PUDUT 41 - BALA LUK DO'

Yusup Mada' Ilung Nupi Raca'

¹ Pangeh dueh lak, idi raca' Masir nenginupi. Bang nupineh ieh tuped tangeh Abpa' Nil.

² Idi rat bang Abpa' Nil ineh neremuat tudu' sapi' luk do' ayu idi melamu, nekuman uduh luk tangeb abpa'.

³ Idi pangeh ineh, inan tudu' sapi' luk baken neremuat, ayudeh dat idi merugu'. Idi ideh netuped muneng ku sapi' luk atun ineh tangeb abpa'.

⁴ Idi sapi' luk dat ayu idi merugu' ineh nekuman tudu' sapi' luk do' ayu idi luk melamu ineh. Pangeh ineh raca' nekulat.

⁵ Idi ieh nerudap teh idi nenginupi aceh kedueh kua'. Idi nelagan tudu' runguh padé nan sebuleng lawa luk do' lio idi melak,

⁶ idi muci tudu' runguh luk mekarang ku bui luk melau' rat pa busat aco.

⁷ Idi tudu' runguh luk mekarang ineh nenelen runguh luk do' lio ineh. Idi raca' pana' nekulat teh. Ieh nekali' neneh nenginupi mo'!

⁸ Kareb pekak uka-uka niat raca' ineh megagau. Idi ieh nengecuk nawar amung-amung lun luk mangun idi lun luk mileh bang bawang Masir. Idi ieh nemada' nedeh ratnan nupineh. Iamo' seburur pana' nateh luk kali' ilung nupi ineh.

⁹ Idi lun rayeh lun luk maré luk rupen ineh iné' ni raca', kebalaneh, “Bang aco sini ui ngamo sala'ku.

¹⁰ Iko pelaba useh negku, pad ui tinipa bang tutup lun rayeh lun luk nginita raca' dengan lun rayeh lun luk nganau' ruti.

¹¹ Idi bang sedacem kai dueh nenginupi, idi nupi kai dueh na mepad ilung.

¹² Idi seburur anak adi' lun Iberani idi dengan kai dueh, ieh ineh demulun lun rayeh lun luk nginita raca'. Idi kai dueh nemada' nupi kai dueh neneh. Idi ieh nemada' ilungneh kuan kai dueh.

¹³ Idi maya' kudeng luk bida'neh nekai dueh, kudeng ineh teh luk pangeh mangun. Ui ini linubedmu kuan kekamenku, idi lun denganku ineh pinatému.”

¹⁴ Idi raca' nengecuk nawar ni Yusup, idi ideh petacu nengeruat neneh rat bang tutup. Idi ieh nemingit idi nengelibal ayungneh, idi iné' matun raca'.

¹⁵ Idi kebala raca' neneh, “Ui pangeh nenginupi, idi seburur pana' nateh luk miak mada' ilungneh negku. Idi ui pangeh neninger, iko mileh mada' ilung nupi.”

¹⁶ Idi kebala Yusup, “Na ui mileh, O raca'; iamo' Allah miak maré or luk do' namu.”

¹⁷ Idi kebala raca', “Bang nupiku, ui tuped tangeb Abpa' Nil.

¹⁸ Idi inan tudu' sapi' luk do' ayu idi melamu numak rat bang abpa' idi nekuman uduh luk tangeb abpa' ineh.

¹⁹ Idi pangeh ineh numak tudu' sapi' luk merugu' idi dat ayu idi luk mekebping, tuped tangeb abpa' ineh teh. Nateh ui nekali' sapi' luk kudeng ineh dat bang aput tana' Masir.

²⁰ Idi sapi' luk merugu' nekuman tudu' sapi' luk melamu ineh.

²¹ Iamo' ideh mepad kudeng na nekuman, ngaceku ideh merugu' idi dat ayu mepad kudeng rat pun-pun. Idi ui nekulat.

²² Idi ui nenginupi teh, idi ui nenier tudu' runguh padé nan sebuleng batang luk do' lio idi melak.

²³ Idi pangeh ineh inan tudu' runguh luk mekarang ku bui luk melau' rat pa busat aco.

²⁴ Idi tudu' runguh luk mekarang ineh nenelen tudu' runguh padé luk do' lio ineh. Idi amung-amung ini pangeh bida'ku nelun luk mileh mangun, iamo' seburur pana' nateh luk miak mada' ilungneh negku.”

²⁵ Idi kebala Yusup nan raca', “Dueh nupimu ineh mepad ilung. Allah pangeh nemaré kali' namu luk miak ruenNeh.

²⁶ Tudu' sapi' luk do', ieh ineh tudu' lak, idi tudu' runguh padé luk do' lio ineh pana' tudu' lak. Nupi ineh mepad ilung.

²⁷ Idi tudu' sapi' luk merugu' luk numak muci ineh pana' tudu' lak teh. Idi tudu' runguh padé luk mekarang ku bui luk melau' rat pa busat aco, ieh ineh tudu' lak iru'.

²⁸ Idi mepad kudeng luk bilaku namu, Allah pangeh nemada' namu ratnan luk miak ruenNeh.

²⁹ Idi bang tudu' lak inan mela kuan aput-aput bawang Masir.

³⁰ Iamo' pangeh ineh miak macing tudu' lak luk miru, pad mekelupan lak luk do' bang bawang Masir. Idi iru' ineh miak ngusag bawang.

³¹ Idi akan luk mula' ineh na miak meterawé, ngaceku iru' luk macing ineh pelaba io.

³² Idi nupi ineh linio kuanmu macing dueh kua', ngaceku amung-amung ineh pangeh litep Allah, idi Allah teh miak ngacing ineh dengan mesaget.

³³ “Idi nekini do' iko mili' seburur lemulun luk do' idi mileh, idi ngikit neneh pad ieh ngimet bawang Masir ini.

³⁴ Idi do' iko ngikit tuda'-tuda' lun rayeh bang bawang ini, luk miak ngatur bawang Masir bang tudu' lak luk do' ineh.

³⁵ Idi do' ideh ngamung amung-amung akan bang anid-anid lak luk do' luk macing ini, pelé ideh ngamung padé bang anid-anid bawang, idi pad ideh ngasa' ineh.

³⁶ Idi amung uli' tana' ini miak mangun ku akan kuan bawang ini bang tudu' lak luk miru' ineh luk macing kuan tana' Masir, pad lun bang bawang ini na maté ngaceku iru' ineh.”

Yusup Kinikit Mangun Ku Tareh Raca'

³⁷ Idi amung bala Yusup ineh imo raca' idi lun rayehneh teh.

³⁸ Idi kebala raca' nedeh, “Tau na miak mili' seburur luk meluun do' ratnan Yusup luk inan Roh Allah bang neneh.”

³⁹ Idi kebala raca' ni Yusup, “Allah pangeh nengegala' amung ineh kuanmu. Ngaceku ineh kali' rungen na luk idi seburur pana' luk meluun do' idi meluun ileh ratnan iko.

⁴⁰ Idi ui ngikit namu ku lun rayeh bang bawangku, pad amung anak itinku pa liang ukummu, iamo' imetku ini mo' luk tadukku rat namu.

⁴¹ Idi ui miak ngikit namu mangun ku lun rayeh bang aput tana' Masir.”

⁴² Idi raca' nengelengu susing ratnan ticu'neh idi nengebpul ineh luun bua' ticu' Yusup. Idi ieh nengayung neneh ku kibung pu luk do'. Idi ieh nengayung dierneh ku bané amas.

⁴³ Idi ieh nemaré neneh maya' kerétaneh luk kedueh; idi ideh nengitang pa atunneh, “Ngerayeh neneh!” Kudeng ini raca' nengikit ni Yusup ngimet bang tana' Masir.

⁴⁴ Idi kebala raca' neneh, “Ui ini raca', iamo' kudeng iko na pian, seburur pana' na miak nganau' anun-anun bang aput tana' Masir.”

⁴⁵ Idi ieh nenganau' ngadan Yusup ineh Sapenat Panieh; idi nemaré kuanneh Asenat anak Potipera, imam luk déi' bawang On ku awanneh. Idi Yusup nenalan aput-aput tana' Masir.

⁴⁶ Idi ulun Yusup teluh ngepulu' lak kareb ieh nengimun ngakem kuan raca' Masir ineh. Idi ieh nenecan ruma' raca' idi nenalan aput-aput tana' Masir.

⁴⁷ Idi bang tudu' lak luk do' tana' ineh nengeruat bua' dengan mela.

⁴⁸ Idi Yusup nengamung amung-amung akan bang tudu' lak luk do' ineh, idi ieh nenganug ineh bang anid-anid bawang. Idi peranih anid-anid bawang ineh dinugneh.

⁴⁹ Idi ieh nengamung padé mepad kinula' bada luk tangeb abpa' rayeh, pad ieh nugka' ngiap ineh.

⁵⁰ Kareb nateh amung lak luk miru' ineh nacing, Yusup inan dueh anak deléi luk tinganak Asenat.

⁵¹ Idi kebalaneh, “Allah pangeh nenganau' negku kelupan amung-amung dereh, idi uang telek ruma' tamanku.” Idi ieh nenganau' ngadan anakneh luk atun ineh Manasé'.

⁵² Idi teh kebalaneh, “Allah pangeh nemaré anak kuanku bang bawang luk inanku medereh.” Idi ieh nenganau' ngadan anakneh luk kedueh ineh Epraim.

⁵³ Idi pangeh tudu' lak luk do' bang bawang Masir,

⁵⁴ idi tudu' lak iru' ineh nengimun, maya' kudeng luk bila Yusup. Idi inan iru' bang anid-anid bawang, iamo' aput Masir inan petap.

⁵⁵ Kareb lun Masir melau, idi ideh nengitang mutuh akan nan raca'. Idi kebalaneh nelun bawang Masir ineh, “Do' muyuh amé' ni Yusup, idi nganau' anun-anun luk belénneh nemuyuh.”

⁵⁶ Kareb iru' ineh pangeh nacing aput bawang ineh, idi Yusup nengukab amung lepo padé, idi nemasui padé ineh kuan lun Masir, ngaceku iru' ineh pelaba rayeh bang bawang Masir.

⁵⁷ Lemulun iné' déi Masir ratnan anid-anid bawang, pad melih akan rat ni Yusup ngaceku iru' ineh pelaba rayeh aput tana'.