PUDUT 29 - BALA LUK DO'

Yakub Macing Ruma' Laban

¹ Idi Yakub nenalan rat déi' matun tana' luk pa busat aco.

² Denak-denak ieh nenier aceh subuk luun natad dengan teluh ngeriudan dumba telubid muneng ku ineh. Ngaceku rat bang subuk ineh lemulun maré luk rupen dumba ineh. Idi inan sebuleng batu luk rayeh ngakeb munung subuk ineh.

³ Kareb dumba ineh nepamung, idi lun luk matar dumba ineh nengelubid batu ineh, idi nemaré amung dumba ineh ngirup. Pangeh ineh ideh nengelubed batu ineh amé' munung subuk ineh.

⁴ Idi kebala Yakub nedeh, “O kinanak-kinanakku, rat iapeh muyuh?” Kebaladeh, “Kai rat Haran.”

⁵ Idi kebalaneh nedeh, “Kali' muyuh Laban Nahor?” “Kali'.”

⁶ Idi kebala Yakub nedeh, “Do' ieh?” Idi kebaladeh, “Do'. Siruh, ineh anakneh, Rakel macing dengan aya'neh!”

⁷ Idi kebala Yakub, “Siruh, aco ini macang teh. Nateh karebneh miak inan ngamung dumba. Do' maré nedeh ngirup, idi nguit nedeh amé' luun laman.”

⁸ Idi kebaladeh, “Na kai miak nganau' kudeng ineh, kareb nateh amung riudan aya' ineh imung idi lemulun ngelubid batu luk munung subuk ineh, pad kai maré luk rupen amung-amung dumba ineh.”

⁹ Kareb Yakub uned pebala nedeh, idi Rakel luk matar dumba tamanneh nacing.

¹⁰ Kareb Yakub nenier Rakel dengan aya' taman pinakenneh Laban, idi ieh iné' ngelubid batu ineh, idi nemaré amung aya' ineh ngirup.

¹¹ Idi Yakub nemuen Rakel idi nangi'.

¹² Idi kebalaneh ni Rakel, “Ui ini pupu i tamam, idi anak Ribeka.” Idi Rakel nupun mada' tamanneh.

¹³ Kareb Laban neninger bala ratnan anak pinakenneh, Yakub, idi ieh nupun papu' neneh, idi ieh nengapel neneh idi nemuen neneh, idi ieh nenguit neneh umak ruma'neh. Idi Yakub nemada' ni Laban ratnan amung-amung lawéneh.

¹⁴ Idi kebala Laban neneh, “Matu iko pupuku luk muneng!” Idi Yakub netudo sebulan su ineh.

Yakub Amé' Mudeng Ni Laban Ngaceku Rakel Idi Lia

¹⁵ Idi kebala Laban ni Yakub “Na petulu iko ngakem kuanku mo'-mo' sagan tu pana' iko pupuku. Anun luk pianmu ku tabparmu?”

¹⁶ Idi Laban inan dueh anak decur, seluk rayeh, Lia, idi seluk isuut, Rakel.

¹⁷ Idi Lia ineh na do' taga mateh, iamo' Rakel ineh metagap burur idi do' taga.

¹⁸ Idi Yakub mawa ni Rakel, idi kebalaneh ni Laban, “Ui ngakem tudu' lak kuanmu kudeng iko nima' negku ngalap ni Rakel ku awanku.”

¹⁹ Kebala Laban, “Meluun do' ui maré neneh namu ratnan ui maré neneh nelun baken. Do' iko tudo denganku.”

²⁰ Idi Yakub nengakem tudu' lak kuanneh pad ieh miak ngalap ni Rakel. Idi bang terawéneh, tudu' lak ineh mepad kudeng segageh mo', ngaceku ieh mawa neneh.

²¹ Idi kebala Yakub ni Laban, “Do' maré anakmu negku, ngaceku pangeh petap karebneh.”

²² Idi Laban nenganau' aceh irau paweh, idi ieh neneteng nelun mula'.

²³ Iamo' malem ineh ieh nenguit ni Lia amé' ni Yakub. Idi Yakub nepamung neneh.

²⁴ (Idi Laban nemaré Silpa mangun ku demulun anakneh Lia.)

²⁵ Kareb pekak uka-uka Yakub nenier ni Lia. Idi kebala Yakub ni Laban, “Ngudeh iko nenganau' luk kudeng ini kuanku? Ui pangeh nengakem pad ui ngalap ni Rakel? Ngudeh iko nenaluk negku?”

²⁶ Idi kebala Laban, “Bang bawang ini kai na miak maré anak luk isuut ngaweh atun ratnan seluk rayeh.

²⁷ Nganét seminggu, pad irau paweh ini mabud, idi ui maré ni Rakel kuanmu kudeng iko ngakem kuanku tudu' lak teh.”

²⁸ Idi Yakub nengamo, idi pangeh seminggu, abud irau paweh ineh, idi Laban nemaré anakneh Rakel ni Yakub ku awanneh.

²⁹ (Idi Laban nemaré Bilha mangun ku demulun anakneh Rakel.)

³⁰ Idi Yakub nepamung ni Rakel teh, idi ieh mawa neneh meluun ratnan Lia. Idi ieh nengakem kuan Laban tudu' lak teh.

Anak-anak Yakub

³¹ Kareb Tuhan kali' Lia na inan Yakub mawa, idi Tuhan nemaré neneh inan anak. Iamo' Rakel ineh na anak.

³² Idi Lia mali' idi nenganak seburur anak deléi, idi ieh nenganau' ngadanneh Rubin, kebalaneh, “Tuhan pangeh nenier derehku, pad deléiku mawa negku.”

³³ Idi ieh mali' teh idi nenganak aceh anak deléi, idi kebalaneh, “Tuhan nekali' negku na inan Yakub mawa, idi Ieh nemaré anak ini kuanku.” Idi ieh nenganau' ngadanneh Simion.

³⁴ Idi ieh mali' teh idi nenganak aceh anak deléi, idi kebalaneh, “Nekini deléiku muneng negku lek, ngaceku ui pangeh nenganak teluh anak deléi kuanneh.”

³⁵ Idi ieh mali' teh, idi nenganak aceh anak deléi, kebalaneh, “Sekua' ini ui sikal ngubur Tuhan.” Idi ieh nenganau' ngadan anak ineh Yehuda. Idi ieh nugka' na akan peh.