PUDUT 21 - BALA LUK DO'

Isak Tinganak

¹ Idi Tuhan méi' ni Sara, mepad kudeng luk bilaNeh atun.

² Idi Sara mali' idi nenganak aceh anak deléi kuan Ibrahim kareb ieh mengered, ieh ineh bang kareb luk litep Allah atun.

³ Idi Ibrahim nenganau' ngadanneh Isak.

⁴ Idi kareb ulun Isak ualuh aco, idi Ibrahim nenunat neneh, maya' kudeng luk bila Allah neneh.

⁵ Idi kareb Isak tinganak, ulun Ibrahim meratu lak.

⁶ Idi kebala Sara, “Allah nenganau' negku mawang niat idi meriruh, pad amung-amung lemulun luk ninger bala ineh miak meriruh denganku.”

⁷ Idi teh kebalaneh, “Idéké luk nepebala kuan Ibrahim, ‘Sara miak niti' anak'? Iamo' ui pangeh nenganak aceh anak deléi kuanneh kareb ieh mengered.”

⁸ Idi anak ineh temubu', idi kareb aco luk inan Isak nugka' niti', idi Ibrahim nenganau' aceh irau rayeh.

Hagar Idi Ismail Icuk Buro

⁹ Idi Sara nenier anak Hagar, decur lun Masir, luk pangeh tinganakneh kuan Ibrahim, idi ieh marot dengan anakneh Isak.

¹⁰ Idi kebala Sara ni Ibrahim, “Masut demulun decur ini dengan anakneh. Ngaceku anak demulun decur ineh na miak ngalap babpat pad-pad dengan anakku Isak.”

¹¹ Idi bala ini pelaba dat pedingeren Ibrahim, ngaceku Ismail pana' anakneh.

¹² Iamo' kebala Tuhan ni Ibrahim, “Aleg mesusa' ratnan anak ineh idi ratnan demulumu pana'. Idi anun-anun luk bila Sara namu, do' iko nganau', ngaceku ratnan Isak, inulmu miak tetanen.

¹³ Idi anak demulunmu pana' miak ruenKu mangun ku aceh pupu, ngaceku ieh pana' anakmu.”

¹⁴ Idi pekak uka-uka Ibrahim nemaré aceh nuba' ku balu' Hagar idi sebuleng seréi' luk panu' ku abpa'. Idi ieh nemaré Ismail baben Hagar. Idi ieh nengecuk neneh nalan. Idi Hagar neburo, idi nalan-nalan déi' su luk ali-ali luk titen Birsiba.

¹⁵ Idi kareb abpa' luk bang seréi' ineh pangeh mabud, idi ieh nenganau' anak ineh telubid pa liang kayuh.

¹⁶ Idi ieh nenalan, idi netudo limeh ngepulu' depeh kiadoneh rat ni Ismail. Kebalaneh, “Na ui tuman nier anakku ini maté.” Idi ieh netudo mado rat neneh idi anak ineh nangi'.

¹⁷ Idi Allah neninger tangi' anakneh; idi kebala melaikat Allah rat déi' langit ni Hagar, “Anunké luk inanmu mesusa', O Hagar? Aleg matot, Allah pangeh neninger tangi' anakmu.

¹⁸ Do' iko tumui, ngalap anak ineh idi ngubuk neneh. Ui sikal nganau' neneh ku aceh pupu luk rayeh.”

¹⁹ Idi Allah nengukab mateh Hagar pad ieh nenier aceh bued abpa'. Idi ieh iné' ngalap abpa' bang seréi' ineh, idi nemaré rupen anakneh.

²⁰ Idi Allah nengedengan anakneh pad macing ieh rayeh. Idi ieh netudo déi' su luk ali-ali idi mangun ku selemulun luk mileh nganup.

²¹ Idi ieh netudo déi' su luk ali-ali déi' Paran. Idi tinanneh nengalap seburur decur rat tana' Masir ku awan Ismail.

Bulung Abimelek Dengan Ibrahim

²² Kareb ineh Abimelek dengan Pikol, lun rayeh bawehneh, nepebala ni Ibrahim, “Allah idi denganmu bang amung-amung kekamenmu.

²³ Ngaceku ineh, nekini do' iko pejani' negku pa kiung Allah, pelé iko na naluk negku, anakku, idi mupunku. Iamo' mepad kudeng luk pangeh inau'ku kuanmu, do' iko pana' nganau' kuanku idi kuan bawangku luk inanmu tudo.”

²⁴ Idi kebala Ibrahim, “Mo, ui pejani'.”

²⁵ Idi Ibrahim nengilang ni Abimelek ratnan subuk luk pangeh pino demulunneh ineh.

²⁶ Idi kebala Abimelek, “Na ui kali' idé luk nenganau' kudeng ineh. Idi teh iko na nemaré kali' negku. Ini mo' ui kali'.”

²⁷ Idi Ibrahim nemaré tuda'-tuda' dumba idi sapi' ni Abimelek idi didueh nepejani'.

²⁸ Idi Ibrahim nengatad tudu' anak dumba tineh ratnan dumba-dumbaneh.

²⁹ Idi kebala Abimelek ni Ibrahim, “Ku anun dumba tineh luk tudu' ini luk pangeh itadmu?”

³⁰ Idi kebala Ibrahim, “Tudu' anak dumba ini lapenmu rat bang paladku mangun ku aceh tanu' kuanku ratnan ui pangeh nengukat subuk ini.”

³¹ Idi su ineh titen Birsiba; ngaceku déi' inan didueh nepejani'.

³² Pangeh didueh nepejani' déi' Birsiba, Abimelek, idi Pikol nelemubed iné' déi' tana' lun Pilistin.

³³ Idi déi' Birsiba Ibrahim nenibu aceh lawa kayuh, idi ieh nesembayang déi' idi nenawar ngadan Tuhan, ieh ineh Allah luk Meruked.

³⁴ Idi Ibrahim netudo déi' tana' lun Pilistin bang tuda'-tuda' io.