PUDUT 2 - BALA LUK DO'

¹ Idi tana' idi langit pangeh pinudut.

² Idi bang aco luk ketudu' Allah nemangeh kekamenNeh. Idi Ieh nucu'.

³ Idi Ieh nengeperuan aco luk ketudu' ineh idi nengeligan neneh, ngaceku bang aco sineh Ieh nemangeh pudutNeh, idi nucu' ratnan kekamenNeh.

⁴ Idi kudeng ineh tana' idi langit pangeh pinudut. Kareb Tuhan Allah nemudut tana' idi langit,

Kabun Eden

⁵ na luk idi uduh idi ilung luk mulun luun tana', ngaceku nateh Tuhan Allah nengebpeh udan pa luun tana' ineh, idi nateh lemulun luk ngasa' tana' ineh.

⁶ Iamo' inan noon remuat rat bang tana' luk ngeba' aput-aput tana' ineh.

⁷ Idi Tuhan Allah nenganau' lemulun ratnan abuh tana', idi Ieh nengiup bang icungneh, pad lemulun ineh inan niat, idi ieh mulun.

⁸ Idi Tuhan Allah nenibu aceh kabun déi' Eden luk pa busat aco. Idi déi' Ieh nenganau' lemulun luk pinudutNeh.

⁹ Idi Ieh nengulun puar-puar kayuh luk do' siren mateh idi luk ngeruat bua' luk do'. Idi teh inan aceh kayuh luk titen lawa ulun déi' uned kabun ineh, idi lawa ileh kali' luk do' idi luk dat.

¹⁰ Idi ratnan Eden ineh inan aceh abpa' luk manud ngeba' kabun ineh, idi rat su ineh abpa' ineh bibpat apat.

¹¹ Idi ngadan abpa' luk pun-pun ineh Pison, ieh ineh luk nengelibut tana' Hawila, su luk inan amas.

¹² Idi amas ratnan tana' ineh pelaba do'. Idi teh inan umau luk do' buen idi batu luk meraga.

¹³ Idi ngadan abpa' luk kedueh ineh Gihon, ieh ineh luk nengelibut tana' Kus.

¹⁴ Idi ngadan abpa' luk keteluh ineh Tigris, ieh ineh luk manud amé' pa busat aco bang bawang Asur. Idi ngadan abpa' luk keapat ineh Pirat.

¹⁵ Idi Tuhan Allah nengalap lemulun ineh idi nenganau' neneh bang Kabun Eden ineh, pad ieh miak ngasa' idi ngimet ineh.

¹⁶ Idi Ieh nengecuk neneh, kebalaNeh, “Iko miak kuman bua' lawa luk bang kabun ini pad pianmu;

¹⁷ iamo' lawa ileh kali' luk do' idi luk dat ineh, aleg iko kuman bua'neh, ngaceku kareb iko kuman bua' ratnan lawa sineh, iko maté.”

¹⁸ Idi teh Tuhan Allah nepebala, “Na do' lemulun ineh sebuleng mo'. Idi Ui pian nganau' kuanneh seburur rurumneh luk ngedengan neneh.”

¹⁹ Idi Ieh nenganau' ratnan abuh tana' ineh amung-amung pung idi amung-amung suit. Idi Ieh nemaré amung-amungdeh kuan Lemulun pad kali' kudeng apeh ieh nganau' ngadandeh. Idi anun-anun luk inau'neh ku ngadan amung-amungdeh, kudeng ineh teh luk mangun ku ngadandeh.

²⁰ Idi lemulun ineh nenganau' ngadan amung-amung pung luk melayo, suit, idi pung luk meliput. Iamo' na luk idi rurum luk petulu ngedengan lemulun ineh.

²¹ Idi Tuhan Allah nenganau' lemulun ineh pelaba rudap. Idi laba' ieh rudap Allah nengalap sebuleng tulang sigarangneh, idi Ieh nemapen su ineh ku uang teh.

²² Idi ratnan tulang luk ilapNeh ratnan lemulun ineh, Ieh nenganau' seburur decur, idi Ieh nenguit neneh matun lemulun ineh.

²³ Idi lemulun ineh nepebala, “Idi nekini tulang ini ratnan tulangku Idi uang ini ratnan uangku. Idi ieh miak tetanen decur, ngaceku ieh pangeh rinuat ratnan seburur deléi.”

²⁴ Ngaceku ineh lemulun na miak na necan taman-tinanneh idi pamung dengan awanneh, idi didueh ineh mangun ku sebuleng burur.

²⁵ Idi deléi idi decur ineh lubpa dengan na migu'.