PUDUT 44 - BALA LUK DO'

Sangkir Luk Netutu'

¹ Idi kebala Yusup nelun luk ngasa' ruma'neh, “Do' muang amung-amung tebpungdeh ineh ku padé, pad petap luk itendeh, idi nipa usindeh munung tebpungdeh anid-anid.

² Idi nganau' sangkir pirakku munung tebpung kinanak luk isuut ineh, idi usin luk ku raga padéneh pana'.” Idi ieh nenganau' luk bila Yusup ineh.

³ Idi pekak uka-uka, ideh icuk nalan dengan keladaideh.

⁴ Kareb ideh pangeh nenalan rat bang bawang ineh, na mado tu, idi kebala Yusup nelunluk ngasa' ruma'neh, “Nalan iko idi ngerada' nedeh ineh. Kareb iko mepigket nedeh, do' iko ngitun nedeh kudeng ini, ‘Ngudeh muyuh ngua' luk do' ineh dengan luk dat?

⁵ Bakenké ieh ineh sangkir tuanku, luk inanneh ngirup, idi dengan ineh ieh miak kali' anun-anun luk inalum? Muyuh pangeh nenganau' sala' luk pelaba dat.’ ”

⁶ Kareb lun luk ngasa' nengigket nedeh, idi ieh nengacing amung-amung bala ineh.

⁷ Idi kebaladeh neneh, “Anunké punneh iko mala luk kudeng ineh? Na kai nenganau' luk kudeng ineh!

⁸ Idi usin luk pangeh nekali' kai munung tebpung kai ineh, pangeh inuit kai lemubed rat bawang Kanaan biré namu. Miakké kai mano amas idi pirak rat bang ruma' tuanmu?

⁹ Idé-idé rat arang kai ini, kudeng sangkir ineh idi neneh, do' ieh pitayen, idi amung-amung kai luk baken mangun ku demulunmu.”

¹⁰ Kebalaneh, “Do'. Nidé luk inan sangkir ineh nekali', ieh ineh mangun ku demulunku, iamo' muyuh luk baken na sala'.”

¹¹ Idi ideh saget-saget nengerareng tebpungdeh luun tana', idi anid-aniddeh nengukab tebpungdeh.

¹² Idi lun luk ngasa' ruma' Yusup ineh nenier, ngimun ratnan luk rayeh pad macing nan luk isuut; idi ieh nekali' sangkir ineh bang tebpung Beniamin.

¹³ Idi ideh nenarek ayungdeh sebuleng ku dat niatdeh, idi nenganau' tebpungdeh luun keladaideh, idi ideh nenalan lemubed iné' bang bawang.

¹⁴ Idi Yahuda dengan kinanak-kinanakneh numak ruma' Yusup, ngaceku Yusup idi déi' teh. Idi ideh netekunal macing luun tana' pa kiungneh.

¹⁵ Idi kebala Yusup nedeh, “Kudeng apehké luk inau' muyuh ineh? Naké muyuh kali' lemulun luk kudeng ui ini miak ngegala' anun-anun luk inalum ineh?”

¹⁶ Idi kebala Yahuda, “Anunké luk miak belén kai namu? Kudeng apehké kai pesaad? Idi kudeng apehké kai miak mala burur kai matu? Allah pangeh nekali' sala'-sala' kai. Idi amung-amung kai mangun ku demulunmu, do' amung kai, idi do' ieh luk nengalap sangkir ineh pana'.”

¹⁷ Idi kebala Yusup, “Na ui miak nganau' kudeng ineh! Iamo' lemulun luk nengalap sangkir ineh mo' mangun ku demulunku. Iamo' muyuh luk baken, nalan dengan do' amé' inan taman muyuh.”

Yahuda Mutuh Ni Beniamin Rat Ni Yusup

¹⁸ Idi Yahuda nacing muneng inan Yusu, kebalaneh, “O tuan, nima' negku pebala namu sebuleng, idi aleg iko museh negku; ngaceku iko mepad teh dengan raca'.

¹⁹ Idi iko pangeh nengitun nekai, ‘Inanké kinanak idi taman muyuh teh?’

²⁰ Idi kebala kai namu, ‘Inan teh taman kai luk pangeh mengered, idi sebuleng anak deléi luk isuut, luk pangeh ininulneh kareb ieh mengered teh. Idi kinanakneh luk rayeh pangeh naté, idi ieh sebuleng mo' luk ketecan ratnan sebuleng tinan. Idi tamanneh mawa neneh.’

²¹ Idi kebalamu kuan kai ini, ‘Do' nguit neneh amé' negku, pad ui miak nier neneh.’

²² Idi kebala kai namu, ‘Kian, anak ineh na miak necan tamanneh lek. Kudeng ieh necan neneh, kali' rungen tamanneh maté.’

²³ Iamo' kebalamu nekai, ‘Kudeng kinanak muyuh luk isuut ineh na inuit amé' negku, na muyuh miak amé' negku teh.’

²⁴ Kareb kai nelemubed matun taman kai, idi kai nengacing amung-amung balamu neneh.

²⁵ Idi kebala taman kai, ‘Do' muyuh amé' teh melih sesuut luk kenen kuan tau.’

²⁶ Kebala kai, ‘Na kai miak amé' baruh. Kudeng kinanak kai luk isuut maya' nekai, kai miak amé'. Ngaceku na kai miak papu' lun rayeh ineh kudeng kinanak kai luk isuut na maya' nekai.’

²⁷ Idi kebala taman kai, ‘Muyuh kali' awanku Rakel pangeh nenganak dueh anak deléi kuanku.

²⁸ Sebuleng pangeh nenecan negku, idi kali' rungen ieh pangeh dirak pung; ngaceku na ui kali' neneh pad macing nekini.

²⁹ Kudeng muyuh nguit anak ini rat negku, kian ieh pitayen lek, idi kali' rungen ui maté kudeng muyuh ngedereh negku kudeng ineh. Ngaceku ui mengered.’

^30-31 “Ngaceku ineh, kudeng ui macing inan tamanku, idi kinanakku luk isuut na idi denganku, kali' rungen tamanku maté, ngaceku ieh pelaba awa neneh. Idi kali' rungen ieh maté kudeng kai ngedereh neneh kudeng ineh. Ngaceku ieh mengered.

³² Meluun teh ui pangeh nengamo ratnan anak ini pa kiung tamanku, idi kebalaku, ‘Kudeng ui na nguit anakmu lemubed amé' namu, kali' rungen ui mabeh sala' ruked-ruked ulunku.’

³³ Idi nekini do' ui ketecan mangun ku demulunmu ku libal anak ineh; idi nima' anak ini nalan pad-pad dengan kinanak-kinanakneh.

³⁴ Ngaceku kudeng apeh ui miak papu' tamanku kudeng anak ini na idi denganku? Na ui sikal nier dereh luk miak mangun pa luun tamanku.”