PUDUT 23 - BALA LUK DO'

Sara Maté Idi Tinanem

¹ Idi Sara mulun meratu dueh ngepulu' tudu' lak.

² Idi ieh naté déi' Hebron bang bawang Kanaan; idi Ibrahim netemido neneh.

³ Idi ieh neburo rat iring butung awanneh idi iné' nelun Hiti, kebalaneh,

⁴ “Ui ini seburur lun sakai luk tudo arang muyuh. Do' masuk aceh tana' nanku nanem awanku.”

⁵ Idi kebaladeh,

⁶ “Do' iko ninger bala kai, O tuan. Iko seburur pengulu luk rayeh arang kai, idi iapeh-iapeh lengutan kai luk buren, idi do' iko nanem awanmu déi'. Ngaceku seburur pana' rat arang kai na miak ngibpeng lengutandeh kuanmu pad iko miak nanem awanmu déi'.”

⁷ Idi Ibrahim netekunal pa kiungdeh,

⁸ kebalaneh, “Kudeng muyuh maré negku nanem awanku su ini, idi do' muyuh mutuh ni Epron Sohar lun Hiti ineh,

⁹ pelé ieh masui lubang Makpéla luk iring lati'neh kuanku dengan petap raganeh pa kiung muyuh, pad tana' ineh mangun ku lengutanku.”

¹⁰ Idi Epron idi tudo arang uned lun Hiti ineh, munung tanga' bawang su luk inan lun pegayam. Idi ieh nengor bala Ibrahim pa kiung amungdeh, kebalaneh,

¹¹ “O tuan, do' iko ninger balaku, ui miak maré amung tana' ineh kuanmu dengan lubang luk bang ineh. Ui sikal maré ineh namu pa kiung amung pupuku pad iko miak nanem awanmu déi.”

¹² Idi Ibrahim netekeradung pa kiung lun bang bawang ineh.

¹³ Idi kebalaneh ni Epron pedingeren lun mula', “Do' iko ninger do'-do'. Ui sikal melih amung tana' ineh; do' ngalap usin ini rat negku ku raganeh, pad ui miak nanem awanku déi'.”

¹⁴ Idi kebala Epron,

¹⁵ “O tuan, na mekudeh ratnan raga tana' ineh, luk apat ngeratu balad pirak. Nanem mo' awanmu su ineh.”

¹⁶ Idi Ibrahim nengamo idi ieh nenimang kinula' pirak luk bila Epron ineh pa kiung lun mula' ieh ineh 400 balad pirak, ieh ineh maya' timang lemulun luk pepua'.

¹⁷ Kudeng ineh lawéneh tana' Epron luk déi' Makpéla luk pa busat aco Mamré mangun ku tana' Ibrahim, ieh ineh lati'neh idi lubang luk bang ineh pana', idi amung-amung lawa kayuh luun tana' ineh macing ku lakanneh.

¹⁸ Amung lun Hiti luk idi neninger gayam ineh nengamo ratnan tana' ineh miak lapen Ibrahim.

¹⁹ Pangeh ineh, Ibrahim nenanem awanneh, Sara, bang lubang ineh déi' bawang Kanaan.

²⁰ Idi tana' ineh, dengan lubang luk bang ineh teh biré lun Hiti ni Ibrahim miak mangun ku lengutanneh sebuleng.