PUDUT 46 - BALA LUK DO'

Yakub Idi Amung Uang Ruma'neh Amé' Bawang Masir

¹ Idi Yakub nenipa amung-amung binawehneh, idi ieh iné' Birsiba, idi su ineh ieh nemaré tuda'-tuda' baré kuan Allah tamanneh, Isak.

² Idi Allah nepebala neneh bang aceh luk sinierneh kareb malem, kebalaneh, “O Yakub, Yakub!” Idi kebala Yakub, “Anun idi, Tuhan?”

³ Idi kebalaNeh, “Ui ini Allah tamanmu. Aleg iko matot amé' déi' Masir; ngaceku Ui sikal ngeletep namu mangun ku aceh pupu luk rayeh bang bawang ineh.

⁴ Ui sebuleng maya' namu amé' Masir; idi Ui sebuleng nguit inulmu muli' teh. Idi Yusup pana' miak nier namu karebmu maté.”

⁵ Idi Yakub nenalan rat Birsiba. Anak-anakneh nenuet neneh, dengan anak-anakdeh luk isuut, idi awandeh, bang tuda'-tuda' keréta luk biré raca'.

⁶ Idi ideh nenguit amung-amung aya' idi binawehdeh luk ilapdeh déi' bawang Kanaan. Idi ideh iné' Masir. Yakub nenguit amung inulneh maya' neneh,

⁷ ieh ineh anak-anakneh idi mupunneh luk deléi, idi anak-anak idi mupunneh luk decur.

⁸ Ini ngadan inul Yakub luk nemaya' neneh iné' Masir: anak Yakub luk atun, ieh ineh Rubin,

⁹ idi anak Rubin luk deléi, ieh ineh Hanok, Palu, Hesron, idi Karmi.

¹⁰ Idi anak Simion luk deléi, ieh ineh Yemuil, Yamin, Ohad, Yakin, Sohar, idi Saul luk anak ratnan seburur decur lun Kanaani.

¹¹ Idi anak Liwi luk deléi, ieh ineh Gerson, Kohat, idi Merari.

¹² Idi anak Yahuda luk deléi, ieh ineh Er, Onan, Sela, Paris, idi Sera (iamo' Er idi Onan ineh pangeh naté bang bawang Kanaan). Idi anak-anak deléi Paris, ieh ineh Hesron idi Hamul.

¹³ Idi anak Iskar luk deléi, ieh ineh Tola, Pua, Yob, idi Simron.

¹⁴ Idi anak Sebulon luk deléi, ieh ineh Sered, Elon, idi Yalil.

¹⁵ Idi amung ini anak deléi Lia, luk tinganakneh kuan Yakub déi' Mesopotamia, idi teh Dina anakneh luk decur ineh. Idi amung inul Yakub rat ni Lia teluh ngepulu' teluh burur.

¹⁶ Idi anak Gad luk deléi, ieh ineh Sipion, Hagi, Suni, Isbon, Eri, Arodi, idi Areli.

¹⁷ Idi anak Aser luk deléi, ieh ineh Imna, Isua, Isui, Beria, idi Sera, kinanakdeh luk decur. Idi anak Beria luk deléi, ieh ineh Iber idi Malkiel.

¹⁸ Amungdeh luk pulu' anem burur ni inul Yakub rat ni Silpa, luk biré Laban kuan anakneh Lia.

¹⁹ Idi anak Rakel awan Yakub luk deléi, ieh ineh Yusup idi Beniamin.

²⁰ Idi Yusup pana' inan anak déi' Masir, ieh ineh Manasé idi Epraim, luk tinganak Asenat, ana Potipera, luk imam déi' On.

²¹ Idi anak Beniamin luk deléi, ieh ineh Bela, Beker, Asibel, Gera, Naman, Iki, Rus, Mupim, Hupim, idi Ared.

²² Idi amungdeh luk pulu' apat burur ini inul Yakub rat ni Rakel.

²³ Idi anak Dan luk deléi, ieh ineh Husim.

²⁴ Idi anak Naptali luk deléi, ieh ineh Yasil, Guni, Yeser, idi Silem.

²⁵ Idi amungdeh luk tudu' burur ini inul Yakub rat ni Bilha, luk biré Laban kuan Rakel.

²⁶ Idi kinula' inul Yakub luk iné' Masir, ieh ineh anem ngepulu' anem burur, baken ratnan amung awan anak Yakub ineh.

²⁷ Idi anak Yusup luk deléi, luk pangeh tinganak kuanneh déi' Masir ineh, dueh burur; idi kinula' amung uang tetek ruma' Yakub luk iné' Masir ineh tudu' ngepulu' burur.

Yakub Idi Amung Uang Ruma'neh Déi' Masir

²⁸ Idi Yakub nengecuk ni Yahuda ame atun kidi ni Yusup, pad ieh papu' neneh déi' Gosen. Kareb ideh nacing déi' Gosen ineh,

²⁹ idi Yusup numak bang kerétaneh idi iné' déi' Gosen, pian papu' tamanneh. Kareb ieh nepapu' neneh, idi Yusup nengapel tamanneh, idi ieh nenangi'.

³⁰ Idi kebala Yakub ni Yusup, “Miak ui maté nekini, ngaceku ui pangeh nenier kiungmu idi kali' namu mulun teh.”

³¹ Idi kebala Yusup kuan amung kinanakneh idi kuan amung uang ruma' tamanneh, “Do' ui amé' matun raca', idi mada' neneh ratnan acing kinanakku idi amung uang tetek ruma' tamanku, luk netudo bang bawang Kanaan.

³² Idi ui mada' neneh ratnan kekamen muyuh, ieh ineh ngasa' aya', idi ratnan luk inuit muyuh, ieh ineh amék, dumba, idi sapi, idi teh amung-amung luk muyuh kuan.

³³ Idi kareb raca' nawar nemuyuh, idi ngitun kekamen muyuh,

³⁴ idi do' muyuh mala kudeng ini, ‘Idi amung kai ini pekalai ngasa' amék, dumba, idi sapi', rat kareb kai isuut pad macing nekini, do' kai idi do' tepun kai,’ pad muyuh miak tudo bang tana' Gosen. Ngaceku lun luk matar aya' ineh mangun ku ali' kuan lun Masir.”