PUDUT 45 - BALA LUK DO'

Yusup Nesibada' Inan Kinanak-Kinanakneh

¹ Idi Yusup na miak tuman pa kiung amung-amung lun dukenneh; idi ieh nengecuk nedeh buro. Idi na seburur pana' ketecan denganneh kareb Yusup nengegala' bururneh kuan amung kinanakneh.

² Idi ieh nenangi' dengan rayeh tang, pad lun Masir neninger tangi'neh, idi nemada' nelun luk bang ruma' raca'.

³ Idi kebala Yusup nan kinanak-kinanakneh, “Ui ini Yusup. Mulun tamanku teh?” Iamo' kinanakneh pelaba tot neneh, pad ideh na miak ngor balaneh.

⁴ Idi kebala Yusup nedeh, “Amé' muyuh muneng negku.” Idi ideh iné' neneh. Idi kebalaneh, “Ui ini Yusup, kinanak muyuh luk pangeh pinasui muyuh kuan lun luk amé' Masir.

⁵ Iamo' nekini aleg muyuh mesusa' idi museh ku burur muyuh. Ngaceku Allah nengecuk negku atun rat nemuyuh, pelé ui ngasa' ulun muyuh.

⁶ Ngaceku nekini pangeh dueh lak iru' bang bawang ini. Ketecan teh limeh lak, idi kareb ineh na lemulun nibu idi ngeranih.

⁷ Allah nengecuk negku amé' pa atun muyuh pelé ui ngasa' nemuyuh, idi pad inul muyuh miak mulun.

⁸ Ngaceku ineh, baken muyuh luk nengecuk negku amé' tungé', iamo' Allah. Idi Ieh nengikit negku mangun ku taman raca', idi lun rayeh aput bawangneh. Idi ui luk ngimet amung-amung bawang Masir.

⁹ “Do' muyuh mesaget amé' ni Ama', idi mada' neneh, kebala muyuh, ‘Kudeng ini bala anakmu Yusup: “Allah pangeh nenganau' negku mangun ku lun luk ngimet amung bawang Masir; do iko amé' tungé' dengan mesaget.

¹⁰ Iko miak tudo bang tana' Gosen muneng negku, dengan amung-amung anakmu, mupunmu, amék, idi sapi', idi amung-amung luk iko kuan.

¹¹ Idi kudeng iko idi déi' Gosen, ui miak ngasa' namu, ngaceku limeh lak teh iru' ini ketecan, ngaceku na ui pian namu idi uang tetek ruma'mu, idi aya'mu pana' melau.” ’ ”

¹² Idi teh kebala Yusup, “Muyuh sebuleng miak nier, idi kinanakku Beniamin pana' miak nier, kali' rungen ui ini Yusup.

¹³ Mada' tamanku ratnan amung-amung uburku luk bang bawang Masir, idi amung-amung luk pangeh sinier muyuh ini. Idi do' muyuh miket muli' idi nguit tamanku amé' tungé'.”

¹⁴ Idi Yusup nengapel ni Beniamin kinanakneh dengan nangi', idi Beniamin pana' nenangi' idi nengapel ni Yusup.

¹⁵ Idi Yusup nemuen amung-amung kinanakneh dengan nangi'. Pangeh ineh amung-amung kinanakneh nepebala neneh.

¹⁶ Kareb bala ratnan acing kinanak-kinanak Yusup nekali' bang ruma' raca', idi raca' dengan amung lun rayehneh mawang niat.

¹⁷ Idi kebalaneh ni Yusup, “Do' ngecuk kinanakmu nganau' babeh luun keladaideh idi muli' amé' déi' bawang Kanaan.

¹⁸ Idi do' ideh nguit tamandeh idi amung uang tetek ruma'deh amé' tungé'. Ui miak maré kuandeh tana' luk meluun do' bang bawang Masir, pad ideh miak kuman petap.

¹⁹ Idi ngecuk nedeh ngalap keréta rat bang bawang Masir kuan anakdeh idi awandeh. Idi do' ideh nguit tamandeh amé' tungé'.

²⁰ Idi aleg ideh mesusa' necan binawehdeh, ngaceku luk pelaba do' bang bawang Masir miak kuandeh.”

²¹ Idi anak-anak Israil nenganau' kudeng ineh. Idi Yusup nemaré tuda'-tuda' keréta kuandeh maya' kudeng bala raca'. Idi ieh nemaré balu'deh maya' dalan.

²² Idi ieh nemaré ayung kuandeh anid-anid burur. Iamo' kuan Beniamin ieh nemaré teluh ngeratu balad usin pirak idi limeh kuyu' teh.

²³ Idi ieh nengirim kuan tamanneh pulu' keladai luk inan nengerareng binaweh luk meraga rat déi' Masir, idi pulu' keladai luk inan nengerareng padé idi ruti, idi uar-uar akan kuan tamanneh bang dalandeh.

²⁴ Idi ieh nengecuk kinanak-kinanakneh muli', idi ideh pana' nuli'. Idi kebala Yusup nedeh, “Aleg muyuh pekedaluh arang dalan.”

²⁵ Idi ideh nenalan rat tana' Masir idi nacing déi' tana' Kanaan inan tamandeh Yakub.

²⁶ Idi kebaladeh neneh, “Yusup mulun teh, idi ieh luk mangun ku nguyut bang amung-amung bawang Masir.” Idi Yakub megegker niat, ngaceku na ieh manu ku baladeh ineh.

²⁷ Iamo' kareb ideh nemada' ni Yakub amung-amung bala Yusup luk bilaneh nedeh, idi kareb Yakub nenier amung keréta luk biré Yusup luk ku nguit neneh amé' bawang Masir, idi ieh pelaba awang niat.

²⁸ Idi kebalaneh, “Pangeh petap; anakku Yusup mulun teh! Ui pian amé' papu' neneh kareb nateh ui maté.”