PUDUT 47 - BALA LUK DO'

¹ Idi Yusup nenated limeh kinanakneh amé' papu' raca', kebalaneh, “Tamanku idi amung kinanakku dengan aya'deh idi amung-amung luk ideh kuan pangeh nacing rat déi' bawang Kanaan. Idi nekini ideh déi' bawang Gosen.”

² Idi ieh nenguit kinanakneh amé' papu' raca'.

³ Idi kebala raca' nedeh, “Anunké kekamen muyuh?” Kebaladeh, “Kai lun matar aya', do' kai idi tepun kai pana'.

⁴ Kai macing bang bawagn ini ngaceku iru' bang bawang Kanaan pelaba io, idi na uduh kenen aya' kai. Nekini kai mutuh namu nima' nekai tudo déi' bawang Gosen.

⁵ Idi kebala raca' ni Yusup, “Amung kinanakmu idi tamanmu pangeh nacing.

⁶ Idi tana' Masir ini bang palad muyuh. Do' ideh tudo luun tana' luk meluun do' déi' bawang Gosen. Idi kudeng inan luk mileh arangdeh, do' ngecuk nedeh ngasa' aya'ku.”

⁷ Idi Yusup nenguit tamanneh Yakub matun raca'. Idi Yakub nengeperuan ni raca'.

⁸ Idi kebala raca' neneh, “Tuda' lak ulunmu?”

⁹ Idi kebala Yakub ni raca', “Idi ulunku meratu teluh ngepulu' lak; iamo' na mekadang ulunku lek ngaceku mula' dereh. Na ieh mepad kudeng ulun tepunku.”

¹⁰ Idi Yakub nengeperuan ni raca' sekua' teh, idi ieh nenalan.

¹¹ Idi Yusup nengeletep tamanneh idi kinanak-kinanakneh déi' bawang Masir idi nemaré nedeh tana' luk meluun do' luk muneng ku Ramsis, maya' kudeng luk bila raca'.

¹² Idi Yusup nemaré akan kuan tamanneh idi kinanak-kinanakneh, idi amung-amung uang tetek ruma'neh dengan amung anak luk isuut pana'.

Imet Yusup Kareb Iru'

¹³ Idi iru' ineh pelaba io, pad na akan aput bawang, pad amung lun Masir idi lun Kanaani pana' melaya' ngaceku melau.

¹⁴ Idi ideh nemelih akan, idi Yusup nengamung amung-amung usin luk nekumelih lun padé ineh. Idi ieh nenguit usin ineh macing bang ruma' raca'.

¹⁵ Kareb amung-amung usin bang bawang Masir idi bawang Kanaan pangeh mabud, idi lun Masir iné' ni Yusup kebaladeh, “Do' maré akan kuan kai, pad kai ini na maté. Do' iko ngedengan nekai, ngaceku amung usin kai pangeh mabud.”

¹⁶ Idi kebala Yusup, “Do' nguit aya' muyuh, pad ui maré akan kuan muyuh ku libal ineh, kudeng usin muyuh mabud.”

¹⁷ Idi ideh nenguit aya'deh iné ni Yusup. Idi ieh nemaré akan kuandeh ku libal kuda, amék, dumba, sapi', idi keladaideh ineh. Idi ieh nemaré akan kuandeh bang lak ineh, ngaceku ratnan aya'deh.

¹⁸ Kareb mabud lak ineh, ideh iné' neneh, kebaladeh, “Na kai miak naluk namu ratnan kai na usin, idi amung aya' kai kuanmu. Idi na luk ketecan luk barén namu, iamo' burur kai sebuleng idi tana' kai.

¹⁹ Aleg nima' nekai maté. Do' ngedengan nekai, pad tana' kai na uen nuso. Do' melih burur kai idi tana' kai mangun ku libal akan luk kuan kai, pad kai mangun ku demulun raca', idi tana' kai kuanneh. Do' iko maré pimara kuan kai pad kai miak mulun, idi tana' kai na mesuso.”

²⁰ Idi Yusup nemelih amung tana' Masir kuan raca'. Amung lun Masir nemasui tana'deh, ngaceku ideh pelaba susa' ku iru' ineh. Idi amung-amung tana' ineh raca' kuan.

²¹ Idi Yusup nemubuh nelun mula' ratnan sebawang amé' inan luk baken mangun ku demulunneh, aput tana' Masir.

²² Iamo' tana' lun imam mo' na bilihneh. Ngaceku ideh inan tabpar ratnan raca' idi kuman ratnan tabpar luk barén raca' kuandeh. Ineh punneh ideh na nemasui tana'deh.

²³ Idi kebala Yusup nelun mula' ineh, “Nekini ui pangeh nemelih burur muyuh idi tana' muyuh kuan raca'. Siruh, ini ilung luk tibuen muyuh bang tana' ini.

²⁴ Idi peranihneh na miak na muyuh maré sengebuan ratnan limeh buan kuan raca', idi apat buan ineh kuan muyuh, miak mangun ku pimara, idi kenen muyuh idi amung uang tetek ruma' muyuh.”

²⁵ Idi kebaladeh, “Iko pangeh nengulun nekai, O tuan, idi iko do' nekai, idi amung-amung kai miak mangun ku demulun raca'.”

²⁶ Idi Yusup nenganau' aceh ukum kuan bawang Masir, pad macing kareb ini, idi bang limeh buan, sengebuan kuan raca'. Iamo' tana' lun imam mo' luk na kuan raca'.

Kekiped Bala Yakub

²⁷ Idi lun Israil netudo bang bawang Masir, déi' tana' Gosen. Idi ideh mangun ku lun do' idi inan mula' anak.

²⁸ Idi Yakub tudo déi' Masir pulu' tudu' lak kinioneh pad ulunneh meratu apat ngepulu' tudu' lak.

²⁹ Karebneh lélé maté, idi ieh nenawar anakneh Yusup, kebalaneh neneh, “Do' iko ngerareng ticu'mu pa liang tipanku, idi pejani' negku, pad iko na nanem negku bang bawang Masir.

³⁰ Ui pian tinamen dengan tepunku. Do' nguit butungku rat bawang Masir ini, idi nanem negku bang lengutandeh.” Idi kebala Yusup, “Miak ui nganau' kudeng luk bilamu ineh.”

³¹ Idi kebala Yakub, “Do' iko penaji' negku.” Idi Yusup nepejani' neneh. Idi Yakub pana' netekunal luun pagauneh, idi nengubur Allah.