PUDUT 43 - BALA LUK DO'

Kinanak-Kinanak Yusup Nguit Beniamin Amé' Bawang Masir

¹ Idi iru; ineh iuk pelaba dat bang bawang Kanaan.

² Kareb pangeh nabud amung-amung padé luk inuitdeh rat déi bawang Masir ineh, idi kebala Yakub nan anak-anakneh, “Amé muyuh teh, melih sesuut akan kuan tau.”

³ Idi kebala Yahuda neneh, “Idi lun rayeh bawang ineh nepebala nekai dengan megateh, kebalaneh, ‘Muyuh na miak nier kiungku teh, kudeng na muyuh nguit kinanak muyuh luk isuut ineh amé' negku.’

⁴ Ngaceku ineh kudeng iko maré kinanak kai maya' nekai, idi teh kai sikal amé' idi melih akan kuan tau.

⁵ Iamo' kudeng iko na maré neneh maya' nekai, kai pana' na miak amé'. Ngaceku kebala tuan ineh nekai, ‘Muyuh na miak nier kiungku, kudeng na kinanak muyuh idi dengan muyuh.’ ”

⁶ Idi kebala Yakub, “Ngudeh muyuh ngesusa' negku idi mada' lun rayeh ineh ratnan kinanak muyuh?”

⁷ Idi kebaladeh, “Tuan ineh nengitun lio-lio ratnan lawé amung kai, idi ratnan uang tetek ruma' kai, kebalaneh, ‘Mulunké taman muyuh teh? Inanké kinanak muyuh luk baken?’ Idi kai nengor balaneh ineh. Kudeng apeh kai miak kali' lun rayeh ineh miak ngecuk nekai nguit kinanak kai maya' nekai?”

⁸ Idi kebala Yahuda nan tamanneh, “Do' maré anak ini maya' negku, idi kai sikal nalan, pelé amung tau na maté.

⁹ Ui pejani' maré ulunku ku libalneh. Iko miak merapet negku ngedengan neneh. Kudeng na ui nguit neneh lemubed amé' namu, kali' rungen ui luk kuan sala' macing ruked-ruked.

¹⁰ Kudeng kai na nesabeng kali' rungen kai pangeh dueh lubed iné'.”

¹¹ Idi kebala tamandeh nedeh, “Kudeng pieh kudeng ineh, do' muyuh nganau' kudeng ini: do' muyuh nguit uli' tana' luk meluun do' bang tebpung muyuh mangun ku aceh baré kuan lun rayeh ineh, ieh ineh sesuut ilu', sesuut duru' tebikan, amung-amung luk do' buen, bua' berangan, idi bua' badam.

¹² Idi nguit usin dueh kua' kinula' ratnan luk atun. Ngaceku usin luk pangeh linubedneh bang tebpung-tebpung muyuh ineh, do' muyuh nguit ineh lemubed. Kian ideh sala' baré lek.

¹³ Idi nguit kinanak muyuh pana', idi lemubed.

¹⁴ Idi do' Allah luk Melalud méi' nemuyuh pa kiung lun rayeh ineh, pad ieh maré kinanak muyuh luk baken ineh, idi Beniamin teh muli' maya' nemuyuh. Idi ratnan ui ini, kudeng anak-anakku metutu', aganeh mo'.”

¹⁵ Idi ideh nengalap luk baréndeh ineh, dengan usin luk dueh kua' kinula'neh, idi Beniamin teh. Idi ideh nenalan iné' déi' Masir, idi papu' ni Yusup.

¹⁶ Kareb Yusup nenier Beniamin maya' nedeh, idi kebalaneh kuan lun luk ngimet ruma'neh, “Nguit lemulun ini amé' déi' ruma', idi ngeret sebuleng pung idi nanek neneh. Ngaceku ideh kuman denganku kareb muned aco napeh.”

¹⁷ Idi lemulun ineh nenganau' luk bila Yusup, idi ieh nenguit nedeh semuet bang ruma'neh.

¹⁸ Idi ideh matot ngaceku lemulun ineh nenguit nedeh amé' bang ruma' Yusup. Kebaladeh, “Tau ini iten amé' bang ruma' ini ngaceku usin luk pangeh linubed bang tebpung tau kareb lawé luk pun-pun. Ideh pian metueh rat netau, pad tau miak mangun ku demulundeh, idi ideh ngalap keladai tau deh.”

¹⁹ Idi ideh nepebala nan lemulun luk ngasa' ruma' Yusup, déi' munung tanga'.

²⁰ Kebaladeh, “O tuan, kai nacing pun-pun sikal melih akan;

²¹ idi kareb kai nacing natad luk inan ucu' idi kai nengukab tebpung kai, idi anid-anid inan usin dengan petap beratneh munung tebpung ineh. Iamo' usin ineh inuit kai lemubed,

²² idi teh inan usin baken inuit kai ku melih akan. Na kai kali' idé luk nenipa usin ineh bang tebpung kai.”

²³ Kebala lun luk ngasa' ineh nedeh, “Samal kuan muyuh, aleg matot; idi Allah muyuh idi Allah taman muyuh luk nenganau' usin bang tebpung muyuh ineh. Usin muyuh di pangeh ilapku.” Idi ieh iné' nengeruat Simion kuandeh.

²⁴ Idi lun luk ngasa' ineh nenguit nedeh iné' déi' ruma' Yusup. Idi ieh nemaré abpa' ku maru' kukuddeh. Idi kareb ie pangeh nemaman keladaideh,

²⁵ idi ideh nenganau' temina' luk baréndeh, idi nganét Yusup macing kareb muned aco. Ngaceku ideh pangeh neninger bala ratnan ideh kuman déi'

²⁶ Idi kareb Yusup pangeh nuli' idi ideh nenguit luk baréndeh ineh kuanneh déi' bang ruma'neh, idi ideh netekeradung pa kiugnneh.

²⁷ Idi Yusup nengitun ratnan ulundeh, kebalaneh, “Do'ké taman muyuh, lun rayeh luk bila muyuh ineh? Mulunké ieh teh?”

²⁸ Kebaladeh, “Taman kai demulunmu ineh mulun idi metueh teh.” Idi ideh netekeradung idi nengerayeh neneh.

²⁹ Kareb Yusup nenier kinanakneh Beniamin luk sebuleng tinan denganneh, idi kebalaneh, “Iniké kinanak muyuh luk isuut luk pangeh bila muyuh negku? Do' Allah méi' namu, O Asi!”

³⁰ Idi Yusup neburo denak-denak, ngaceku pelaba awang niatneh ku kinanakneh luk isuut ineh, pad ieh lélé nangi'. Idi ieh nesemuet bang takep idi nenangi' déi.

³¹ Pangeh ineh ieh nemaru' kiungneh idi neremuat; dengan ngagka' tangi'neh, kebalaneh, “Do' nguit luk kenen.”

³² Idi ideh nenganau' kuan Yusup setau', idi kuan kinanak-kinanakneh setau', idi kuan lun Masir luk pad-pad kuman denganneh setau', ngaceku na lun Masir ineh miak pamung téng dengan lun Iberani, ngaceku ieh ineh aceh bebpeng kuan lun Masir.

³³ Idi kinanak Yusup tudo petutup neneh, ieh ineh luk rayeh ineh maya' rayehneh idi luk isuut maya' suutneh teh; pad amungdeh mawa idi nier seburur dengan seburur.

³⁴ Idi ideh nengiding babpat Yusup rat pa kiungneh amé' pa kiung kinanak-kinanakneh, iamo' babpat Beniamin ineh limeh kua' ula'neh ratnan babpatdeh luk baken. Idi ideh nengirup idi mawang niat pad-pad dengan Yusup.