PUDUT 26 - BALA LUK DO'

Isak Tebawang Déi' Gerar

¹ Kareb ineh inan iru' bang bawang ineh, ieh ineh baken ratnan iru' luk bang kareb Ibrahim. Idi Isak iné' matun Abimelek, raca' lun Pilistin déi' Gerar.

² Idi Tuhan nesilagan ni Isak, kebalaNeh, “Aleg iko amé' déi' Masir; do' iko tudo déi' tana' luk miak badénKu namu.

³ Do' iko tudo segageh bang bawang ini, idi Ui sikal ngedengan namu idi ngeperuan namu; Ui maré amung tana' ini kuanmu idi kuan inulmu. Ui miak ngeletep jani'Ku luk pijani'Ku ni Ibrahim, tamanmu ineh.

⁴ Idi Ui sikal ngula' inulmu mepad kudeng gituen déi' langit, idi Ui maré amung tana' ini kuan inulmu ineh. Idi amung-amung pupu bang tana' ini miak ngalap peruan ratnan inulmu:

⁵ ieh ineh ngaceku Ibrahim pangeh nemaya' balaKu, idi nengimet bada'Ku, idi ukumKu.”

⁶ Idi Isak tudo déi' Gerar.

⁷ Kareb lun bang bawang ineh nengitun neneh ratnan awanneh, idi kebalaneh, “Ieh ineh kinanakku,” ngaceku ieh matot mala neneh awanneh, keterawéneh, “Kudeng ui mala neneh awanku, ideh miak ngaté negku ngaceku Ribeka do' taga.”

⁸ Kareb Isak mio tudo déi', idi Raca' Abimelek ineh nenier rat bang tabukneh, idi ieh nekali' Isak idi Ribeka pegapel.

⁹ Idi Abimelek nenawar ni Isak, kebalaneh, “Siruh, decur ini awanmu; kudeng apeh balamu, ‘Ieh ini kinanaku'?” Idi kebala Isak neneh, “Ngaceku bang terawéku, ‘Kian lemulun ngaté negku ngaceku ieh.’ ”

¹⁰ Idi kebala Abimelek, “Anunké luk ruenmu kuan kai? Seburur lemulun bang bawang ini malé amé' pamung dengan awanmu. Ratnan luk kudeng ineh, iko miak ngacing sala' kuan kai.”

¹¹ Idi Abimelek nemebpeng nelun mula', kebalaneh, “Idé-idé luk ngesusa' lemulun ini dengan awanneh miak pitayen.”

¹² Idi Isak nenganau' lati', idi bang lak ineh ieh nengalap meratu kua' kinula' luk inisakneh, ngaceku Tuhan nengeperuan neneh.

¹³ Idi ieh megéi' ngalap mula' uli', pad ieh mangun ku lun do'.

¹⁴ Lun Pilistin megateh neneh, ngaceku ieh inan mula' amék, sapi', idi demulun teh.

¹⁵ Idi amung-amung subuk luk pangeh inukat demulun tamanneh bang kareb Ibrahim, tamanneh ineh, pipen lun Pilistin idi pinu'deh ku tana'.

¹⁶ Idi kebala Abimelek ni Isak, “Do' iko buro rat nekai, ngaceku iko iuk meluun lalud rat nekai.”

¹⁷ Idi Isak nenalan rat déi', idi ieh nelupo luun raked déi' Gerar, idi ieh netudo déi'.

¹⁸ Idi Isak nenuneb amung-amung subuk ineh luk inukat bang kareb tamanneh, Ibrahim, luk pipen lun Pilistin muci ratnan até tamanneh. Idi Isak neneten ngadan amung-amung subuk ineh maya' luk inau' tamanneh.

¹⁹ Idi lun duken Isak ineh nengukat aceh subuk déi' luun raked ineh, idi ideh kali' aceh bued abpa'.

²⁰ Idi amung lun luk matar sapi' lun Gerar nepekedaluh nelun luk matar sapi' Isak, kebaladeh, “Kai kuan abpa' ini.” Ngaceku ineh ieh neneten ngadan subuk ineh, “Kedaluh.”

²¹ Idi lun duken Isak nengukat aceh subuk luk baken teh, idi ideh nepekedaluh neneh teh. Ngaceku ineh ieh neneten ngadan subuk ineh “Saro.”

²² Idi Isak nemubuh rat déi' idi nengukat aceh subuk luk baken, idi na ideh pekedaluh neneh peh. Ngaceku ineh ieh neneten ngadan subuk ineh “Puit,” kebalaneh, “Nekini Tuhan nemaré meruar kuanku. Ngaceku ineh miak tau uen ngeperuan bang bawang ini.”

²³ Idi Isak nenalan iné' déi' Birsiba.

²⁴ Idi bang alem ineh Tuhan nesilagan neneh, kebalaNeh, “Idi Ui ini Allah tamanmu Ibrahim. Aleg matot, ngaceku Ui idi denganmu. Ui ngeperuan namu idi Ui ngula' inulmu, ngaceku jani'Ku nan demulunKu Ibrahim.”

²⁵ Idi Isak nenganau' aceh bubpun su ineh, idi ieh nesembayang inan Tuhan. Idi ieh nelupo su ineh, idi lun dukenneh nengukat aceh subuk teh.

Jani' Isak Dengan Abimelek

²⁶ Idi Abimelek nacing rat déi' Gerar pad-pad dengan Ahusat, rurumneh, idi Pikol, lun rayeh bawehneh, pian pegayam ni Isak.

²⁷ Idi kebala Isak nediteluh, “Anunké punneh meteluh amé' negku, ngaceku muyuh megateh negku idi muyuh pangeh nengecuk negku buro rat nemuyuh?”

²⁸ Idi kebala diteluh, “Kai kali' Tuhan idi denganmu, idi kai ngerawé, do' inan aceh bulung luk arang tau. Kai pian namu pejani',

²⁹ pad iko na ngesusa' nekai, mepad kudeng kai pana' na nengesusa' namu. Kai pangeh méi' namu, idi kai nenima' namu buro dengan do' teh. Idi nekini iko inan Tuhan nemaré peruan.”

³⁰ Idi Isak nenganau' aceh irau kuandeh, idi ideh nekuman idi nengirup.

³¹ Idi pekak uka-uka ideh netumui idi nepebulung seburur dengan seburur; idi Isak nenima' nediteluh muli', idi diteluh nenalan rat neneh dengan nepedo'.

³² Idi bang aco sineh teh lun duken Isak nacing maré kali' ratnan subuk luk inukatdeh, kebaladeh, “Kai pangeh nengalap abpa'.”

³³ Idi ieh neneten ngadan subuk ineh “Bulung.” Ngaceku ineh ngadan bawang ineh titen Birsiba pad macing nekini.

Esau Ngaweh Pupu Baken

³⁴ Kareb ulun Esau apat ngepulu' lak, idi ieh nengaweh dueh anak lun Hiti, ieh ineh Yudit Beri, idi Basemat Elon.

³⁵ Idi didueh nengacing susa' niat kuan Isak idi Ribeka.