PUDUT 22 - BALA LUK DO'

Anu Ibrahim Tinutun

¹ Pangeh amung-amung ineh nangun, Allah nenutun Ibrahim, kebalaNeh, “O Ibrahim!” Idi kebala Ibrahim, “Anun idi, Tuhan?”

² Idi kebala Allah, “Ngalap anak bulengmu, Isak luk inanmu mawa, idi amé' déi' tana' Moria. Idi maré neneh sabpen ku aceh baré kuanKu luun aceh surud luk badénKu namu.”

³ Idi pekak uka-uka, Ibrahim nengapak kayuh ku ngeseb baré luun bubpun. Idi ieh nenganau' amung-amung luk itenneh luun keted keladaineh. Idi ieh nenguit Isak dengan dueh demulunneh, idi nenalan iné' su luk pangeh bila Allah kuanneh.

⁴ Bang aco luk keteluh Ibrahim nenier su ineh rat mado.

⁵ Idi kebalaneh nan demulunneh, “Tudo su ini medueh dengan keladai ineh, idi ui dengan anakku ini miak amé' déi'. Kareb kai pangeh sembayang kai miak lemubed matun nemedueh teh.”

⁶ Idi Ibrahim nemaré kayuh ineh panen Isak. Idi Ibrahim nenguit apui, idi iyu teh. Idi dingetameh nenalan.

⁷ Idi kebala Isak, “O Ama'!” Idi kebala Ibrahim, “Anun idi, Asi?” Idi kebala Isak, “Siruh, ini apui idi kayuh. Iamo' iapeh anak dumba luk barén sabpen ineh?”

⁸ Idi kebala Ibrahim, “Allah sebuleng miak maré aceh anak dumba.” Idi dingetameh nenalan teh.

⁹ Kareb didueh nacing déi' su luk pangeh bila Allah neneh, idi Ibrahim nenganau' aceh bubpun. Idi ieh nemipin kayuh luun ineh. Idi ieh nengaling anakneh ineh idi nengerareng neneh luun kayuh luk luun bubpun ineh.

¹⁰ Idi ieh nengalap iyu, ku ngeret neneh.

¹¹ Iamo' aceh Melaikat Tuhan nengitang rat déi' surga, kebalaneh, “O Ibrahim, Ibrahim!” Idi kebala Ibrahim, “Anun idi, Tuhan?”

¹² Idi kebala Melaikat ineh, “Aleg iko ngaté anak ineh, idi aleg nganau' anun-anun kuanneh. Nekini Ui kali' iko matot inan Allah. Ngaceku sagan pana' ieh anak bulengmu, na iko ngibpeng neneh kuanKu.”

¹³ Idi Ibrahim netugak idi nenier libut-libutneh idi inan sebuleng dumba deléi nepabpung unganeh nan angat kayuh. Idi ieh pana' iné' ngalap dumba ineh idi nemaré neneh mangun ku baré luk sabpen ku libal anakneh.

¹⁴ Idi Ibrahim neneten ngadan su ineh “Tuhan Miak Maré.” Idi macing nekini pana' lemulun mala, “Luun surud Tuhan ineh Ieh maré.”

¹⁵ Idi Melaikat Tuhan nengitang kuan Ibrahim sekedueh kua' rat déi' surga,

¹⁶ kebalaNeh, “Ratnan ngadanKu Ui pebulung, Ui ini Tuhan luk pebala, ngaceku iko pangeh nenganau' ini, idi na nengibpeng anak bulengmu, kuanKu,

¹⁷ idi matu Ui miak maré peruan kuanmu, idi Ui miak ngula' anak inulmu mepad kudeng gituen bang langit, idi mepad kudeng bada tangeb abpa' rayeh. Idi anak inulmu ineh miak metueh ratnan amung-amung bunu'deh,

¹⁸ idi ratnan inulmu amung-amung pupu luk bang tana' ini miak ngalap peruan, ngaceku iko nemaya' balaKu.”

¹⁹ Pangeh ineh Ibrahim nelemubed matun demulunneh, idi ideh nenalan iné' déi' Birsiba, idi Ibrahim netebawang déi' Birsiba.

Inul Nahor

²⁰ Idi pangeh ineh, idi Ibrahim nekali' ratnan Milka pangeh nenganak tuda'-tuda' anak kuan kinanakneh Nahor:

²¹ ieh ineh, Us, anak lun atun, Bus, kinanakneh, Kemuel, taman Aram ineh,

²² Kesed, Haso, Pildas, Jidlap, idi Betuil.”

²³ (Idi Betuil nenginul Ribeka.) Idi luk ualuh burur anak deléi ini tinganak Milka kuan Nahor, kinanak Ibrahim ineh.

²⁴ Idi apid Nahor, luk ngadanneh Riuma ineh pana', nenganak Tiba, Gaham, Tahas, idi Maka.