneh.

¹⁸ “Ui nginulat Tuhan ngulun negku.

¹⁹ “Gad ineh dinakin aceh babpat bunu'. Iamo' muci ieh miak ngerada' nedeh.

²⁰ “Idi luk kenen Aser ineh pelaba én. Ieh maré luk do' én kuan raca'-raca'.

²¹ “Naptali ineh mepad kudeng payo tineh luk meliput, luk nenganak tuda'-tuda' anak luk do' ayu.

²² “Yusup mepad kudeng aceh angat luk kebua', ieh ineh sebuleng lawa luk mulun iring bued abpa'. Idi angat-angatneh rubpé pa luun ar luk medita'.

²³ Bunu'neh ngedereh neneh, idi ngerada' neneh, dengan binor idi ilebdeh.

²⁴ Iamo' binordeh pinutul Luk Melalud, idi urat langendeh dirak Allah Yakub luk Melalud, ieh ineh Lun Matar, idi Batu lun Israil.

²⁵ Allah tamanmu luk ngedengan namu, idi Allah luk Melalud luk sikal maré peruan kuanmu, dengan peruan udan luk rat déi' dita', idi peruan bued abpa' luk pa liang tana', idi peruan ratnan iti' idi nakan,

²⁶ peruan ratnan padé idi busak, peruan ratnan pegkung luk mon, idi amung luk do' ratnan surud luk meruked. Nima' peruan ini temurun luun ulun Yusup, ieh ineh luun madu' lemulun luk meluun rayeh ratnan kinanak-kinanakneh.

²⁷ “Beniamin ineh mepad kudeng aceh bungalé luk manga, luk kuman bunu'neh kareb pekak, idi mabpat-mabpat luk ilapneh kareb malem.”

²⁸ Idi amungdeh ineh mangun ku pulu' dueh pupu Israil. Idi ini luk bila tamandeh kareb ieh neperiteteng nan anid-anid anakneh.

Até Idi Tanem Yakub

²⁹ Idi pangeh ineh ieh neperiteteng nan anak-anakneh, kebalaneh, “Ui lélé amé' matun tepunku. Do' nanem negku su luk inan tepunku bang lubang luk déi' luun tana' Epron lun Hiti ineh;

³⁰ ieh ineh déi' Makpéla luk muneng ku Mamré déi' bawang Kanaan, luk pangeh bilih Ibrahim dengan natad pana' rat ni Epron lun Hiti ineh pad mangun ku lengutan.

³¹ Idi su ineh ideh nenanem ni Ibrahim idi awanneh Sara. Idi su ineh teh ideh nenanem ni Isak idi awanneh Ribeka. Idi su ineh teh ui nenanem ni Lia.

³² Idi lati' ineh dengan lubang luk luun ineh pangeh bilih rat nelun Hiti. Do' nanem negku su ineh.”

³³ Pangeh Yakub neperiteteng nan anak-anakneh, idi ieh nenginat kukudneh amé' luun pagauneh, idi niatneh neputut.