PUDUT 34 - BALA LUK DO'

Dina Rinuid Sikem

¹ Idi Dina anak Lia didueh Yakub, neremuat sikal nier decur Kanaan.

² Idi Sikem anak Hemor lun Hiwi luk pengulu bawang ineh nenier neneh, idi ieh nengeruid neneh idi nepasét neneh.

³ Idi ieh mawa ku anak decur ineh pad ieh nengubuk neneh.

⁴ Idi kebala Sikem nan tamanneh, “Do' ngalap anak adi' ini ku awanku.”

⁵ Idi Yakub kali' ratnan anakneh Dina pangeh inigu'. Iamo' anak-anakneh luk deléi nematar aya'deh déi' laman, idi Yakub nepirud pad ideh nacing.

⁶ Idi Hemor, taman Sikem ineh iné' matun Yakub sikal pegayam neneh.

⁷ Idi anak-anak Yakub cacing rat déi' laman. Kareb ideh neninger ratnan ineh, ideh mét niat idi museh, ngaceku Sikem pangeh nenganau' luk dat arang pupu loun Israil, ieh ineh ieh nengeruid anak Yakub.

⁸ Idi kebala Hemor nedeh, “Anakku Sikem mawa ku anak decurmu. Ui mutuh namu maré neneh lapenneh ku awanneh.

⁹ Do' muyuh paweh dengan kai; idi maré anak decur muyuh kuan kai, idi ngalap anak decur kai kuan muyuh.

¹⁰ Idi do' muyuh tudo dengan kai; idi tana' luk pian muyuh miak lapen muyuh. Do' muyuh tudo idi pepua', idi ngalap binaweh kuan burur muyuh sebuleng.”

¹¹ Idi teh kebala Sikem kuan taman Dina idi kuan kinanak-kinanakneh, “Do' muyuh méi' kuanku, idi anun-anun luk pian muyuh miak ui maré.

¹² Do' mutuh rat negku tuda'-tuda' ula' purut idi baré pana', idi ui miak maré amung ineh kuan muyuh, mepad kudeng luk pituen muyuh rat negku; iamo' maré anak adi' ineh ku awanku.”

¹³ Iamo' anak-anak deléi Yakub nengor bala Sikem idi Hemor tananneh dengan balih, ngaceku Dina kinanakdeh pangeh inigu'neh.

¹⁴ Kebaladeh neneh, “Na kai miak nganau' luk kudeng ineh, ieh ineh maré kinanak kai kuan lemulun luk na sinunat, ngaceku ini mangun ku sala' kuan kai.

¹⁵ Dengan luk kudeng ini mo' kai miak maya' pian muyuh, ieh ineh kudeng muyuh mepad kudeng kai, idi amung-amung deléi arang muyuh pana' ruen nunat.

¹⁶ Pangeh ineh kai miak maré anak-anak kai kuan muyuh, idi anak-anak decur muyuh lapen kai, idi kai miak tudo dengan muyuh, idi tau mangun ku sebuleng pupu.

¹⁷ Iamo' kudeng muyuh na ninger bala kai idi na ruen nunat, idi kai miak ngalap kinanak kai, idi buro.”

¹⁸ Idi baladeh ineh petulu kuan Hemor idi anakneh Sikem.

¹⁹ Idi anak adi' ineh saget nenganau' amung-amung luk biladeh ineh, ngaceku ieh pelaba pian ku anak Yakub ineh. Idi teh ieh luk meluun buren rat arang lun bang ruma'neh.

²⁰ Idi Hemor dengan anakneh Sikem iné' munung tanga' bawangdeh, idi kebala didueh kuan amung-amung lun bang bawang ineh,

²¹ “Lun ini sikal perurum netau; ngaceku ineh do' nima' nedeh tudo arang tau idi nalan pad piandeh, ngaceku tana' ini petap rayeh kuandeh. Idi do' tau ngaweh anak decurdeh, idi teh tau miak maré anak decur tau lapendeh.

²² Iamo' lemulun ini pian tudo dengan tau pad mangun ku aceh pupu, kudeng amung deléi tau uen nunat mepad kudeng ideh.

²³ Naké amung-amung sapi', amék, idi amung binawehdeh dengan amung-amung pungdeh kuan tau? Kudeng tau maya' piandeh, idi ideh miak tudo dengan tau.”

²⁴ Idi amung-amung lun bang bawang ineh nengamo bala Hemor dengan anakneh Sikem. Idi amung-amung deléideh sinunat.

²⁵ Pangeh teluh aco, kareb uned ideh ngeca ét sunat ineh, idi dueh anak Yakub ineh, ieh ineh Simion idi Liwi, kinanak Dina ineh, nengalap pelapet didueh, idi iné' libut bawang ineh dengan lulem idi nengaté amung-amung lun deléi.

²⁶ Idi Hemor dengan Sikem pana' pinaté didueh, idi didueh nengalap Dina rat bang ruma' Sikem idi nenguit neneh buro.

²⁷ Idi anak-anak Yakub luk baken iné' bang bawang ineh idi nemano binawehdeh ngua' igu' kinanak didueh.

²⁸ Idi amung-amung dimba, amék, sapi', idi amung-amung keladai, idi amung-amung luk idi bang bawang idi luk petatang ku bawang ilapdeh.

²⁹ Idi amung-amung binawehdeh, anakdeh, idi awandeh pana' tibandeh, idi amung-amung luk bang ruma'deh ilapdeh.

³⁰ Idi kebala Yakub ni Simion idi Liwi, “Medueh pangeh nengesusa' negku, idi nengedat ngadanku arang lun Kanaani idi lun Prisi, idi amung lun baken luk tudo bang bawang ini megateh negku. Tau ini sesuut mo'. Kudeng ideh pamung sikal metueh rat negku, idi na miak na ideh metueh rat negku, idi ngaté negku dengan amung uang tetek ruma'ku pana'.”

³¹ Iamo' kebala didueh ineh, “Na tau miak nima' kinanak kai uen ngigu', ayu-ayuneh ieh decur luk ngedeléi.