PUDUT 48 - BALA LUK DO'

Yakub Ngeperuan Ni Epraim Idi Manasé

¹ Muci ratnan ineh kebaladeh ni Yusup, “Mét i tamam.” Idi Yusup nenguit dueh anakneh, ieh ineh Manasé idi Epraim maya' neneh iné' nier ni Yakub.

² Idi kebaladeh ni Yakub, “Anakmu Yusup ineh nacing nier namu.” Idi Yakub pana' netemueh, idi netudo luun pagauneh.

³ Idi kebala Yakub ni Yusup, “Idi Allah luk Melalud nesilagan negku déi' Lus bang bawang Kanaan, idi Ieh nengeperuan negku,

⁴ kebalaNeh, ‘Ui sikal maré namu mula' anak pad inulmu mangun ku tuda'-tuda' pupu. Idi tana' ini miak barénKu kuan inulmu ruked-ruked.’ ”

⁵ Idi teh kebala Yakub, “Nekini dueh anakmu, ieh ineh Epraim idi Manasé luk tinganak kuanmu tungé' Masir atun ratnan acingku namu, ui luk kuan nedidueh; ieh ineh mepad kudeng Rubin idi Simion.

⁶ Iamo' anak luk iko ngalap muci rat nedidueh ini, iko luk kuan nedeh. Idi ideh miak ngalap babpat binawehdeh dengan kinanakdeh.

⁷ Ui nganau' kudeng ini ngaceku tinanmu Rakel naté déi' tana' Kanaan muneng ku Eprata kareb ui muli' rat Mesopotamia. Idi ui nenanem neneh dengan susa' niatku déi' dalan luk amé' Eprata (ieh ineh Baitlahim).”

⁸ Kareb Yakub nenier anak Yusup ineh, idi kebalaneh, “Idé kuan anak ineh?”

⁹ Idi kebala Yusup, “Ini anakku luk pangeh biré Allah kuanku tungé' Masir.” Idi kebala Yakub, “Do' nguit nedidueh amé' negku, pad ui miak ngeperuan nedidueh.”

¹⁰ Idi Yakub dat sier, ngaceku ieh pelaba ngered, pad ieh na miak nier do'-do'. Idi Yusup nenganau' nedidueh muneng neneh, pad ieh nemuen nedidueh idi nengapel nedidueh.

¹¹ Kebala Yakub ni Yusup, “Idi na ui ngerawé miak nier kiungmu teh; iamo' Allah nemaré negku nier kiung anakmu pana'.”

¹² Idi Yusup nengatad nedidueh rat iring aleb tamanneh, idi ieh netekeradung pa kiungneh.

¹³ Idi Yusup nenganau' Epraim pa kabing Yakub, idi Manasé inau'neh pa tinueh.

¹⁴ Iamo' Yakub pana' nengerareng ticu'neh pa tinueh pa luun uluh Epraim, sagan pana' ieh luk isuut, idi ticu'neh pa kabing luun uluh Manasé, idi dengan luk kudeng ineh ieh nengerareng ticu'neh pegilang, sagan tu pana' Manasé ini anak Yusu luk atun.

¹⁵ Idi Yakub nengeperuan ni Yusup, kebalaneh, “Idi do' Allah ngeperuan dueh anak ini, ieh ineh Allah luk inan tepunku Ibrahim idi tamanku Isak merapet. Do' Allah luk pangeh nenguyut negku macing aco sini ngeperuan nedidueh,

¹⁶ Do' Melaikat luk nemuit negku ratnan amung-amung luk dat, ngeperuan nedidueh, Idi do' ngadanku, idi ngadan tepunku Ibrahim idi tamanku Isak pana' mebala ngaceku didueh. Idi do' didueh mula' inul.”

¹⁷ Idi Yusup mesusa' niat kareb ieh nenier tamanneh ngerareng ticu'neh pa tinueh luun uluh Epraim. Idi ieh nengakem ticu' tamanneh sikal mubuh neneh rat luun uluh Epraim amé' luun uluh Manasé.

¹⁸ Idi kebalaneh nan tamanneh, “Aleg kudeng ineh, O Ama' ngaceku ini anak luk atun, do' ngerareng ticu'mu pa tinueh luun uluhneh.”

¹⁹ Iamo' tamanneh na sikal, kebalaneh, “Ui kali' idi Manasé pana' miak mangun ku aceh pupu luk mebala. Iamo' kinanakneh luk isuut meluun mebala rat neneh, idi inulneh miak mangun ku tuda'-tuda' pupu luk mebala.”

²⁰ Idi Yakub nengeperuan nedidueh bang aco sineh, kebalaneh, “Lun Israil miak neten ngadan medueh kareb ideh maré peruan, kebaladeh, ‘Do' Allah nganau' namu mangun mepad kudeng Epraim idi Manasé.’ ” Idi Yakub nengeluun Epraim ineh ratnan Manasé'.

²¹ Idi kebala Yakub ni Yusup, “Na mio teh ui maté. Iamo' Allah miak ngedengan nemuyuh pad Ieh nguit nemuyuh muli' amé' bang bawang tepun muyuh.

²² Idi ui maré setanggal tana' kuanmu meluun ratnan babpat amung-amung kinanakmu, ieh ineh tana' luk mebaleng luk pangeh inaroku rat bang palad lun Amori dengan pelapetku idi binorku.”