PUDUT 27 - BALA LUK DO'

Isak Ngeperuan Ni Yakub

¹ Kareb Isak mengered idi ieh nebuser, idi ieh nenawar ni Esau, anakneh luk atun idi nepebala neneh, “O Asi!” Idi Esau nengor, “Anun idi, Ama'?”

² Kebala Isak, “Siruh, ui pangeh mengered; idi na ui kali' idan karebku maté.

³ Do' iko ngalap binor idi ilebmu amé' bang pulung nakap pung kuanku.

⁴ Idi nanek aceh kikidku, mepad kudeng luk inanku geregan, idi nguit ineh amé' negku. Kareb ui pangeh nekuman ineh, idi ui miak ngeperuan namu kareb nateh ui maté.”

⁵ Idi Ribeka neninger bala Isak ni Esau. Idi Esau iné' nganup.

⁶ Idi kebala Ribeka ni Yakub, “Bala i tamam kuan kinanakmu Esau ui pangeh neninger,

⁷ kebalaneh, ‘Do' nguit kuanku aceh pung, idi nganau' aceh kikidku. Kareb ui pangeh nekuman ineh, idi ui miak maré peruan kuanmu kareb nateh ui maté.’

⁸ Ngaceku ineh, O Asi, do' ninger balaku idi nganau' anun-anun luk belénku namu.

⁹ Do' iko amé' bang laman, idi nguit dueh anak amék luk melamu kuanku, idi ui miak nanek ineh ku kikid i tamam, ieh ineh mepad kudeng luk inanneh geregan.

¹⁰ Idi iko miak nguit ineh amé' ni tamam pad ieh kuman, idi ieh ngeperuan namu kareb nateh ieh maté.”

¹¹ Idi kebala Yakub kuan tinanneh Ribeka, “Iamo Esau ineh selemulun luk mebuluh kubilneh, idi ui lemulun luk melana kubil.

¹² Kian, tamanku miak ngakem negku lek, idi ui mangun kudeng selemulun luk naluk neneh, pad ui ngacing kediman kuan bururku, idi baken peruan.”

¹³ Kebala tinanneh, “Kedimanmu kuan dui, O Asi, iamo' do' iko maya' balaku, idi amé' ngalap dueh amék ineh kuanku.”

¹⁴ Idi ieh iné' ngalap anak amék ineh, idi ieh nenguit ineh kuan tinanneh, idi tinanneh nenganau' ineh ku kikid, mepad kudeng luk inan tamanneh geregan.

¹⁵ Idi Ribeka nengalap ayung Esau luk meraga luk bang ruma'neh, idi nekungayungneh ni Yakub.

¹⁶ Idi dueh-dueh ticu'neh idi dierneh ibpuneh ku kubil amék ineh.

¹⁷ Idi ieh nemaré kikid ineh idi ruti luk pangeh inau'neh, bang palad anakneh Yakub.

¹⁸ Idi Yakub iné' matun tamanneh, kebalaneh, “O Ama'!” Idi kebala Isak, “Anun idi, Asi, anakku sapeh iko ni?”

¹⁹ Kebala Yakub kuan tamanneh, “Ui ini Esau, anakmu luk rayeh, idi ui pangeh nenganau' mepad kudeng luk bilamu. Nekini do' iko tumui idi tudo kuman pung luk ilapku, pad iko maré peruan negku.”

²⁰ Idi kebala Isak, “Kudeng apehké iko mesaget nengalap ineh, Asi?” Idi kebalaneh, “Ngaceku Tuhan Allahmu nengedengan negku.”

²¹ Kebala Isak ni Yakub, “Do' iko amé' muneng, pad ui miak ngakem namu. Matuké iko anakku Esau?”

²² Idi Yakub iné' muneng nan tamanneh, idi Isak nengakem neneh, kebalaneh, “Balamu kudeng bala Yakub, iamo' ticu' ini ticu' Esau.”

²³ Iamo' na ieh nengiti neneh ngaceku ticu'neh dueh-dueh mebuluh kudeng ticu' Esau. Kareb ieh lélé ngeperuan neneh,

²⁴ idi ieh nengitun, “Matuké iko Esau?” Kebalaneh, “Matu.”

²⁵ Idi kebala Isak, “Do' nganau' akan ineh muneng negku. Pangeh ui kuman ineh idi ui ngeperuan namu.” Idi Yakub nenganau' akan ineh muneng neneh idi Isak nekuman. Idi Yakub nemaré abpa' anggur rupenneh.

²⁶ Idi kebala tamanneh neneh, “O Asi, do' iko amé' muneng idi muen negku.”

²⁷ Idi kareb Yakub iné' muen tamanneh, petacu Isak kali' buen ayungneh, idi ieh nengeperuan neneh, kebalaneh, “Buen anakku ini mepad kudeng buen lati' luk inan Tuhan pangeh nemaré peruan!

²⁸ Idi do' Allah ngebpeh kuanmu ipup rat déi' langit, pad tana'mu mebaleng idi padé idi abpa' anggurmu petap.

²⁹ Idi do' tuda'-tuda' bawang mangun ku demulunmu, idi tuda'-tuda' pupu tekunal pa kiungmu. Do' iko ngimet amung-amung pupumu sebuleng, idi inul tinanmu pana' miak tekunal pa kiungmu. Idi kediman kuan idé-idé luk ngediman namu, idi peruan kuan idé-idé luk ngeperuan namu!”

Isak Ngeperuan Ni Esau

³⁰ Pangeh Isak nemaré peruan kuan Yakub, idi Yakub neburo. Kareb ineh Esau nacing rat nakap pung ineh.

³¹ Idi ieh nenganau' kikid, idi nenguit ineh kuan tamanneh, kebalaneh, “O Ama', tumui iko, idi kuman luk ilapku, pad iko miak ngeperuan negku.”

³² Idi kebala Isak, “Idéké iko ini?” Idi kebalaneh, “Ui ini Esau, anakmu luk atun.”

³³ Idi Isak pelaba gegker, kebalaneh, “Idéké luk nengeret pung ineh idi luk nenguit ineh iné' negku? Ui nekuman ineh kareb nateh iko nacing. Idi ui pangeh nengeperuan neneh. Idi kali' rungen peruan ineh kuanneh macing ruked-ruked.”

³⁴ Kareb Esau neninger bala tamanneh, idi ieh nengitang idi mesusa' niat, kebalaneh kuan tamanneh, “O Ama', maré peruan kuanku teh.”

³⁵ Kebala Isak, “Kinanakmu nacing dengan naluk, idi nengalap peruanmu ineh.”

³⁶ Idi kebala Esau, “Naké ieh matu titen lun, Yakub? Ngaceku nekini dueh kua' ieh pangeh nenaluk negku. Idi ieh pangeh nengaro babpatku luk rayeh. Idi nekini peruanku pana' ilapneh.” Idi kebala Esau, “Naké iko maré peruan kuanku teh?”

³⁷ Idi kebala Isak neneh, “Ui pangeh nengiding neneh mangun ku tuanmu, idi ui pangeh nenganau' amung-amung pupuneh mangun ku demulunneh. Ui pangeh nemaré kuanneh padé idi abpa' anggur teh. Anunké luk barénku namu peh?”

³⁸ Idi kebala Esau nan tamanneh, “Inanké aceh peruanmu teh, O Ama'? Barénmu aceh peruan kuanku teh.” Idi Esau nangi'.

³⁹ Idi kebala Isak neneh, “Luk inanmu tebawang na tana' mebaleng, idi na luk idi ipup kuan lati'mu.

⁴⁰ Iamo' ratnan pelapetmu iko miak mulun, idi iko mangun ku demulun kinanakmu. Iamo' kareb iko sikal metueh rat neneh, iko miak mepuit ratnan imetneh.”

⁴¹ Idi Esau megateh ni Yakub ngaceku peruan luk biré tamanneh kuanneh. Keterawéneh, “Aco luk inan temido até tamanku pangeh muneng. Kareb ineh ui ngaté ni Yakub.”

⁴² Iamo' Ribeka nekali' ratnan terawé Esau ineh, idi ieh nengecuk nawar ni Yakub, kebalaneh, “Do' iko ninger, kinanakmu Esau pian ngua' datmu idi ngaté namu.

⁴³ Idi nekini, Asi, do' maya' balaku. Do' iko temina' idi buro matun kinanakku Laban déi' Haran.

⁴⁴ Idi do' iko tudo déi' pad macing niat kinanakmu do',

⁴⁵ pad ieh mekelupan kekamenmu luk neneh; idi muci ui ngecuk lemulun nawar namu rat déi'. Ngudehké ui tacin medueh bang seaco?”

Isak Ngecuk Yakub Amé' Matun Ni Laban

⁴⁶ Idi kebala Ribeka ni Isak, “Ui pangeh musam ku awan Esau luk pupu baken. Kudeng Yakub ngalap seburur decur lun Hiti, meluun do' ui maté.”