PUDUT 33 - BALA LUK DO'

Yakub Papu' Ni Esau

¹ Yakub nekali' Esau nacing dengan apat ngeratu anak itinneh. Idi ieh nemabpat anak-anakneh ineh kuan i Lia, Rakel, idi dueh apidneh.

² Idi ieh nenganau' dueh apid ineh dengan anak didueh pa atun, idi Lia dengan anakneh pa muci.

³ Idi Yakub sebuleng nenalan pa atundeh. Idi ieh netekunal luun tana' macing tudu' kua', pad macing muneng inan kinanakneh.

⁴ Idi Esau nupun matun neneh, idi nengapel neneh, idi nemuen neneh, idi didueh perigéi' nangi.

⁵ Idi Esau nenier amung-amung decur idi anak-anak ineh, idi kebalaneh, “Idé lemulun luk denganmu ineh?” Idi kebala Yakub, “Ini anak-anak luk pangeh biré Allah kuanku.”

⁶ Idi dueh apidneh ineh dengan anak-anak didueh nacing muneng neneh idi ideh netekunal.

⁷ Idi Lia dengan anak-anakneh nacing, idi muci Yusup dengan Rakel nacing, idi netekunal teh.

⁸ Kebala Esau, “Anunké babpat ineh luk nacing negku ina? Anunké ilungneh?” Kebala Yakub, “Ieh ineh pelé iko miak méi' negku.”

⁹ Iamo' kebala Esau, “Ui inan petap, O kinanakku; ngalap luk iko kuan kuan bururmu sebuleng.”

¹⁰ Idi kebala Yakub, “Na miak kudeng ineh, ui mutuh namu, kudeng iko méi' negku, do' ngalap baréku ini; ngaceku ui pangeh nenier kiungmu mepad kudeng nier ayu Allah, idi iko mawang niat negku.

¹¹ Do' ngalap baré luk barénku namu, ngaceku Allah pangeh méi' negku pad Ieh nemaré amung-amung luk pianku.” Idi ieh nengubuk-ngubuk neneh pad ieh nengalap.

¹² Idi kebala Esau, “Do' tau nalan idi ui nalan pa atun muyuh.”

¹³ Iamo' kebala Yakub, “Iko kali' ratnan anak-anak ini melaya', idi teh ui inan amék idi sapi' luk niti' anak. Kudeng ideh uen ngusu bang seaco kinioneh, kali' rungen ideh maté.

¹⁴ Do' iko nalan pa atun kai, idi ui miak nguyut nedeh ulai-ulai maya' lawé pung luk pa atunku idi maya' lawé anak-anak, pad ui macing namu dei' Edom.”

¹⁵ Idi kebala Esau, “Do' ui necan tuda'-tuda' anak itinku maya' namu.” Iamo' kebala Yakub, “Aganeh mo'! Na mekudeh kudeng iko méi' negku.”

¹⁶ Idi bang aco sineh Esau nuli' maya' dalan amé' déi Edom.

¹⁷ Iamo' Yakub iné' Sukot, idi ieh nemudut aceh ruma' kuan bururneh sebuleng idi libung kuan amung-amung pungneh, pad lemulun neneten su ineh Sukot.

¹⁸ Idi Yakub nacing déi' bawang Sikem luk bang tana' Kanaan dengan do', maya' dalan rat déi' Mesopotamia, idi ieh nucu' muneng ku bawang.

¹⁹ Idi ieh nemelih selaleng tana' inanneh nemudut ruma'neh, ratnan anak-anak Hemor luk taman Sikem, dengan meratu balad pirak.

²⁰ Idi ieh nenganau' aceh bubpun déi', idi neneten ngadanneh, “El, ieh ineh Allah Israil.”